Ovanhu 439 va fila moiponga yomatuwa

0
263

Komutoolinghundana

ONGWEDIVA- Ovanhu 439 ova fila moiponga yomatuwa meepate domoshilongo, pokati kaJanuali na Aguste 21, 2016. Ouyelele owa yandjwa kuVictoria Amutenya, omunambelewa woshitukulwa shomapukululo kelaameno loiponga yomatuwa okudilila mombelewa yoMotor Vehicle Accident Fund mOngwediva.
Amutenya okwa twikila ko ta ti, pokati kefiku lotete lomudo fiyo omuJuni, ovanhu 69 ova fila moiponga yomatuwa 305. Momwedi Juli, neudo, moiponga 365 omwa fila ovanhu 39, nomwa lemanena ongudu yovanhu 597. Amutenya okwa ti, luhapu oiponga ohai ningwa unene pokati kEtine noSoondaxa sha etifa evalulo loiponga aishe kumwe moshilongo ashishe Ii hapupale unene.
Omakonaakono okwa holola kutya, oiponga yomatuwa moNamibia ihapu oya etifwa keshingo lonhapo ya endelela unene, hashi etifa etuwa laalangate nokweeta omafyo noiponga. Amutenya ta weda po vali kutya, onghatu onhivali hai eta oiponga, omatuwa hae lidenge mumwe omitwe nomitwe mwa fila vahapu. Oiponga ikwao yomatuwa ohai etifwa kovaendi vokolupadi, vahapu pefimbo eli ve na eliudo kutya omatuwa oo eva yapukile nongenge pa holoka oiponga otava futwa.
Omunambelewa woMVA Fund Amutenya okwa yelifa kutya, omatuwa 509 a li moiponga yomeendjila fiyo omuJuli neudo , unene oiponga ohai ningwa pokati kotundi 12:00 fiyo opotundi 00:00 keengula. Unene omatuwa manini (sedans) oo unene mahapu moiponga taku landula eebakkie. Ovakufimbinga moiponga yomaludi aa unene ovanyasha ovalumenhu vopokati keedula 16-35.
Amutenya okwa fatulula kutya, 2015 ovo va fila moiponga fiyo omuAguste ova li 458. Okhomas oshitukulwa shiyadi ovanhu vahapu, vamwe ovaendi kolupadi nomatuwa osho shi li komesho moiponga yomatuwa, sha landulwa kOshana shi li ponomola onhivali, ponomola onhinhatu ope na oshitukulwa shErongo na luhapu oiponga ohai etifwa kondau. Oshitukulwa shaOtjozondjupa oshi li ponomola onhine mouhapu woiponga molwa oshitauwa shoB 2 sha pita moshitukulwa, noshitukulwa shaShikoto oshi li ponomola oninhano mouhapu woiponga.
Amutenya ta lombwele oshifo Kundana kutya, ovaendi vokolupadi vahapu ova lyatwa nokufya, nomuvalu wa vahapu ovomoKhomas, ya landulwa koshitukulwa shaShana . Om’valu wovanhu va lyatwa ve li keembasikela nao owa tana paife . Omunambelewa okwa weda po kutya, oiponga ihapu oya holoka eshi ovanhu ihava pitifa po oinano pokati keetuwa neetuwa, noshidjuu okuhenuka oshiponga ngee osha holoka po.
Molwa ekanifo leemwenyo dihapu neudo moiponga, oMVA Fund oya tameka noikonga yomapukululo moiputudilonongelo ngaa shi moHifipepunye Campus, IUM nomOngwediva Faculty of Engineering op ova tameke po neeClub dokuyandja ouyelele kelaameno loiponga omolwaashi, ovanyasha ovo unene tava fi,no tava lemanene moiponga. Amutenya ta ti, ngeenge omwaalu woshiwana owa xulupo koiponga neliko loshilongo tali halakana po komukalo woiponga ohatu ka fika ko ngaheli[pi koVision 2030? Ombelewa yoMVA Fund alushe oye lipyakidila noku potokonona omaindilo ovafi noovamoni voiponga. Mokuuka momafiku a fimana opashiwana ovo tamu i momalweendo indeni mo mwe li longikidila omalweendo mu ha tokelwe nyee mu ha ete oiponga.

LEAVE A REPLY

Please enter your comment!
Please enter your name here