Omusita gwongeleka a indilwa a thigepo King Kauluma

0
324

KuMaria Namupala

KING KAULUMA – Osheendo shelelo lyopashitopolwa mOshikoto oshali sha talele po ehala lyongeleka, konima sho lya lopotelwa ongeleka yili momudhingoloko gwoKing Kauluma tayi yono ombili yaakwashigwana, yo tayi yugu aakulupe openzela yawo.
Omayipumo mumwe oshowo omangwandjulathano oga li ga holoka momukunda King Kauluma moshikandjohogololo shaNehale lyaMpinga, konima sho pwa totwa ehala lyongeleka ndjoka taku tiwa oyaapapudhuki[oshiveva].
Ongeleka ndjika oyili momukunda ngoka popepi negumbo lyomukalelipo gwa mwene gomukunda. Aakwashigwana oya kala taya nyenyeta ongeleka ndjoka taya ti oya teyapo ombili momagumbo, noya tokola opo ya lopote oshinima shoka sho ya lulilwa.
Aakwashigwana oyali ya ningilwa oshigongi Omaandaha goshiwike shika, shono sha kalwa kaanamukunda mboka yu uvite uudhigu omolwa ongeleka ndjika, opwali pwa kalwa wo kaanambelewa yaza kiikondo ya yooloka ngaashi, kOshikondo shuundjolowele, oshikondo shElongo oshowo ookansela dha za kiikandjohogololo ya yooloka moshitopolwa shaShikoto.
“Ongeleka ndjika oye eta evundakano moKing Kauluma, aantu oyendji momagumbo ihatu popi molwaashoka anuwa otatu logathana, ka tu na we ombili naashiinda yetu , otatu lundilwa nongeleka ndjika oya ngwangwaneka aantu oyendji pomudhingoloko gwetu,” aanamukunda ta yati.
Ngoka ta ti oye omusita gongeleka ndjoka tayi ithanwa The New Jerusalem of all Immanuel Mercy, Petrus Manele gwoomvula 26, okwa ti okwa li eya pehala mpoka konima sho aakwashigwana ya ningi omakwatathano naye taye mu lombwele kutya oyena uudhigu noya pumbwa okugalikanenwa.
Ongeleka ndjoka oyina iilyo oyindji naakwanegongalo ohaya lala muutenda pehala mpoka, taya ningi omagalikano. Manele okwa hokolola kutya ye omuprofeti ta longo nokugalikana, oshowo okukuthapo omikundu nomaupyakadhi gaantu. Ta ti kali ena elalakano lyoku etapo ongeleka, ashike omagalikano owala.
Aanamukunda oyendji oya kala noku mbomboloka yaka hokolole omaupyakadhi gawo, naamboka yena omauvu ga yooloka oya kala nokuya kongeleka ndjoka, opo anuwa yaka galikanenwe dho omikundu dhawo dhi kandulwepo komusita ngoka. Okwa konekiwa aanona mboka ha yayi komanongelo haya hulile pongeleka, yo yamwe ihaya yiko nande oshoka ohaya hulile ondjilakati.
Ongeleka ndjika molwaashoka otayi longo shaali pautho omolwa omikanda ndhoka yaana, oya pewa elombwelo opo ya hulithepo iilonga yawo yomauvitho, yo tayi kongo manga oombaapila yo ya tameke taya ningi omauvitho uuna ya pewa epitikilo nokelelo lyopamuthigululwakalo.

LEAVE A REPLY

Please enter your comment!
Please enter your name here