Namibia tali ka ninga ngaho lovakolokoshi

0
234

Omushangwahokololo uli moshifo shimwainafana naKundana shedina New Era Weekend ta u hokolola nota u yandje omivalu deendjebo moshilongo, ota u kumwifa nota u eta omalipulo mahapu kombinga yeameno lomwenyo womunhu moNamibia.
Omushangwa oo ota u holola kutya ovaNamibia ova homata nokomayoo, shaashi okuyelekanifa noilongo ikwao ovaNamibia ovahapu unene vena eendjebo.
Onghalo ei yovanhu va homata sha pitilila ota i limbilike na ota i eta elipulo kutya oshiwana shaNamibia nghee shili po nani oshiwana shovakolokoshi. Shaashi ope na ashike oinima itatu hai etele omunhu a kale a homata ile a lande ondjebo. Shotete, ongeenge nakulanda ondjebo, pauye mwene eli omukolokoshi, nota lande ondjebo aka longe oilonga yoimbuluma. Shikwao nakulanda ondjebo okuna oku kala eli mokati kovakolokoshi na ota lande ondjebo oku li amena ye mwene ile omaliko aye. Noshitatu oshi li sha yela kutya ovahumbati veendjebo vanininini ohava lande eendjebo molwa oukongo woifitukuti uli paveta, ile oku li amena koifitukuti.
Ashike osha yela kutya vahapu ovo ve na eendjebo kave na nande eefaalama vo nghee va dalelwe va ye koukongo, nande okeefaalama nghaho daavo hava yeululile oukongo meefaalama davo.
Sha hala kutya oshinene nima shokulanda ondjebo, osho oku kufa omunhu omwenyo, ile okweehameka omunhu.
Hano ngeenge nee ovanhu otava lande eendjebo, tave di landele eemwenyo davakwao, omolwashike mbela tu na ashike eendjebo hadi landwa noupu? Mbela omolwashike ita pa tulwa oveta ya kwata moiti oku tala nawa nokukonaakona ovo va hala oku landa eendjebo vo va talike ko ngeenge ove di pumbwa tuu shili.
Omunhu umwe nokapana oko ngaho iha landifa, ongodi ei ena okatoshe, ito dulu oku tya pamwe ota amene omaliko aaye, ashike oku na ondjebo. Okwa pumbwa pa totwe oveta tai tula oonakuninga omaehelo eendjebo koshidindifo sha kwata moiti, noku konaakona nawa onakudiwa yavo nonghalo yomadilaadilo avo, opo ku talike kutya ovanhu ava ina va longa oimbuluma monakudiwa, voo vali omaliudo avo opamadilaadilo oku li nawa, ina va nyika ouxwapindi, oku li dipaa ile oku dipaa ovanhu.
Omafiku enya Kundana okwa li ponhele yonhumba opo omukainhu umwe kwali ta hokolola nghee a fininikwa konghalo, aka lande ondjebo, nelalakano oku dipaa omulumenhu waye.
Omukainhu ou ota hokolola a kala efimbo lile mekwatafano nomulumenhu oo a kala nokumuhepeka neenghono.
Molwaashi okwa li a loloka, omukainhu ou okwa ka landa ondjebo ta kala ei na, a tokola kutya ota yashe omulumenhu waye ngeenge okwe mu kumu vali.
Omukainhu oku na elao, linene shaashi ekwatafano lavo ola ka xula ngoo nee ina pa dipawa omunhu, ashike ou haye aeke a landa ondjebo nelalakano lokudipaa kaume kaye kopaihole. Oihopaenenwa opo ili yovanhu va dipawa. Omunhu nghee a landa ondjebo okwe i landa ashike nelalakano lokudipaa omulumenhu waye ile omukainhu waye.
Oshinima shikwao osheshi kutya eendjebo paife mbela ota di landwa ashike keshe pamwe. Omafiku enya okwali pena omunhu ta landifa ondjebo kofacebook. Ondjebo tai landifwa yafa eenghaku, osho tashi ulike kutya keshe umwe ota dulu ashike oku landa ondjebo.
Vali, eendjebo omafele da hangikile meefaalama otadi ulike yoo kutya eendjebo dihapu kadi li paveta. Omunhu oto lipula kutya mbela eendjebo ngapi deli hanena momapandaanda, ndihe li komadima ovanhu? Sha hala kutya omunhu mboli oto dulu ashike oku dipawa kuwalye, ndee ondjebo ile oikuti nande oi hangwe kaku shiwike kutya oya lye.
Hano opena omhumbwe yokutula oveta yoku konaakona elando leendjebo.

LEAVE A REPLY

Please enter your comment!
Please enter your name here