Tuyeni kolupale laTuyeni: Efimano lokuhombola ombada monale ola shike?

0
315

 

Fiyo opaife ohatu tange ashike onakudiwa, ponhele yoku tumbaleka onakuuiwa molwaashi katushi eshi shi li komesho oku twa uka.Oonakuuda osho shaliko mounyuni wonale nomatwi avo, monena otava kendambala okulongifa oyo kwa li hayi ningwa mefimbo lonale nonande oshili ei imwe yomuyo otaike va kwata  peefingo, ngeenge ovei tula moilonga.
Ovashamane ilo tutye ovahomboli mefimbo lonale okwali hava hombola ovakainhu vahapu omolwomatomelo mahapu amwe kaimba oipupulu ngoo nee ilo tu tye okulipopila kwavo ku hena omakanghameno.

Etomelo limwe oleli, vati ovakainhu ovakala vahapu na vamwe ihava ka mona ovashamane sho osho have ke li haluka vahombolwa vahapu komulumenhu umwe. Etomelo likwawo oleli, okudja nale fiyo omefimbo lopaife vati omavaya ovashamane okwa li mahapu vo ovalumenhu voshili okwa li vashona naashi osho hashi nane ovakainhu veke li haluke va hombolwa vahapu omolwa ovalumenhu voshili va pumba.

Omukulu wonale okwatile okupula haulai ove ngeenge to minikile hasheeshi uhena mesho.Opo tu ude shihapu onda kundafana nakadenga osho yo katokote omushiivi nawa moinima yOshiwambo, tate Filipus Tuhafeni ya Nghidengwa.
Tate NGHIDENGWA, nonatango ovakainhu ova Namibia ova hala okuuda kutya oshike naana kwali hashi kala shikwete ovashamane mefimbo lonale opo va kale vena ovakulukadi vahapu momaumbo avo osho tashiufanwa okuhombola ombada?

YA TUYENI, efimano lovashamane nale lokuhombola ovakulukadi vahapu, okwali okuulika oulumenhu mefimbo olo molwaashi okwa kala kwa konekiwa noku shivikwa nawa kutya ovakulukadi vahapu itava dulikwa kevaya, molwaashi kuna eshi to va pe kumwe novana vavo. Opo ne ukale una ovakulukadi vahapu mefimbo lonale ouna okukala una eengombe dihapu nepya lifike mounene petata lomukunda weni.

Tate NGHIDENGWA, omahokololo taapopi kutya ovashamane vonale okwa li muhole okulya, sho osho kwa li hashi mu hombolifa ovakulukadi vahapu, opo mu kale tamu etelwa ouvalelo uhapu, oshoshili ngoo ilo otamu totelwa eendjovo.

YA TUYENI, ouli mondjila ashike mounyuni winya okuhombola ombada itashi ti osheshi omushamane ehole okulya, eshi okwali ashike oku ulika oulumenhu momukunda ngaashi ngo nde ku lombwela petameko penya, molwaashi ngeno oove nee una eengombe dihapu ndele nepya la tendako omukunda ndele nomaanda okuyadi taa xunga, oikulya ei ngeenge oove auke uli otai ka liwa kulye?

Tate NGHIDENGWA, paife waeta ne oukoloni pouyelele ou kwa li hamu ningile ovakulukadi pefimbo li, tashiti mboli okuhombola ovakulukadi vahapu mefimbo lonale okwali hamu shi ningi ovo vaye ponhele yeengombe edi hadipulula, novana vavo ava tava dala tava ka lifa ne eengombe deni odo kwa li dihapu dafa edu.Nye ngeenge mwafi  ovakulukadi ava novana vavo ta veya va tewa tewe kovakweni vafa kwali veya okuuhala momaumbo eni, oshike kwa li ihamu ka tala ovamwanyoko veuye ve mu kalele novatekulu veni veuye valife eengombe molwaashi ovo kwali hava kala vena mboli oufemba woku mu fyuulula?

YA TUYENI, ndishi nye omweya mounyuni weni wovakulukadi tava fyuulula oovene vavo, kumwe novana vavo, mounyuni wonale nande oumone ngo omushamane  ena ovakulukadi vahapu ngaho, efiku ngo tafi manga nokuli neenghali inaadi djapo keshe omukulukadi okwa li ha longekida ondjila yokushuna kooina pamwe noludalo laye.

ndele ovakulukadi aveshe ovo meumbo omo okwali ashike hava dimo ngaashi veu ilemo ito monika nokuli to kwata mo nokaima omo ovatekulu vomushamane ngeenge ove ku mono otava ti hamba oove walyapo tatekulu ngoo shili, nefimbo limwe nokuli ngeenge owa monika tokwena, ngeno tolipula ngo omwali woye ekufiyapo, oto lombwelwa taku ti meme teelela kepata leni kufiwe opo uka kwene edimo leni, ou afya omukwaanime kedimo.

Tate NGHIDENGWA, paife nandi ku shune nee konima paife omushamane eshi ha kala novakulukadi vahapu, aveshe veli meumbo, ngeenge tashiya kouvalelo wovakulunhu ,okwa li ha topola ngaipi, ilo okwali ashike hapa kala oomeme vamwe tavapi eshi keendjuuo davo ihaa ku kongholwa nande?

YA TUYENI, epulo olo oliwa kaume ondjala yoovene koomeme ava kakwali naana haikalapo osheshi mwene weumbo naye okwa li ashike ha longo neshikulafano la fa okaliindeli.
(Munyalombe kondjuo yaye omo Maandaxa)
(Mwehaka kondjuo yaye Ometivali)
(Meepokati kondjuo yaye Ometitatu)
(Meetotende kondjuo yaye Ometine).

Ashike ya Tuyeni ndimbuluka eto koneke eshi ndeku lombwela apa, okwa li hapa kala efiyafanepo kwa li hali ningilwa omunyeumbo opo eli haluke te li fola kondjuo imwe oikando  yonhumba, okwali hali ende ngaipi? Ovakulukadi ngeenge ta ve eta ouvalelo kolupale oufiku, oikulya okwali ne haitulwa opo ye omunyeumbo ta lavele ne momatiti ta tale omu mwadjenga nawa, shima tu ndele metiti tamu hangika oudingu koshi yodjove ilo okaxuxwa kakangwa, efiku olo omunyeumbo omondjuo yoye ta monene eemofi.
Ashike ngeenge keefiku oove wa tya oifima ikukutu nevanda ngo inaali ya omaadi, oto keli haluka ngo papita nomwedi omushamane inaa kongholapo pondjuo yoye, ngeenge owafa ngo nee om’bodo nokuli, aaye ekondombolo oto li mono nou djuu lo omo ngo lili meumbo uliwete ngo eshi tali penduka meendjuo da va kweni.

Tate NGHIDENGWA, uhu!! Edi  oda kula do oditilifa, ndele omwati ngo ovashamane vonale ka kwali vehole okulya vo tave lifola keendjuo dimwe oikando ivali oku kwatelekwa oikulya tai tokola elaka fiku olo, ngeenge ne ovakulukadi aveshe efiku olo okwe li haluka twakanga ouxuxwa twe mwe etela kolupale, tashi ti ota nangala ashike oufiku oo taende neendjuo adishe itaa kofa?
Oshili omukulukadi eya okuhombolwa ndele paife oheli pyakidile ashike noku nyanga apa tapa monika ouvelelwa vawa opo a ka telekele omushamane opo kondjuo ya ye ku kale taku lifolwa?Noivelelwa haipu pumbu ota matuka ngo ne nomukunda aushe ta ningile okulifolwa, eee wali una oudingu vapupo, eee kwali una ouxuxwa vapupo, oshili ye iheli tulilemo ngo ne eli folenge nande oshali, ee natango ovashamane ava vati okwali ngo hava kala vena ouumbo pominghulo domaumbo avo ngeenge okwai kokaumbo ndele omafiku aeshe oo kokaumbo otaku telekwa ashike oudingu, tashi ti keumbo iteya ko vali manga oudingu inaava pwako kokaumbo kaye?

Tate NGHIDENGWA, potete eshi nde ku pula owati efimano lokuhombola ombada nale okwali oku ulika oulumenhu kwovashamane, ndele paife momapopyo oye omu oto ti vali ovashamene okwali ha tondo po omukulukadi ngeenge omumbodo ilo ihateleke oikulya yatokoka,owa hala okutenda oshitya koshi kutya ngeenge ovakainhu tava ka hombolwa mefimbo lonale okwali ha va longwa kooina opo va ka telekele ovashamane va vo oikulya iwa, vo oumbodo veu fiye oku tavadi osho wa hala okutya ngaho?

YA TUYENI, osho naanaa kaume nonande ovashamane kakwali vehole okulya, kandiwete naana pena omushamane taka hala okuhombola omwalikadi mumbodo ilo ha teleke eendja dafa tadii koingulu, hano oukoshoki komukulukadi mwene weumbo owapumbiwa ndele noikulya ngo taitokala omalaka ashike itashiti ne ovashamane osheshi ve hole okulya.

tate NGHIDENGWA,  paife eshi ngo tuli mounyuni uli ngaha eshi to tale onghalo ei kwali hamulongifa yokukala novakulukadi vafa edu  ove ngeno tokala ngo tofaafanifa ouminghoka ava vawa, na natango otashi shiiva ngo tu hombole ovakulukadi ovo vefike ilo tu tye vedulife va vali shili?

YA TUYENI, owa pula naanaa nawa kaume, oshili oinima oyo mefimbo lopaife itai wapalele mo vali, osheshi shotete nakuhombola ovakulukadi vefike ilo vedule vatano otaka monikako wafa naanaa omupaani yeemwene osheshi nongeleka itai popile oinima ili ngaho, oshitivali naku hombola ovakulukadi vahapu mefimbo lopaife ndele tova tula meumbo veli mumwe, efiku ngo to shi ningi ya Tuyeni olo ngo fiku taka tatula hano to fiye po ngo ounyuni ou.

Tate NGHIDENGWA, pexulilo apa etumwalaka la shike to lombwele ova Namibia, molwaashi natango opena ngo ovashamane vamwe vena ouumbo pominghulo ndele mbela ohaku telekwa ngo oudingu vawa vafa ava wadja nokupopya opo vamwe nokuli eshi hatupopi ngaha nomaumbo ovaafiyapo nale nale, po pena ngo noomeme vamwe natango to hange ngo a telekela omushamane wa ye oikulya ndele ngeenge owa talemo otot i ngo na pamwe omunhu otaka havaleka nande eenghuti dokuushimba. Omunhu keshe umwe nakale ndjila imwe, okufiyapo omaumbo okwa puka omolwa oivelelwa ilid ule, oshitivali oomeme nava telekele ngo ovashamane vavo oinima yatokoka, kombinga youkoshoki owapumbiwa kovanhu aveshe meumbo, ndishi opena ngo ovashamene vamwe to hange ngo taka nangala ndele ngeenge owe mu tale okwafa ngo doongi eli de daula medu, omunhu afa oye aeke tai moikumbafa ndele omukulukadi  ota keme ngo ne kedimba la mwene weumbo ye atila okumu popya vati omolwohombo.

Oomeme ova Namibia kufeni ombinga kolupale opo mu hakale tamu lundilwa kovashamene ngeenge ovo aveke veli molupale. Oomeme mu li meembelewa onye mu ninga votete okukufa ombinga kolupale. JOHN YA TUYENI
MRTUYENI76@GMAILA
CELL 0812988549

LEAVE A REPLY

Please enter your comment!
Please enter your name here