A wanifa eedula 53 moSwapo

0
215

Komutoolinghundana

OLUNDJINDA -Namibia opo a manguluke, ovanyasha ovaNamibia ovo vene va kufa etokolo lokumangulula oshilongo shavo. Edi, oda tumbulwa kuPaulus Shapaka omukalimo wOmoludjinda moshitopolwa shaMusati,ou fiyo onena e na okakalata kou kwashilyo woSWAPO e ka pelwe eshi a yandja ashike oifilinga itano [50c] ongo oifendela youkwashilyo momudo 1963.
Shapaka oo a ti, okakalata oko ena paife oka shangululwa eshi oshilongo sha manguluka, oku udite ounhwa kutya naye omukondjelimanguluko. Opo a joine oSWAPO okwa udifwako kouyelele oo a mona poyoongalele yomaudife ko fimbo a li omunailonga mOshomeva petameko leedula 1960.
Pefimbo olo ova li hava hepekwa komukolonyeki eshi va li tava longo kokontraka, tava xwama noku kwatwa komhepo yoku hola oshilongo opo veshi mangulule moupika.
Shapaka eshi a landa etuwa yee a xwama unene mopolitika okwa shakeneka ookaume vahapu mopolitika, va longela kumwe a tameke okupitifa ovakondjelimanguluko okudja koushimba fiyo keengaba daNamibia va ye moAngola.
Okwa holola kutya, ongudu yotete yovakondjelimanguluko a humbata motuwa yae ova dja kOshomeva, fiyo opOnamunama moshitukulwa shaHangwena petameko laDeseba,1977.
Osheendo shovanhu ve dule pomulongo omwa li omukwaita woSWAPO va dja naye kOshomeva a deulwa nale omikalo yo kulwa oita yoguerrila. Ta weda po kutya, nande ovanhu va li hava hadwa meebloka meendjila tava pulwa oumutwe kovakwaita vaSouth Africa, apeshe opo va pita Shapaka oye aeke a pulwa ombapila yokushinga. Omukwaita woSWAPO oye e mu pukulula ondjila iwa ya ukilila fiyo okOukwanyama. Nande sha li shidjuu kuye mokutukuka nongudu yaavo a findikila lwotete pOnamunama.
Shapaka okwa li a tokola a fiye po etuwa pOnamunama, ta kumaidwa komukwaita woSWAPO nokomukulupe mwene wokaumbo omo va yakulwa a shune kOshomeva .
Shapaka ota ti, okudja opo ina tuta vali oyeendo i dule itatu shaashi osho a ka lopotwa netuwa laye ola kala li shiivike tali kongwa keembulu mOwambo nomeedoolopa yaShomeva noGrootfontein kutya oha twala ovanyasha keengaba. Oilonga yokututa ovakondjeli ve manguluko ine i longa eedula dihapu, eshi 1978 a kwatelwa poSpieta moshitukukwa shaShikoto ta ningi oule womafiku ta dengwa a tulwa momalambo keembulu. Mokudja mo ina sholola nokwa twikila neyakulo nokulongela kumwe novakondjelimanguluko fiyo Namibia la manguluka 1990, 21 Maalisa. Shapaka okuudite owuumbo eshi e li mongudu yovakondjelimanguluko. Ota ti, ovakondjelimanguluko meni nokombada nava twikile noukumwe noshiwana nashi kwate nawa ombili ei tu na nena.

LEAVE A REPLY

Please enter your comment!
Please enter your name here