Isaacs a pula aantu yi ikonakonithe

0
320

 

 

Oshakati  – Omuhungimwenyo a tseyika nawa Anita Isaacs okwa kunkilile opo omuntu kehe a kale iikonakonitha  ombuto yo HIV/AIDS, ye a kale eshi mpoka thikama.

Isaacs ta ti aantu oyendji moshilongo oyena uumbanda ngele tashiya komukithi nguka, nuumbanda mbono oweya etele opo ya kale yaashi mpoka ya thikama.

Isaacs okwa popi ndhika oshiwike sha piti pombelewa ye mOshakati moonkundathana naKundana. Ta ti aantu oyendji ohaya lamininwapo komavu unene sho inaaya hala okukonakonwa omolwa uumbanda mboka haya kala yena.

“Ombuto ndjika yo HIV/AIDS oya fa owala omikithi omikwawo ndhoka hadhi vulu oku kwata omuntu, go nagu kale owala gwat aambwako ngaashi omikithi ndhoka dhi li mo tadhi indjipala, ihashi kala ngaa oshipu ashike ngele owa kutha onkatu opo wu ikonakonithe ohashi ku mangulula unene miinima oyindji,” Isaacs ta ti.

Ta ti oshi li mondjila opo omuntu kehe a kuthe etokolo ndyoka lili mondjila ye a tseye kutya okwa thikama peni nombuto ndjika yoHIV, omuhungimwenyo nguka ta ti ihashi kala nande oshipu uuna omuntu a tokola opo a ikonakonithe, ihe opena aahungimwenyo ya pyokoka mboka ya dheulilwa owina mokugandja ehungomwenyo ku kehe ngoka a hala okwiikonakonitha, nenge ngoka ena uudhigu wontumba.

“Olundji aantu yetu moshigwana ka yena euvoko lya gwana, ohaya kala owala momagumbo nongele a mono te ehama opo ta endelele aye koshipangelo nuuna ndono omuntu ngoka a monika ombuto ndjoka ohashi vulika uuwehame wumu gwililepo ye ta hulitha nonande kali ena okuhulitha ethimbo olyo ndyoka, shono oshe etwa owala kuumbanda,” ta gwedhapo ngaaka.

Isaacs ta ti mokwiikonakonitha omuna uuwanawa owindji oshoka omuntu oho tseya mpoka wa thikama, ngoye ohashi ku kwatha ishewe wu lundulule omaihumbato goye, nolundji oho mono ehungomwenyo lyeku mbilipalela.

Okwa kunkilile mboka ya monika ombuto ndjoka kutya itashi ti ehulilo lyuuyuni, oshoka okuna omiti ndhoka hadhi lelepeke no tadhi kwatha aantu oyendji moshilongo uuna yi iyutha komalombwelo gaapangi no haye dhinu ngaashi shu uthwa.

Ta pula ishewe mboka taya lumbu nombuto ndjoka ya dhiginine epango nomiti dhawo, yo taya kala haya sile omalutu gawo oshimpwiyu aluhe. “Aantu oyendji oyeli owala natango metindo no inaya hala okuuvako omukithi nguka nonande uuyelele hawu andjaganekwa mpaka naampeyaka. Natu ethiipo uumbanda mboka tuna tse tu yeni kiipangelo tuka hungweni omwenyo tse tatu konakonwa tu talike mpoka twa thikama shika otashi tu kwathele opo tu kale monkalamwenyo twa manguluka, tse tuna omukumo mu kehe shoka tatu ningi,” ta tsikileko ngaaka.

Isaacs ta indile aantu ayehe ya kale haya talelepo iipangelo yo taya kongo aluhe ehungomwenyo mpoka sha pumbiwa, opo kaaya lamininwe po komaudhigu ngoka geli monkalamwenyo.

LEAVE A REPLY

Please enter your comment!
Please enter your name here