TUYENI KOLUPALE LA TUYENI: Ombili nayo ohaimbilinga ovanhu

0
331

Ovawambo oha vati, ekuta ohali mbilinga ovanhu osheshi vati ngeenge owa hange omunhu eli opo ndele okukwetiwe kondjala, ile oluhepo oto hange ashike a ngungumana ye ota monika ena nomikalo diwa molwaashi eshi shi mu kwete onakaidi kahalwenya yoovene.

Ndele konima yefimbo omunhu oyee tu ou ngeenge owe mu kufa oluhepo ilo ondjala, oto hange andjanga ndele no koshipala shaye otashi monika shina ehafo. Ashike ekuta eli nombili yokomwenyo efimbo limwe ohali pitilile ndele na nakufya kwali ondjala tadimbwa nokuli kutya okwaenda eendjila dili ngaipi, ilo efimbo limwe eku tanaukilepo nokuli.

Ounona voye ngeenge veli meumbo ndele ove kwetelwemo kondjala oto hange naanaa valeela vo noxo ovakanifa ombili yokeemwenyo omolwa ondjala tuu oyo, ashike ngeenge owe vape oikulya konima yefimbo oto hange vanyakukwa vo otava monika koipala yavo vena ombili, vo otava tameke ne noku danauka oudano ou tau dulu oku kuningila ondwi nokuli eshi tava danauka, molwaashi otava mbilingwa kekuta ndele nokehafo eli li vakwete.

Omunailonga ngeenge takongo oilonga efimbo teya koshipala shomuyandji woilonga, oha monika omunhu woshili ndele nondaka taidi mokanya kaye oitalala, omolwashike mbela ngaho? Osheshi okuna ondjala ndele noluhepo eli limukwete limuli komutima, ashike lwanima ngeenge omukongi woilonga ou okwa ningi efimbo poilonga opo, oto ka hanga ihaa wanifapo vali oilonga yovanhu yomuyandji woilonga opo, ilo efimbo limwe a tameke tav ake nokuli oinima yomuyandji woilonga, ilo te mu nyamukula omalaka ahonga, ei oyo ne ombili nekuta la tameka oku mu mbilinga ngaho.

Natango ngeenge wa hange omulumenhu ta kongo omukainhu a hala nande okuhombola, efimbo teya okuhola omukainhu oo, oha monika ena ohole ya shili yokomwenyo noku lininipika kwa mememe, ilo efimbo limwe u hange tadi nande omahodi momesho ngeenge otaanywa komukainhu ou, omolwa ondjala yae noluhepo eli li mu kwete lokukala a hala okuhombola, ashike omulumenhu oye tuu ou ngeenge owe ke mu hanga konima yefimbo mohombo a ninga mo nande eedula mbali, oto ka hanga ta mbilingwa kekuta lohole nombili ei a menekela muyo.

Imwe yomoinima ei haikala tai mbilinga omulumenhu oye tuu ou mohole, okumona omwalikadi waye mboli mwii afa oshilikama, okukala novakainhu vamwe vawedwapo pondje yeumbo laye nokumona omwalikadi waye oye tu ou ihelikosho vali nawa, ilo efimbo limwe a tye nokuli omwalikadi ou eenghama daye mondjuuo oda nghudipala paife, ombili nohole otai mbilinga ngaho omulumenhu ou.

Hanga ne omwalikadi eli poima a hala okuhombolwa po, ngeenge puye opeya omulumenhu ta popi naye oihole, oshili omukainhu ou oha monika omukainhu washili, ye ota monika ena ohole yashili komutima, ilo efimbo limwe manga tava popi nomulumenhu ou a tameke tax ukula omahodi momesho aye itaapolo nande ye itelifeta nande pomesho, oshike ne tashi ningifa omukainhu ou oinima aishe oyo ngaho? Osheshi okuna oluhepo lohole nohombo ye a hala a ka kale ena ombili meumbo laye.

Hanga ne omwalikadi ou mohombo yaye a ninga mo nande eedula 4, paife okwa ninga omutumbi woinyenhu molwaashi vati ihalifwa omate, ngeenge owahange ne tanyamukula omushamane waye omakambilaka, oto hala kutya shapo omunhu tatula mo ongela ya mbakumbaku,ondjebo yomushamane waye vati paife ihaidi vali oikuti tai yashe moshili taka wile pedu, edi ohadidi mokanya komwalikadi ou ndele novashiinda pamwe neeferende okwe va lombwela ngaho, omushamane keshi vali omushamane, ndele okwa ninga oshishamane ngaashi naana oshilikama, ota mbilingwa ngaho.

Paife okwa monapo noundjila vawa voku kakala novashamane vamwe eefika momilaulu, ngeenge ota popi ota ti, John ya Tuyeni, ohonda yange ikulu oo, ku shi ne eshi ina hombolwapo ku John ya Tuyeni, omwalikadi ou ngaho otashi ti okwa tameka ne okumbilingwa kombili nohole nomohombo omu ewete a menekela efimbo lile unene ngaho.

Naave efimbo opo wa tameke oilonga mombelewa yeni omo, okwa li ho monika una ombili nehafo la matutu moipafi yovanambelewa vakweni, oove tete kwali hopopifa ovanambelewa vakweni moilonga omo, vamwe okwali hovaufana valye nomokambaki koye aka hodi nako keumbo leni nokuli, ove noxo ka kwali ho dimbuka o5h00 inai denga, nale manga 08h00 komutwe ove owafika nale pombelewa yeni, oshike vati kwali hashi ku ningifa ngaha?

Osheshi poilonga opo oweyapo ukwetiwe kondjala yomedimo ndele noluhepo lili komutima woye, ashike paife eshi hatupopi ngaha, ovanailonga pamwe naave aveshe ovaninga oinhu yokoilonga yeni ye kululila, hano ngaho otashi ti oto mbilingwa kombili nehafo nondjala ei yadjapo pwoove molwaashi ouwete wamenekela unene una ombili, ombili nayo ohaimbilinga ngaho.

efimbo linya opo mwamonafana novashiinda sheni, okwa li hamu monika muna ombili novashiinda sheni nohole yoshili yokukala pamwe novanamwenyo vakweni, efimbo linya lonale okaima ngeenge otaka liwa meumbo loye nena namushiinda shoye okwali hekali, mwatela neemhuku melimba oto ti dimwe ounona nava twale kumu shiinda shoye, ngeenge otodipo okwali holombwele mushiinda shoye atalepo peumbo loye, oshike ne kwali hashi kuningifa ngaha? Osheshi okwali una ondjala yokukala nombili novashiinda shoye nohole yashili, ndele omolwashike paife ngeenge to pondwa oufiku ohoti vali oto pondwa ku mushiinda shoye? Ngaho otashi ti otamu mbilingwa kombili ne.

Hano paife eshi mu wete ihamu popi vali novashiinda shoye nye ihamu kwatafana vali, amushe ngaho omwatameka okumbilingwa kombili ngaho molwaashi omwaninga efimbo muna ombili nehafo, ombili nayo osho hai mbilinga ngaho molwaashi omweikuta.

Va Namibia, ava mwakoneka nawa, manga ashike oshilongo inaashi manguluka, oshiwana okwali tashi monika shanyika omaluhodi keemwenyo, osheshi kapena omuhoko inau kanena mekondjelo manguluko, kutya ne okwafya nomukalo uli ngaipi oita osho ashike ili ngaho kwali, ohaili oo haita.

Okwa li ne tu kwetiwe koshike ngaho? Oshili atusheni okwali tu kwetiwe kondjala noluhepo lokumona Namibia la manguluka lina ombili, ohaluka nge pafimo leisho Namibia la manguluka la mona ombili nonande twa kanifa ovamwameme moita paife otwa mona ombili, molwaashi neePresidede detu adishe edi hadii koshipudi odina ombili, paife ova Namibia vamwe ova tameka ne oku mbilingwa kombili, molwashike mbela? Shaashi moshilongo omuyadi unene ombili yo oya menekelamo ngoo nee.

Pwilikina nee eshi ovanhu tava mbilingwa kombili, ngeenge okadjuo kaye kashitopa ye oye a xwelako omapakete, vati epangelo nali talepo nawa utale, ndele nohelela yomepya lambulavo ye vanyenga oku helela molwaashi ohavapiti tavai keekamba eengula, vati hano epangelo otali ningi shike vakwe? Mhh otava mbilingwa kombili shili, okwa nangala ashike eli meumbo lambulavo itaka konga oilonga ye ota ti, oiminista otaili ashike oimaliwa, mbela vemweetele ne hewa apa tavakufa.

Epangelo paife kumwe novaleli otava tuwa noitenda ipyu koshitako ne, ndele no teileta papila yapwamo meumbo lambulavo ye oye eimanamo, epangelo otali ningi shike hano? Ombili oiwa ashike ngeenge oya menekele ohaimbilinga ovanhu, oita eshi yali moshilongo omu, oyalya ashike ovanhu ndele inailya eendjembo nande, ngeenge oya holoka vali moshilongo otamu idulu tuu? Eshi mwa tameka okutwa epangelo leni meisho manga lakofapo ngaho, ndishi kamu hole omunhu a kofa ndele toono ndishi? Otamu katya okwa fyapo manga.

Oilongo ihapu imwe yomu Africa, oina omapangelo oukanyamukulwa ashike ngeenge owa ka ninga omakonakono koilongo oko to yelekanifa noilongo ei youdemokoli, efimbo limwe enyamukulo loye otalikaninga kutya mboli, oudemokoli ngeenge uli moshilongo mboli otashi ti ondiipangela, keshe umwe eli moshilongo ta ningi eshi a hala ngeenge epangelo ola popiko ye ta ti ame ohandi longifa oufemba wange, natango osho otashi ti ombili taimbilinga ovanhu molwaashi oya ninga ihapu moshilongo.

Efimbo limwe ngeenge ovakomesho vetu ilo ovaleli tava lombwele oshiwana kutya ovanhu nava kendambale vakwatelepo ombili moshilongo, she vamwe vo mushe ohatu mono shafa oudano womadu taudanaukwa kovakomesho, heeno oshili otuna okutya oveli ashike komesho tavali nawa, ashike naame ngeenge owa tulange koshipundi otashi pulange ashike odula imwe andi longele oshiwana oilonga iwa ilo yafimana, nokonima yefimbo yo ombili otai tameke tai mbilinga nge ngaho molwaashi onda kuta, ndele naave ngeenge owa tulwako osho to ka ninga naana ngaashi ame ngaho.

Va Namibia, natu fikameni tu kwatelepo ombili yomoshilongo shetu, na tu taleni poilongo yopoushiinda nghe ombili yavo tai pamadalwa nokukongwa noudjuu, vamwe nokuli otavadiko tava mbombolokele ku  Namibia molwaashi oveudite kutya oko kuna ombili iyadi oshilongo ndele nepangelo lamo oto dulu okuninga eshi wa hala nongeenge ole ku popi ove toil shunako ndele tali pate omulungu walo.

Efimbo limwe okulya nawa oku hatu popile ovaleli inamu kwatelwa oumbudi, moilongo aishe kapena oshilongo muhena ovakomesho veshi kwete nawa ilo tutye tavali nawa molwaashi ovo veli komesho, po noxo keshe oshilongo oshina kukala shina ovayamba ndele sho oshina okukala vali shina eehepele, osho shimwe twa pumbwa okulilonga osho ngaho.

Namibia oshilongo shina ombili, nefimbo limwe nokuli ohandi hale kutya napamwe osho shi li ponomola yotete moilongo ya Africa, oshiholelwa shakula otwa wana okukala hatutale kee Presidente detu adishe odo da lyata koshipundi shokupangela, ngeenge tave lipe oipundi oto hale okutya ovanhu mbela tave lipe oumbishikiti taliko ye tapeko vali mukwao a lyeko, okushiyeleka ne noilongo imwe ngeenge tai ningi omahoololo omupresidente ndele ohapa tikile vali nohonde yoshiwana, oshili opena eeyooloko lakula onghee ne inatu pumbwa tu mbilingwe kombili yomoshilongo shetu.

JOHN YA TUYENI
MRTUYENI76@GMAILA
CELL 0812988549

LEAVE A REPLY

Please enter your comment!
Please enter your name here