Shailemo oye ta lele ehangano lyaanafaalama ngaashingeyi

0
231

ONDANGWA – Omolwa okwaa uvathana hoka kwa kala mehangano lyaanafaalama yaMangetti oomvula dha piti, elelo lyopamuthigululwakalo lyaNdonga olyali lya yimo moshinima shika opo ya hanganithe aanafaalama.

Ehangano olyali lya konekiwa tali lelwa kaawiliki yaali nonande ehangano limwe ashike, nopwa kala tapu lopotwa ookwaahena mbili mokati kaaleli mboka. Oyali ya thaneke esiku lyowina opo ku hogololwe omuwiliki gumwe ngoka oye ta kala ta lele ehangano ye ta tula ayihe melandulathano.

Ismael Shailemo oye ali a hogololwa a kwatele iinyangadhalwa yehangano komeho, noku kwashilipaleka kutya ehangano otali longo ngaashi shu uthwa. Momahogololo mono omwali Ismael Shailemo na Shali Kamati. Kamati okwa li a ti ita vulu we manga okulela ehangano lyaMangetti, na Shailemo oye ali i inekelelwa oshinakugwanithwa shoka.

Shailemo ota kala ta wilike ehangano ndyoka uule woomwedhi 12, shino osha yelithwa moshigongi showina shoka sha li sha ningwa Olyomakaya ga piti pOluno mOndangwa, mono yamwe yomaanafaalama yali ya gongala, yo ya gandje omatheneko gawo.

Elelo lyopamuthigululwakalo olyo lyali tali wilike omahogololo ngaka gowina. Amushanga gwelelo lyopamuthigululwakalo Joseph Simaneka Asino okwa ti ehangano lyaMangetti olya kala metopoko enene, noya kala yena ehalo nohokwe opo ya mone aanafaalama ya hangana no taya longo muukumwe lyo ehangano li yambukepo.

Asino ta ti omatopoko ngaka oga tameke mo 2012 nokwaana mbili pokati kaaleli mbaka okwa kala taku dhana onkandangala onene mehangano, “Aanafaalama inaya kala taya vulu okukonga omakwatho oshoka oyali metopoko enene, otwa li twa mono sho opala opo tu tule kumwe aaleli mbaka yaali, po tapu hogololwa ngo ta kala ta wilike ehangano, yo aanafaalama taya hangana noku yambulapo ehangano,” Asino ta ti.

Aanafaalama mekwatelokomeho lyelelo lyopamuthigululwakalo oya kala nokuya moonkundathana opo ya tule ayihe melandulathano lyo ehangano li kale owala lina omuwiliki gumwe.

Shailemo ngono pethimbo ta taambako oshinakugwanithwa shoka okwa pula aanafaalama ya longele kumwe onga omuntu namumwayina yo ya yambulepo ehangano lyawo. Okwa pula woo aanafaalama ya kale taya paathana omayele ga nkene yena okuyambulapo ehangano lyawo ndyoka.

 

LEAVE A REPLY

Please enter your comment!
Please enter your name here