Ongulohi twa lolo omaviinu gaNamibia

0
325

KuDesie Heita

Windhoek Nonando okwa li uutala ongulohi ndjoka esiku limwe omasiku gapiti otwa gongalele pamwe nelalakano okulola omulyo gwomaviinu ga dhungwa moNamibia kaadhungi yomevi ndika.
Gamwe gomwaangaka oga longwa noku dhungwa mondoolopa yaMaruru poshidhungilo shomaviinu shedhina Erongo Mountain Winery.
Shika ohashi dhungu oshampanye okuza miiyimati yaamuka ngaashi omaguni ngoka haga zi koKavango.
Oonakuninga omaviinu ngaka oya ti kayena uuthemba woku ithana omavinu gawo kutya ogo Oshampeina molwashoka Fransa oye mwene gwedhina ndika. Ihe nando ongaaka omulyo gwomaviinu ga ningwa mOmaguni ogwa faathana ashike naangoka gwoshampeina.Omaviinu ngaka ohaga kala gafa taga fuluka go taga ningi oombwimbwi go ogena omulyo omwaanawa lela.
Kakele komaviinu ga longwa momaguni poshidhungilo shika ohapa dhungwa wo omalovu haga ithanwa Eembe Cream ngaka ngaashi edhina tali ti oga longwa moombe.
Omulyo gwomalovu ngaka ito gu pewa nando okulye onkene omuntu owa thiminikwa wu popye mbala kutya omalovu ngaka okonyala ge vule ngoka ge shiwike koyendji go Amarula Cream. Eembe Cream omalovu ngoka ga li ga tseyithwa noku tulwa momalandithilo mu Desemba omvogu, omanga omaviinu goombwimbwi oga tseyithilwe omasiku ga ziko moVenduka.
Kakele komaviinu oshidhungilo shika osha longa po wo ekende lyoshikunuwa shiigwanga moku longitha ekakata niigwanga yilwe naashika osha lukwa osho Essence of Namibia nohashi piti po nawa pothingo uuna shatulwa mumwe niikangwa yomeya.
Shika oshiwanawa okunuwa unene konima yokulya.
Ongulohi ayihe ndjoka otwe yi longitha okulola omaviinu ga za kiidhungilo ayihe moNamibia, ngaashi shoka sha tumbulwa metetekelo niikwawo ngaashi shoka hashi ningi omaviinu ongoshitopolwa shomapekapeko pOtjiwarongo Cheetah Foundation. Omanga efamilia limwe hali faalama nomandjembele ohali dhungu omaviinu molwashoka inali hala okutala omandjembele taga hepa sho ngoka itaaga vulu okulandwa kaaEuropa sho inaa ge ya opalela .
Oshidhungililo shika nasho oshina omaviinu omawanawa ngoka omunwi gomaviinu itee ga pilamene unene tuu ngele tashiya pomulyo gwago.
Poshiithanene shika opwa li iikunwa oyindji ya dhungika, itandi dhimbwako ngaashi ogiina, omberendi , nenge omalovu omalulu galwe ga longwa koshidhungilo shedhina Naute Wineries , poNaute Dam mpoka iikunwa mbika hayi longwa moondunga dhuushimba, moomafauyena nosho tuu. Yo iilongomwa mbika oyina omadhina taga hokitha ngaashi Matisa ndika ekende lyomalovu ga longwa momafauyena. Iidhungilo mbika otayi holoka iishona ndele nayo oya pyokoka ashike ngaashi mbyoka iinene. Tala ashike ngaashi omaviinu gedhina Colombard haga ningwa koshidhungi shedhina Thonningii Wine Cellar momasilundundu gaTavi. Ngaka omaviinu omawanawa gafa ashike goludhi olo tuu ndoka ngoka haga longwa kaaFransa mboka oyo ye shiwike aadhungi yomaviinu kaaku nawe.
Eyooloko lyaangaka gopOtavi oondika kutya ngaka inaga tulwa efulika opo ga pye. Ndele ohaga pithwa komaula gomandjembele gogene.
Ongulohi yokulola omaviinu ndjika oya ningwa konima sho ongundu yaantu mwa kwatelwa na Ndohotola Malan Lindeque Amushanga gOmudhingoloko oshowo Ndohotola Rudie van Vuuren gwa Naankuse Lodge ya kundathana kombinga yokulola omaviinu ga dhungwa muka. “Onda nyanyukwa shili okumona omaviinu gaNamibia.
Omuna aadhungi yomaviinu golela yi itulamo moshilongo muka, ya longa omaviinu taga thigathanapo na galwe muuyuni , momulyo oshowo mondando” osho Lindeque a ti. “Oshinakugwanithwa shetu, opo tu tseyikithe omaviinu getu go ga mone oompito dhoku landithwa.
Natu longe aantu yetu kutya ngele yo inaya nwa omaviinu gaNamibia nena inaya lola omaviinu omawanawa” Omupevi Minista gwomudhingoloko Tommy Nambahu a ti.Minista yOmudhingoloko nOmatalelopo Pohamba Shifeta ngoka kaalipo okwa tumu etumwalaka okupitila muNambahu kutya oshikando sha landula uuna ta tuka nomalweendo gomombepo gaNamibia okwa hala okupewa a nwe omaviinu gaNamibia.
“ Iilongomwa mbika otayi ulike kutya uunamapya otawu longo sho iilongomwa yawo tayi ngushupalekwa mokutulwa ongushu mokulongwa iilongomwa ngaashi omaviinu.

LEAVE A REPLY

Please enter your comment!
Please enter your name here