Omaikuthomwenyo ga londa unene

0
255

KuMaria Namupala

ONDANGWA – Opolisi moshilongo oya lopota iiningwanima yomaikuthomwenyo oyindji mbyoka ya ningwa ehuliloshiwike lya piti. Omupopiliko gopolisi moshilongo Inspekta Kauna Shikwambi okwa ti omaikuthomwenyo oga londa unene pombanda.
Iiningwanima yomaikuthomwenyo oya lopotwa unene ehulilo shiwike lya piti mono aantu yatano (5), yi idhipaga komahala ga yooloka moshilongo. Shikwambi ta ti ayehe mboka yi ikutha oomwenyo ka puna nando ogumwe a thigapo omukanda tagu ulike kutya omolwashike yi idhipaga.
Oyindji yiiningwanima mbika oya lopotwa okutameka Etitano sigo Osoondaha ya yi. Moshiningwanima shimwe omukiintu goomvula 37 Helena Ivula olutu lwe olwaadhika lwe endjelela momuti ongula yoSoondaha momukunda Okatope moshitopolwa shaShikoto.
Martin Nekongo goomvula 68 gomomukunda Uukete mOnayena naye okwa adhika i imangeleka moshipeleki moka ha lala. Nekongo omumwayina gwakansela nale gwaNayena, Max Nekongo. Ngoka a ti kaye shi naanaa kutya mumwayina okwi ikuthile shike omwenyo molwaashoka ina thigapo omukanda gwasha.
Omadhina goonakusa yalwe mboka yiikutha oomwenyo mehuliloshiwike ogo Johannes Tobias gomimvo 26 ngoka ali omukalimo gomOngali moshitopolwa shaShana.
Enrico Muinyo gomimvo 32 ali omukalimo gomoWindhoek oshowo Johannes Ambrosius gomimvo 39.
Shikwambi okwa yelitha kutya oonakusa ayehe mbaka inaku lopotwa ya thigapo omishangwa nenge omikanda tadhi ulike kutya oyi ikuthile shike oomwenyo, ta ti eyo pombanda meidhipago otali limbilike unene moshilongo.
Okwa kumagidha aakwashigwana opo ya koneke kutya eikuthomwenyo halyo ekandulepo lyomukundu, oshihwepo okulombwela omuntu ngoka wi inekela ngoye to kongo ehungomwenyo manga inoo kutha etokolo lyokwiikutha omwenyo.

Opolisi tayi ti ohashi kala oshidhigu kaakwanezimo ngele nakusa iikutha omwenyo no inaa thigapo omushangwa kutya omolwashike, naantu ohaya kala yeli momaipulo ogendji, ngoka gaana omayamukulo.

LEAVE A REPLY

Please enter your comment!
Please enter your name here