Oondjokana odho oshinakugwanithwa

0
259

 

Uukashike ko okantu kawu shi oshinima shi iyakele meshito. Sho pe na aakiintu po pu na aalumentu, kali shi ando etumpakano lyontumba lya ningwa kOmushiti, ihe osho ompangela yowina ya pangelwa moombonge oonene dhOmushiti. Omushiti, nkee a za, ye osho ta kala aluhe, okwa hala pu kale pu na omulumentu po pu na omukiintu. Omolweutho ndika lyopashito, nopwaa na shoka tashi vulu oku li lundulula, otu na omulumentu nomukiintu haa hokanathana notatu popi nee oondjokana.

Oondjokana odho ehangano lyoonani mbali tadhi hili etemba lyonkalamwenyo hoka dhi ikutila, dhu uka kethikilo lyonkalamwenyo ndjoka. Ethikilo lyondjila kehe, nayi kale onde nenge ofupi, otali pula eidhidhimiko neigandjo, okweenda momasilu nomilondo. Kape na ondjila yaa na uudhigu nomashongo.

Momunduungilo gwondjila yomondjokana omu na iilambo niithindi, omaimbo niikati, oombuga nomakuti, omilonga nomafuta, uundandala nomavugu, uutalala  nuupyu, ondjala nenota, omitenya nomatokopya, oomwigo nomatavu, oombepo nomashikanyandi, oompote nookayone, oomvula dhomapoolela, omandangalati nomadhigoti.

Oondjokana odho onkalopamwe yekwatathano nekwathathano, osho wo etopolelathano lyomanyanyu nomaluhodhi gomonkalamwenyo, sigo omuukulupe womutoko, shi ka topole ombila.

Ondjokana oyo omutenge ihaagu tulwa, ongulu yaana omweelo gwokuza mo, oshihauto sha teka ongela yolivesa, okugandja pwaa na okutegelela oku galulilwa, okulongela pwaa na ofuto, okushongwa, okutyekwa, okututswa ku talike ngele omapepe goye oga kola okuhumbata omutenge gwoye waa gu hulithile ondjilakati nowaa gu ndwangule po gu teke.

Ondjokana oyo eiyoololelathano lyomukiintu nomulumentu, nuutsakaneno wafuulathani naananathani moka taa uvathana pokati kawo yaali, ihe omontseyo nomontaneho nonepitikilo lyaavali , ookuume, oonzapo negongalo.Tse , muuyuni wookuku , otwa adha oondjokana dhiiyuma hayi ende moontungwa hamapoto haga ende miipakete, guuka kokambashu mwa landelwa okambete komalyenge haga kudhile omukunda aguhe.

Mboka haa dhiladhila kutya ekalopo lyondjokana olyo oluvalo, oya kwata owala kewawa limwe lyoshili , oshoka oluvalo ohalu vulu okukala  lwaa po, ihe ondjokana opo yi li.Niishewe , ondjokana ohayi vulu okupitilila po, okuyonuuka nokuteka, ngele oya kwatwa okahetengi, ihe ngele oya adhika yi na nale oluvalo lwo opo talu kala, ano aanona omagano ashike gomondjokana nongele nee nani inamu ga pewa, ondjokana yeni nayi tsikile.

Omulumentu ota vulu okukala naakiintu oyendji, nomukiintu oha vulu okukala gwaalumentu oyendji, ashike onkalo ya tya ngeyi ,oyi na omikundu nomikohongo odhindji dhi vule dhomakatalume nomagoya nga ge na uukulukadhi nuusaane ookamwe. Onkalo yokwaaha gwanenwa nokwaakutila omutunda gumwe ohayi etele ondjokana oohandiilili, okukoka oondjandjo nomahundju, osho wo  hayi eta oondjamba dha hihwa.Okwa tya tuu , sho ita shi tsu kumwe nomahupilo gonkalamwenyo yopashinanena, ngoka ge li po taga yi okahetenge. Ohaku tiwa ondjokana oyayaali, nomutitatu ote yi yono, ihe ngame ohandi ti  “ondjokana oyayatatu, aahokanathani yaali , naKalunga kawo, nomutine oye nee te yi yono”

Onkalamwenyo yoludhi nduno , lwohole yina kaali, otayi kondjitha wo omalalakano gokwaadha uukolele waayehe, pandungethaneko yokomumvo 2030, ndjoka tayi lalakanenwa, notayi lamananenwa kuuyuni auhe. Ngele opu na  “Munyalombe megumbo, po pu na ishewe” Memetotende pondje yegumbo, nena kapu na uuthike pamwe mpoka[shaashi aakiintu yoye yaali, omulumentu gwamukweni gumwe].

Nonande iiyuma yi li pamwe ihayi pu okupumathana, shaashi oondjokana kadhi shi oparadisa, dho kadhi shi okuyoga mondama yomagadhi goonyushi, po kapu na oparadisa yaa na eyoka, lyo  netango haaluhe tali mu shile tali imemeha,dhimbulukweni kutya okwiidhenga kwaanandjokana okwa fa owa okwiilya kweyoka. Nonande okwa tegelelwa aahokanathani ya kale ye thike pamwe, ka pe na ngu ta tegelele aahokanathani ya kale ye thike pamwe moonkondo nomoonkama , shaashi yo omulumentu nomukiintu, onkee aalumentu aashona lela haa dhengwa kaakiintu. Omunyoli gwomamboTk A.L. Nghifikwa okwa popile oshili sho a tile “Kape na evaya li dule omulumenhu ha denge omukulukadi waye’ ye Lukas Shawana okwa tile wo: “Omulumentu kehe ha nyengwa konkalo ,e  ta dhenge[dhipaga] omukiintu, ngoka keshi omulumentu-lumentu, shila omulumentu tuu owala shaashi “omulumentu’Ohashi mu holola owala kutya shila okwa tila aalumentu aakwawo , nokwa dhina oveta yoshilongo.

Molwaashoka ka pen a ondjokana yaa na ‘ omushigakano’  gwayo, omishigakano adhihe dhomoondjokana dhomamanya nenge dhiiti, odhi na okuhumbatwa neidhidhimiko, sigo eso tali topola. Tashi ti: ondjokana nuukwatya wayo auhe eidhidhimiko neuvathano oyo yi na oku kala aapangeli yeni. Ngaashi ndati, mondjokana kamu na olivesa, omolwaasho ohaku tiwa oya teka, ngele gumwe gwomaahokanathani okwiipweya mo, kutya nee onetompelo lini.

LEAVE A REPLY

Please enter your comment!
Please enter your name here