Ehangano lyaahikingalo lya dhikwa

0
282
Arrafath, Antonio na Glo, aatotipo yehangano ndyoka lyo My Ongoma Media pethimbo taye li tseyitha pobar ya Tornado Osoondaha yapiti moVenduka.

Windhoek

Osha li onkundana ombwaanawa unene kaahikingalo aakiintu yomoshilongo sho ehangano ndyoka epe lyokukwatela po ekwatathano pokati kaahikingalo  nomahangano omanene moshilongo lyedhina My Ongoma Media lya tseyithwa Osoondaha yaziko.

Ehangano ndika epe opo lya dhikwa po kaanenentu ngele tashiya moongalo dha Namibia, ngaashi Antonio ngoka ena ehangano lyo Antonios’s Art, pamwe naaningi yomikwelengendjo yedhina Arrafath Muhure na Glo.

Oonkulungu ndhika moongalo otadhi ka longitha ihe uunongo wadho opo dhi ka kale dha humitha komeho iitalenti yaahikingalo aaNamibia.

Petseyitho lyehangano ndika, Antonio okwa popi ta ti aahikingalo mboka kaayena iiyemo otaya mono iihuna, nomahangano iha ga vulu okuya kwathela oshoka oyeli oyo ayeke, noya pumbwa ehangano enene ndyoka lina okuya popilako.

Nonando ehangano ndika (My Ongoma Media) olya li lya totwapo ashike oomwedhi hamano dha piti, Antonio okwa tseyithile iikundaneki kutya, yo oya tameka nale nopoloyeka yawo yotango, niinima ayihe otayi ka ende nawa.

Moku kuthilako kashona oshigwana kombinga yopoloyeka yawo, Antonio okwa tseyitha nale kutya oya kwatathana nehangano ndyoka lyokuninga oombiila lyo Namibia Breweries Limited (NBL), ndyoka tali keya kwathela noompumbwe adhihe nokuli okuza koshimaliwa, omalongekitho agehe giituthi yoku imba, nosho tuu.

Oku ziilila ko My Ongoma Media, oya ninga po nale okangalo kamwe hoka kedhina Don’t Give Up, ka shangwa kaahikingalo aakiintu ngaashi Ann Singer, Adora, Promise naMonique English.

Antonio okwa gwedha po ta ti paife oyeli metifa okuninga oalubuma yotango ndjoka yina ehwata lyoongalo 10. Ehangano ndika otali ka kwathela ashike aahikingalo aakiintu oshoka oyo ye shi okulongwaa nayo nuupu.

 

 

LEAVE A REPLY

Please enter your comment!
Please enter your name here