Taya kongo ekwatho ya pitithe oalbuma yawo

0
301
Aahikingalo yongundu The Young Host, Tobias Katangolo na Alfeus Kamati , mboka ya pumbwa ekwatho lyoshimaliwa opo ya pitithe oalbuma yawo muDesemba nuumvo.

 

ONDANGWA –  Oonekandangala lyombandje oyendji otaya lala inaaya kotha uusiku nomutenya, oshoka oya hala okuyambulapo iitalenti yawo ihe omolwa ompumbwe yoshimaliwa otaya longo nuudhigu na yamwe ohaya hulile muunyengwi.

Ongundu yaamati yedhina The Young Host ya yambukile momukunda Onalunike mOshikoto, nongashingeyi ohaya kala mOndangwa, oyena ehalo lyoku gandja etumwalaka moshigwana tali pitile moongalo , ihe otaya holola yeli mompumbwe yoshimaliwa yo ya vule ya tsikile niitalenti yawo.

Oya thikamapo maamati aagundjuka yaali Tobias Kangongolo na Alfeus Kamati ngoka a tseyika koyendji Voxlam. “ Otwa putukile pamwe notwa hiti osikola yetu pamwe, otwa shanga ondondo onti-12 mo 2015, otwa kala atuhe tuna uukwatya waafathana meputuko lyetu nonande twa kala hatu imbi monale ka twali tweya puuyelele tse tu ulike ando iipewa niitalenti yetu,” Voxlam ta ti.

Petameko lyomumvo nguno oya li ya tameke okwiimba oongalo dhawo mono yi inyolitha nehangano lyaahikingalo aaNamibia. Oya li ya pititha okangalo kawo kotango nuumvo, noya hokolola kutya oyi ipyakidhila nokutula miilonga oalbuma yawo ndjoka ya hala yi ka pite pehulilo lyomumvo nguka, ngele ya mono omakwatho.

“Otwa li twa tula uukuni kumwe nakuume kandje notwa tokola opo ando tu pitithe oalbuma yetu ndjoka pehulilo lyomumvo, ihe omolwa ompumbwe yoshimaliwa otatu nana nuudhigu, notatu indile moshigwana ngele omuna omusamalia omunamutimahenda ta vulu okutu yambidhidha tse tuye komeho noshipewa shetu, etu kwathe naashoka ena opo tu vule tu gandje etumwalaka tali tungu moshigwanana,” Voxlam ta tsikileko.

Okangalo hoka ya pititha otaka ithanwa Entertainment, taya gwedhapo kutya oya tegelela omakwatho ga kehe, omakumagidho, omayele okuza kaaNamibia ayehe naaholi yoongalo. Oya ti oalbuma yawo ndjoka ya thaaneka yika pite mbala otayi ithanwa Do not judge, tamu adhika okangalo hoka Mukwanekamba na wulwe.

Oya pula aahikingalo aaNamibia ya kale haya longele kumwe, yo ya paathane omayele ya vule okuyambulapo ehangano lyaahikingalo moshilongo, yo ya gandje etumwalaka tali vulu oku pulakenwa  komapipi agehe moshigwana.  Oya pandula ayehe mboka ye ya yambidhidha opo ya vule ya pitithe okangalo kawo hoka kotango.

 

 

LEAVE A REPLY

Please enter your comment!
Please enter your name here