Omukulupe 86 a dipawa neembele komupwidi

0
282

 

EENHANA-Ovakalimo vavali vomoshitukulwa shaHangwena, ova ponokelwa, umwe okwa dipawa namukwao okwa ehamekwa kovapwidi moshivike shaya.

Omupopiliko wopolifi moshitukulwa shaHangwena, Shisante Kaume Itumba ota ti,  oshiponga shotete osha ningilwa Mirjam Haihambo womido 86 a dipaelwa pOmatunda aMundaungilo oshivike sha djako komutekulu  omupwidi omulumenhu womido 45.

Omulumenhu oo taku ti okwa hangwa a mana po eepela daye domukifi womomadilaadili, okwa ponokela nombele omukulupe ou, noku mu twa oikando ihapu. Oshiningwanima eshi osha ningwa efimbo lokomatango manga Hauhambo nomutekulu vali meumbo ovo aveke. Ovaneumbo ove ha hali mo meumbo pefimbo loshiningwanima ove li twa moshiningwanima eshi nokulopotela opolifi yaMundaungilo. Oshimhu shaHaihambo oshi li kokila yomidimba kOkongo sha teelela ekonaakono.

Shisante Itumba ta weda po kutya, omufekelwa ou a ninga efimbo ina nwa omiti, okwa lumata yo omupolifi mEenhana manga a li ta longikidwa okutwalwa koshipangelo shomukifi womomadilaadilo koWindhoek oko ta ka konaakonwa.

Itumba okwa weda po kutya, natango moshivike osho tuu osho lokomatango lela omunyananghwengu mukwao weedula 36 wOkekango laNgobe moshikandjohoololo shaPembe, moshitukula shaHangwena, okwa teta ko ekutwi lokolumosho la mumwainagona omulumenhu e mu ponokela okudilila konima, va li tava tu eemhata poukamba. Nakutetwa okutwi weedula 38, okwa yasha omupambele ou womupwidi mokwooko kwokolumosho.

Omupopiliko wopolifi ta weda po kutya, fiyo opapa kape na ou a patulula oshibofa nopolifi oya tuma ehokololo longhendabala yedipao kombelewa yomupangulindjai  i kufe etokolo. Opolifi oya twala oonakumonifafana oiponga  kEenhana. Ou a tetwa okutwi, okwa hondjelwa ko koshipangelo Eenhana Green Side Private hospital nokulekelwa fiku olo, omanga ou a yashwa mokwooko e li natango moshipangelo shepangelo mEenhana.

Itumba ota ti, ovapambele vovanaudu momadilaadilo, nava fye oshisho kutya ovanhu ava ovanwa omiti davo melandulafano  vo ova pewa okulya. Okwa ilikana ovapambele vovanhu ava vamwe vomuvo hava pewa oshimaliwa kepangelo, va fye oshisho kutya ita ve va efa vanwe omalodu noimaliwa oyo, ndele ve va kwafe opo veli palule noku li landela eendya. Onghee Itumba okwa kunghilila oshiwana shi file oshisho ovanaudu vomadilaadilo, ndele oshinakuwanifwa eshi inave shi yandja kopolifi ile koipangelo.

Opolifi moshitukulwa shaHangwena oya kunghilila ovapambele novafilishisho vaavo ve na oudjuu womadilaadilo va fye oshisho kutya ava oha va nu omiti davo ngaashi sha ufwa keendokotola.

Ekunghililo eli ola ningwa kOmupopiliko wopolifi moshitukulwa osho Shisande Kaume Itumba konima yoiningwanima ivali ya yooloka omo omunhu umwe a dipawa komunaudu womadilaadilo namukwawo a monifwa oshiponga kokutwi kumwaina nae ee he li nawa momadiladilo.

Itumba okwa kumaida oshiwana a ti ngeenge omiti dovanhu ava odili poku pwapo ovafilishisho vavo nave va  twale koipangelo pefimbo.  Ota ti, ovanhu voludi eli ova nyika oshiponga ngee va mane po omiti, tava dulu okuyandja oshiponga kovaneumbo, komunhu keshe nokovapolifi shaashi ngee okwa ningile omunhu owii oha kala e li vangeka.

 

LEAVE A REPLY

Please enter your comment!
Please enter your name here