NAMAs yomumvo 2017 ita yi kala moWINDHOEK

0
235
Gal Level ta imbi noku dhana poshiithanene sho NAMAs kuyele nuumvo poRamatex moVenduka.

WINDHOEK-Okangundu longekidhi koNAMAs oka tseyitha omasiku gapiti egalukilo lyoshiithanene shika koshilando shokomunkulofuta Swakopmund konima sho shika sha ningililwe moshilando shoka omimvo mbali dha piti.

Oshiithanene shegandjo lyomapapa nesimano kaahikingalo yaNamibia nuumvo osha li sha ningilwa moVenduka moka sha kala sha yuulukiwa uule womimvo mbali.

Omunashipundi pitithi gwokangundulongekidhi ka NAMAs, Tim Ekandjo, okwa ti otashi vulika oshiithanene shika shi ka longekidhwe moshilando shilwe molwashoka oshina unene ondilo okushi longekidhila moshinyanga sha Ramatex muuninginino waVenduka.

“Oto dhimbulukwa otse twa yumudhile po ehala lyopoRamatex 2012 nonando otwa li twa pewa uusama noombedhi okuza moshigwana.Otwa li twe egulula ehala ndyoka, twa longitha konyala oodola etata lyomilliona oku li opaleka noku li pangela nawa okuli ukililitha meni nokombanda opo tu vule oku ningilamo egandjo lyomasindano gaahikingalo uule womimvo mbali.  Konima yomimvo ndatu  ngashingeyi otatu futithwa konyala oodola omayovi gomathele N$350,000 okuningilamo ashike oshituthi shika  nonando tse otwa kwathela oku opaleka ehala ndika oshowo okuli humitha komeho ongo ehala moka oshigwana tashi vulu okuningila mo iinyangadhalwa oyindji ya yooloka. Oshikwawo sha simana ooshika kutya oshiithanene sha NAMA’S ohashi hili  aatali yoomiliona odhindji oshowo mboka hayeya okukala po moshinyanga shoka. Oshinyanga shika osha etele oshilando sha Venduka ompito okwi ilanditha shoshene kombinga yomayakulo ngoka sho hashi gandja. Oshowo osha kwatha okuhilila aatalelipo koVenduka. Ishewe pethimbo lyoshituthi shika moshilando ohamu ya aantu oyendji mboka taya talelepo omolwa oshiithanene shika yo mbaka ohaya longitha oshimaliwa oshindji okulanda iinima yawo oshowo omayakulo galwe ngoka taga etele oongeshefa dho moVenduka iiyemo.

Onkene omuntu owa li wa tegelela opo ewiliko lyoshilando li kwathele mokufutila ehala ndika omolwa uuwanawa mboka lyo lya mono okuza miiningwanima ayihe mbyoka ya tumbulwa metetekelo. Ihe omupya omunene oonguka kutya ewiliko lyoshilando ina li yalula iiyemo mbyoka ye etwa moshilando momumbwalangandjo molwa ashike sho aayenda mboka ye ya mo molwoshiithanene shika ya longitha iimaliwa yawo moshilando. Tse ohatu futithwa  molwokulongitha ehala ndyoka , onkene ngele ewiliko lyaVenduka itali tu kwatha moshinima shika nena tse otatu hogolola okuya kiilando yilwe mbyoka yu uvite nkene shi li sha simana oku tala kethano alihe lyokukala oshilando shoye osho sha gandja ehala mpoka tapa ningilwa omainyanyudho ngaka”  Ekandjo a ti.

Ondoolopa yaSwakopmund oya hala noku halelela opo mu yo mu ningilwe oshiithanene sho NAMAS ishewe . Momimvo mbali dha piti muni gwoshilando shika okwa gongelele oshimaliwa okufutila ehala moka mwa ningilwa oshiithanene shika , oshoka ewiliko ndyoka olyu uviteko  kutya uuna oshiithanene shoka sha ningilwa moka nena otashi ka etamo iimaliwa oyindji molupe lwaayenda mboka taya talelepo. Oya li ya tengeneke kutya oshiithanene shika osha etelemo oodola oomilliona dhi vule ntano.

 

LEAVE A REPLY

Please enter your comment!
Please enter your name here