Ovandola otava dimbulukwa omapendafule

0
186

ENDOLA – Ovakwashiwana moshikandjohoololo Endola, otava ka tula eengala keembila domapendafule a pakwa moshikandjohoololo shaNdola Olomakya ei. Etokolo eli ola kufwa shaashi eekomanda dotete da komanda iota pOmugulu gOmbashe momafiku 26 Aguste 1966 oda fikilile mooEliaser Tuhadeleni (Kaxumba kaNdola) pOmanyoshe moshikandjohoololo Endola. Ouyelele owa yaandjwa kukansela woshikandjohoololo shaNdola Fredinard Shifidi koshifo eshi.

Omapendafule Eliaser Tuhadeleni (kaxumba kaNdola) a xulifa 1994 okwa pakwa  pEndola, Beata Haishinda, Priskila Tuhadeleni omukulukadi waKaxumba kaNdola naye  a li koRoben Island a xulifa 2005. Meembila edi omwa kwatelwa noyaMukwaanyoka waNoongo meme waKaxumba kaNdola, Festus Heita nomukondjelimanguluko Augustus Shifidi a xulifila kOkavango.

Kansela Shifidi okwa yelifa kutya, edimbuluko eli ota li kwatele mo noiningwanima ikwao ya ningilwa pondje yoshikandjohoololo shaNdola, etulongala kombila yomufita Teofilus Hamutumbangela kOnekwaya yokouninginino ou ombila yaye ya tulwa emanya koSwapo meedula da dja ko. Moshikandjohoololo shaNdola omo yoo mu na eendo lovakondjelimanguluko 19 va pakwa pOndeshifiilwa vamwe va dipaelwa pOkahenge mefiku lotete netivali lApiilili 1989 eshi okatokolifo 435 ka ya nale moilonga.

Kansela Shifidi ta fatulula kutya, nande edimbuluko lefiku lomapendafule la li Aguste 26, omolwa oinakuwanifwa yonhumba ovaNdola otava ka tula eengala keembilila domapendafule avo muSepteba nokuhokolola ondjokonona yoshikandjohoololo. Osho oshikando shotete oshiwana moshikandjohoololo mEndola tashi ongala pomwandi waShifande nokuka tula  eengala pamukalo da longekidwa keembila domapendafule a pakwa moshikandjohooolo.

Shifidi ta weda ko kutya, oshivilo osha longikidwa owina okuyelifila ovanyasha koilonga ipondola ya longwa kovakwaita vahamano va dile koTanganyika (Tanzania) 1965 nokufikila mooKaxumba kaNdola mOmanyoshe 1966. Ovakwaita ava ove ya pefimbo lidjuu okuudifa ko oshiwana  , shaashi omaumbo manini lela a dula kwiidilila ovakondjelimanguluko va udifa ko oshiwana pefimbo letameko lekondjo.

Kakele kokuhokolola ondjokonona, omhito ei okutwa omukumo oshiwana nokuyelifila omapipi okomongula nghee okangudu komaumbo maniingholi moshikandjohoololo shaNdola keliyambela eyakulo lovakwaita votete ngee okuva pa oikulya nokuva nangeka. Nokonima yolwoodi lotete kOmugulugwombashe Aguste 26,1966 ovakali momaumbo aeshe hamu popilwa edimba loSwapo, ova ka ningilwa omaushada, omahepeko, va dengwa nokutwalwa kErudu nomatuwa ( kOshakati) vamwe va ka xulila koRoben Island nomaumbo amwe a xwikwa po konima eshi Oshikango sha tomekwa. Nande edimbuluko lefiku Aguste 26, ola pita, kansela Shifidi okwa dimbulukifa oshiwana moshikandjohoololo, moshitukulwa nokeembiga daNamibia kutya, ondjokonona yekondjo laNamibia itai pu ku shangwa mefimbo lixupi.

LEAVE A REPLY

Please enter your comment!
Please enter your name here