Aayaki yiikwakuti yane ya kwatwa ishewe

0
299
Aayaki yiikwakuti yane ya kwatwa ishewe

Ongwediva

Opolisi oye shi pondola ishewe molugodhi lwayo okukondjitha aafuthi yiiyamakuti sho ya kwatapo aafekelwa yane popepi nEtosha.

Aafekelwa mboka ya holoka nale mOmpangu yaMangestalata gwa Shomeya oshiwike shika oyo omunamimvo 39 Tjovihuro Ndiyaombe, omunamimvo 32 Kavetjikuru Tjuumbua nomunamimvo 21 Tjiuana Ngavepue. Aafekelwa yatatu ayehe oya za koshitopolwa sha Kunene.

Omuhingi gwotaxi ngoka mosheenditho she omo mwa ende aafekelwa mbaka okwa tesyithwa oye Frans Ngolangola a za kOshakati na ye wo okwa kwatwa.

Omufekelwa omutitano ngoka eshi wike ashike nedhina Kalyangombe a za koshitopolwa sha Kunene natango ota kongwa kopolisi.Okwa itaalwa kutya nguka okwa homata ondjembo. Ekwato lyaambaka yane olyo etitatu li na sha  neyako lyiiyamakuti mEtosha  okuza petameko lyoshiwike shika.

Pahapu dhomupopiliko gwopolisi moshitopolwa Oshana, Warrant Officer Tomas Aiyambo, aafekelwa oya li yakwatwa Osoondaha lwopotundi onti 00h00 popepi  nehala hali ithanwa Lieu Drink konima sho omunafaalama a lopotele aapolisi kutya opena omainyengo taga limbilike  mEtosha.

Okwa itaalwa kutya aafekelwa oya li ya dhimbwa po ondjembo yawo no ya li ye na okushuna mo opo ye ke yi tale mpoka ye yi thigi.Omainyengo ngaka gawo ogo ga pendutha omaipulo momunafaalama ngoka a tseyithile opolisi.

Sho ya adhika kopolisi etaya pulwa oya hempulula kutya, yo oya pewa iilonga komulumentu gumwe gomOshakati oku ka konga ompanda opo ye mu faalele omayego gayo. Omuhingi gwotaxi naye anuwa okwa li a tumwa komulumentu oye tuu ngoka a li hehela ekwatho lyaamboka yatatu.

Sho ya kwatwa kopolisi oya adhika ye na ondjembo yepakolwa nenge 303, noshipakete shiikuti yondjembeo ndjoka. Oya adhika wo yena oondooha dhiikulya, uumpunda woshithima hashi liwa inaashi telekwa osho wo oomboloto.

“Omuntu oto mono lela kutya mbaka oya li yi ilongekidha lela oku kala mEtosha ethimbo ele.” Aiyambo a ti.

Okwa indile aanafaalama oshowo iilyo yoshigwana momudhingoloko opo ya lopote  omainyengo kehe taga limbilike popepi nEtosha  kopolisi.Naamboka ya hala okuyakelako opolisi otaya vulu okudhengela Aiyambo kongodhi ndjika 081-281-9906 nenge Kommanda gwopolisi mOshana Kommissiona Rauha Amwele kongodhi 081-1241172.

 

 

poachers2

LEAVE A REPLY

Please enter your comment!
Please enter your name here