Ompumbwe yuupale mOngwediva

0
177
Uunona mboka wa tokola  okwi iningila okapale opo wu mone ehala lyokudhanena etanga lyokoompadhi mondoolopa.

 

ONGWEDIVA-Ongundu yuumati uushona oya li ya katuka onkatu opo yi ete po ehala mpoka taya vulu okudhanena oshoka elelo lyondoolopa yaNgwediva natango ina li eta po omahala gomaudhano gaandjuka.

Uumatyona mbuka owa li ta wu opaleke ehala lili moluhwa opo wu holole po okapale opo ya dhane etanga ya manguluka.

Kepulo kutya oshike she ya thiminike gumwe okwa ti olwindji oya kala noku dhana etanga momapandaanda naashoka omwaalu gwiiyenditho gwa ninga ogundji modoolopa, onkalamwenyo yawo ota ti oyi li moshiponga onkene ya tokola oku talaatala na oya li ya mono eha lili popepi nomalukalwa gaapolisi.

Uunona mbuka ota wu monika shili wuna ohokwe yomaudhano nando owu li ta wu dhana ku wowene na ka wu na omudheuli naashika ota shi ti onakuyiwa yoBrave Warriors oyi li momake omawaanawa.

Omupopiliko gwelelo lyaNgwediva Jackson Muma okwa li a uvaneke kutya elelo lyoNgwediva olina omathaneko kombinga ye tungo po lyomahala gomaudhano.

Muma okwa ti elelo oli na oopoloyeka dhomapendulepo moka mwa kwatelwa wo omahala gomaudhano nuupale mboka ta wu ka tungwa mondoolopa.

Omupopiliko gwOngwediva  ina totha mo kutya shika ota shi ka ningwa uunake ihe  Kundana okwa li a lesha odokumende ndjoka tayi tothamo omapendule po gondoolopa ndjoka tayi ulike kutya omapendulepo ngaka oga tengenekwa meni lyuule womimvo 20, onkene pamwe uunona mbuka owuna oku tegelela ko natango okathimbo  opo ondjodhi yokudhanena momahala omawanawa yi ninge yoshili.

Onkalo ndjika yomahala gokudhanena ina yi guma ashike Ongwediva ashike oya guma konyala oondoolopa adhihe moNooli yoshilongo, moka iitopolwa ayihe yili ya yama ashike kokapale kaShakati hoka ngashiingeyi keli monkalo ya nyayika.

 

LEAVE A REPLY

Please enter your comment!
Please enter your name here