The Dogg e ya vali mOshakati

0
245

OSHAKATI – Natango ovanyasha vahapu ova shakena poikonga yomaudife ko ya “The Dogg” kombinga yekengho eshi ye ta talele po vali oitukulwa Zambezi, Oshana, Erongo naKhomas.

Oitukulwa ei, oya yoololwa mo kepangelo molwa ouhapu wovakalimo ovo tava lumbu nombuto yoHIV/AIDS.

Omushikingalo ou okwa popya na Kundana pefimbo a li eli pyakidila noku shakeneka eengudu dovanyasha peenhele da yooloka fiyo opexulilo lohani yadjako.

“The Dogg”omunedina moshimhungu shomusiki, okwa hoololwa owina kOshikondo shOnghalonawa noundjolowele a nwefe mo ongudu yovalumenhu omayovi 34, va teelelwa va kale va kenghwa okufika muKotoba  2017. Oshikondo shoundjolowele osha hala mefiku keshe ngeno ku kale kwa kenghwa ovalumenhu 70.

Okwa koleka kutya, peenhele keshe opo a ninga omalihafifo noku udifa ko oshiwana omwaalu owa hapupala vali neenghono shi dulife pehovelo. Havalumenhu aveke ndee nookaume kavo ova ulika ehalo neyambidido.

Nande oshikonga shekengho shopashiwana sha tamekwa moitukulwa aishe 14 yoshilongo, epangelo ola tofa mo oitukulwa omo mu na omwaalu u li pombada wovanhu va kwatwa kombuto yoHIV/AIDS. Omushikingalo okwa tumwa a udife ko ovanyasha ovalumenhu inaava kenghwa natango okutameka koshitukulwa shaZambezi, tashi ya moshitukulwa shaShana, oshivike shotete sha Juli 2016, nokuya koshitukulwa Erongo.

“The Dogg” okwa  yelifa kutya, epangelo ola kufa mo oitukulwa ei shaashi omo muyadi omivalu yovakwatwa kombuto yoHIV/AIDS ve li peedula dounyasha onghee, ola longikida oshikonga shopashiwana okukengha ovalumenhu ve li pokati keedula 15-49 va pwe mefimbo manga inatu fika pefimbo la ufwa. Ekonaakono la ningwa moKenya,Uganda naSouth Africa ola koleka kutya, ovalumenhu va kenghwa ova amenwa shi fike 60% kokukwatwa koHIV/AIDS.

Omaupyakadi a dididilikwa taa endifa kanini omwaalu wovapititanda moitukulwa imwe, amwe  oinano ile, ovanambelewa inaava wana moshikondo shouhaku. Ouyelele wa pitila momapekaapeko oshikondo shoundjolowele owa yelifa kutya, omulumenhu a kenghwa okwa amenwa shi fike 60% kokukwatwa komikifi hadi pitile momilele  okandongo noshinena. Ookaume kaavo va kenghwa navo yo ova amenwa kokankera yokoshivelo shoshidalelo.

The Dogg, okwa shiva ovo inava tokola natango ve uye va yakulwe oshita pamwe naye eshi te ya okupitila etanda owina moshipangelo shaShakati petameko laKotoba neudo. Okwa kumika oshiwana, ookaume kaavo inaava kenghwa, ovadali novafilishisho va yambidide eenghendabala depangelo, opo tu kale noshiwana shina oukolelele. Ovo inaava yakulwa eyakulo eli inava tila shaashi ohava fifwa manga inaava kenghwa. Konima yeyakulo ohava pewa omuti wokupoleka ouyahame nokonima yoivike ihamano omuyakulwa okwa veluka.

 

LEAVE A REPLY

Please enter your comment!
Please enter your name here