Aakalimo yomOmuthiya otaya nyenyeta elelo lyondoolopa

0
246
Yamwe yomaakalimo yOmomuthiya mboka yaa uvitile ombili elelo lyondoolopa yawo.

 

 

OMUTHIYA   –  Konima sho omathaneko ga li ga tulwa miilonga okuninga Omuthiya ondoolopa, yamwe yomaakalimo mboka yali moongamba dhondoolopa oya kuthwapo, opo ya yapukile eyokomeho lyoshilandopangelo oshipe shaShikoto.

Uuna aakwashigwana taya yapukile eyokomeho kehe lya longekidhwa ngaaka aluhe oye na okupewa oshimaliwa shoka shi thike pongushu ye hala ndyoka yo taya tembuka.

Aakalimo oya kala taya nyenyeta no yendji yomuyo  aanandoolopa ndjika oyali ya gongala oku uka pehulilo lyomwedhi gwayi taya gandja omanyenyeto, omolwa elelo lyondoolopa ndyoka ta yati olya nika uulingilingi.

Omupopiliko gokangundu haka kaakalimo yomondoolopa Moses Amukoto okwa ti elelo lyondoolopa ka lina ekwatathano naakalimo yalyo, noyendji sho ya tembudhwapo pomahala gawo mpoka pwa thaanekelwa  omahumokomeho gondoolopa, inaya pewa oshimaliwa shawo shoka yena okufutwa sho taya tembudhwapo.

Amukoto ta ti aawiliki yelelo lyondoolopa inaya kwatathana naantu mboka oshipala noshipala opo ando ya popye yo ya kundathane kutya ashihe shoka otashi longwamo ngiini.  “Inapu ningwa nande oonkundathana dhothaatha nomulandu ngoka hagu ithanwa National Land Compensation inagu gandja uuyelele kutse, aantu yamwe pethimbo ndika oya futwa owala kashona yo yamwe inaya pewa nando osha,” Amukoto ta ti.

Aakalimo ota ya nyenyeta elelo lyondoolopa taya ti oya hala opo li lundulule, onkalo ndjoka opo elandulathano li kalepo. “ Otwa lulilwa konkalo yelelo lyondoolopa yetu, otundji ohatu nanwa iimaliwa yomeya, niimaliwa yiiyagaya nonande pomagumbo getu ihapu kuthwa iiyagaya, otwa hala elelo lyondoolopa li ninge posha mbala oshoka otwa lulilwa, otwa kambadhala ethimbo ele nokukuga onkugo yetu ihe ihatu yamukulwa moshinima shika,” Taya popi ngaaka ya geya.

Amukoto okwa yelitha kutya otaya liwa  oshipungo , noya pumbwa opo ya popilwe. Ta ti oofuto dhaamboka ya tembudhwa po odhali dhina okukundathanwa manga inaaya pewa sha. “ Ondoolopa ndjika sho yeya inapu landulwa omilandu  ngaashi hashi ningwa opo tu uvathane tse tu tale kutya otatu ningi ngiini ngashingeyi otuna owala oondjuma ethimbo kehe nelelo lyondoolopa,” Amukoto ta gwedhapo.

Mayola gondoolopa yOmuthiya Toivo Nghilalulwa okwa ti ohaya tsakaneke omakemo gaakwashigwana aluhe, no taya longo ngaashi tashi vulika opo ya kandulepo omikundu ndhoka dhi lipo, yo taya humithakomeho ondoolopa yawo.

Nghilalulwa okwa ti otaya kala ya tula ayihe kolutenda yo ya kwashilipaleke kutya aakalimo yomondoolopa oye na ombili, noya nyanyukilwa elelo lyondoolopa ndjoka.

 

 

LEAVE A REPLY

Please enter your comment!
Please enter your name here