Nambahu a thindikilwa kengathithi pomukunda gwawo

0
380

 

OSHIKULU – Omukiintu gwoomvula 28, ngoka ali a hahalwa nokudhipagwa momasiku 19 Aguste nuumvo okwali a pakwa etine lya piti okuziilila pegumbo lyaandjawo mOshikulu moshitopolwa shaShikoto.

Frieda Ndalila Nambahu okwa hahalwa nekatana iikando oyindji ku ngoka taku hololwa ya kala yena ekwatathano lyopaihole uule woomvula mbali, shino sha ningililwe pUusiingela molukanda lwa Orwetoveni mOtjiwarongo.

Nambahu okwa thindikilwa kengathithi lyaakwanezimo oshowo ookuume ke kegumbo lye lyaaluhe.  Ngoka ali a kala poshituthi dhimbuluko oshowo poshituthifumviko,Omunashipundi gwelelo lyondoolopa ya Otjozondjupa nokuli kansela gwOtjiwarongo Julius Neumbo okwa halele aakwanezimo omahekeleko omolwa ezepo lyanakusa.

Neumbo okwa ti otashi ehameke unene oku mona aakiintu taya si omolwa omadhipago ga ki nahenda, nomadhipago ogendji ngoka a ti otaga etithwa unene kuukodhi mboka wuli maalumentu , mboka peha lyokuya ulukila ohole otaye ya dhipaga nokuya ehameka.

Okwa kumagidha aalumentu ya hulithepo ombepo ndjoka yokudhipaga noku ehameka aakiintu yawo, yo naya kale ya hulithapo elongitho nayi lyiikolitha niingangamithi ndyono ta ti ethimbo limwe olyo hali etitha omuntu  aka longe iilonga inaayi opala moshigwana.

“Iimbuluma oyindji yomaludhi nga mbika ohayi etithwa unene komuntu eli kohi yiikolitha nenge yiingangamithi nopoompito dhimwe omuntu ngoka iha mono we shoka ta longo ngele oshili tuu mondjila,” Neumbo ta ti.

Josia Shimwefeleni gwoomvula 40 ngoka a dhipaga kuume ke   Frieda Ndalila Nambahu gwoomvula 28, okwali a holoka lwotango mompangu yaTjiwarongo nokwi i itaale kutya okwa tetagula kuume ke ngoka nomakatana no ita dhimbulukwa kutya okwemu tete iikando ingapi. Nonande ati okwemu ehameka unene komutse nopothingo.

Omulumentu nguka kali a pewa ompito yokwiifutilamo nokuli mondjedhililo a tegelelwa a ka holoke ishewe mompangu momasiku 15 Septemba nuumvo. Aantu mboka yali ya kala poshituthi fumviko oya hokolola Nambahu a kala omuholi gwaantu, ena ombili no heya ihumbatele sha faathana.

 

LEAVE A REPLY

Please enter your comment!
Please enter your name here