Eehango dopaife ota di tokeke unene ovanhu

0
1631

Ngaashi naanaa tu shishi kutya efimbo lAuguste fiyo oDesemba olo efimbo la talika ko onga efimbo leehango, Kundana okwa tala kutya eli olo efimbo liwa oku tya ko sha kombinga yeehango dopaife odo tadi fiye ovanhu unene tuu ovafuko meengunga odo dali tadi dulu oku keelelwa.

Eehango dopaife otadi fipi unene ovanhu ohonde shaashi omunhu ota fiwa meengunga domayovi omafele ye opo ngaho taka tunga eumbo.

Otashi kumwifa neenghono, omunhu tai kombaanga a ka lye eengunga doshimaliwa shifike nande opo N$500 000 ndee kashi shi kutya oshimaliwa eshi osha shike ndele osho kuuya ashike oku fuula ovanhu ovo tave ya kohango. Ohango eshi tai pu ovalihomboli vaKalunga opo tava kala opo nombili meumbo lipe tai tengauka shaashi ovanhu ove li moluhepo.

Ou eli nyaa elihanga oshinima ngaho shi lilile shaashi ope na omunhu umwe ta dulu okulongifa nande oshimaliwa sheemiliona mbali mohango yaye, ashike mondjato yaye ina mu fa mwadja sha. Ashike kovanhu vomwene, omunhu ngee oushi kutya oto ka ninga eedula da fika fiyo opo 15 to futu ashike oimaliwa yohango xwepo u kale nohango ili ashike nawa, ya longifwa oshimaliwa shifike apa to dulu, nye ta mu ka dika eumbo leni nombili, lihe na eengunga.

Vamwe ove li po tava ningi omafiyafanepo ashike ohombo kai na sha nokufiya fa napo.

Omunhu oto ningi ashike oshivilo shoye to hafifa ovanhu tava li tava nu, tava tameke nokuli oku tila shi omalodu noikulya kekuta, ashike mongula eshi tava ka hanga wa mona oixuna, una nande otuwa ya kufwa ko kombaanga ile wa landi fa po eumbo opo ufute eengunga dovanhu, ita ve ku wedele po nande osenda. Utya nee vaka denge eengodi, tava dengele ookaume kavo va popye tava yolo onghalo omo we li hanga.

Kakele keengunga, ounghumbi wopaife nao owa hanya. Omolwashike naanaa omunhu ena kufuta ounghumbi oshimaliwa sha fika fiyo opo N$10 000. Paife oto pula kaume koye eku pe oN$10 000 younghumbi, ye opo ngaho taka lefa ile a shinge otuwa yaye ta nwefa omahooli e uye kohango. Omunhu ngee ota longifa oshimaliwa ashishe osho, mbela owa teelela ngaho eku yambidide moshivilo shoye ile eku pe ngaho nande omaano?

Pamwe oshiwana shetu osha pumbwa oku tala koiwana ikwao nande opoushiinda ngaho po Zimbabwe, oko efimano lohango lihe fi okulya ashike oku kwafela ovalihomboli va tameke ohombo yavo nombili.

Ovanhu vetu ngeenge tava hombola oha tu kala omutumba hatu li kundu kutya mbela ohatu yambidida ngahelipi moshivilo. To hange omunhu a pewa eengobe 30 ile da konda po ndee eengobe adishe odo ota di tomwa po, ponhele yokudipaapo nande nhano ile nee omulongo ngee odihapu, ye omufuko a xupe po ngaho na dimwe, a kale ena eeheke doku ka tota oshuunda.

Oiwana ikwetu momitumba dayo deehango oha di kundafanwa kutya omufuko mbela eshi taka tota eumbo, oshike naana a pumbwa osho taka longifa meumbo laye.

Ovanhu keshe umwe oha popi nee kutya ye ota yandje oshikombo, winya ota lande ekuva, umwe ekatana, umwe efiya lokuteleka, umwe oiyaxa, mukwao eembiya, nosho tuu. Kwa ningilwa kutya ovalihomboli vape eshi tava ka tota eumbo, oinima oyo tava ka pumbwa petoto leumbo opo nale ili.

Ovalihomboli shili ohava fi oshisho oku palufa ovaenda vohango, ashike ha fulundudu.

Oinima ei yokutya kapena oxuxwa ita i tondoka nehandja mohango yoye hayo hai ningwa.

Nande omoiwana yovatilyane voo vahapu vomuvo ovakengeli, eehango davo oha di kala oshiyeleke.

Hano ovo tamu dilaadila oku hombola ile oku hombolwa, eehango ina di mu fiya meengunga, kotokeni –omaumbo nohombo opo ta i ya. Vo ovakwapata nava yambidide unene va tala konakwiiwa ashike hakoshivilo shefiku limwe.

 

LEAVE A REPLY

Please enter your comment!
Please enter your name here