Oondjokana omuti gwokupanga ohole

0
1104
Lukas Shawana

Ondjokana oya fa omuti gwokupanga omaiuvo gomulumentu nomukiintu, ngele taa ehama uuvu wohole. ‘Epango lyomikithi adhihe monkalo yomuntu olyo ohole. Muyo, omayono agehe oga siikilwa noga dhimbiwa. Omuyo mwa holama omasiloshimpwiyu agehe muudhigu nomomatokopya gomonkalamwenyo. Oyo esimano eyapuki, ndyoka hali pepaleke, nohali nengeke okapambu kehe monkalamwenyo ye. Komulumentu nomukiintu, ohole ohayi ya poolele nokuya wayulila omatha nelama lyokulonga iikumithalonga tayi ya nyanyudha ayehe yaali ngele, ye shi yuulukwa!

Ondjokana otatu vulu okuyi tala kutya oyo okwiitaala noku yamukula omapulo ngoka taga pulwa komalutu getu. Omukiintu nomulumentu oya shitwa ye na omaiuvito-halo, gokuhalathana, nomaiuvo haga si ondjala, ngoka haga adhika wo nomiinamwenyo. Nonande iinamwenyo ihayi vulu okupangela omahalo gayo, eidhidhimiko lyomuntu olyo hali mu kwatha okuga kondolola nokuga vulikitha, opo pokati ke niinamwenyo pu kale eyooloko li iwetikile. Onkee omahalo ngaka, ohaye ga vulikitha, nohaye ga tegelelitha sigo omondjokana. Tashi ti: ohapu kongwa omuntu gumwe awike ngoka oye wike ta yoololelwa omaiuvito-halo ngaka guukashike-ko-okantu, opo kaa ninge owala ‘ogwakehe’ nomomusimba-nomomwali, nomomuntu a val’epaha omo hayi. Onkee ondjokana oyo omugameni gweni kevundakano lyopaipala, notayi mu popile mwaa kwatwe uupika komahalo geni.

Shitiwa, yamwandje, ndishi omwa koneke ngaa kutya  pethimbo ndino oku na omutondi omunene gwaantu, HIV/AIDS, ndjono yi  na osheenditho shayo oshiwanawa, iipala?

Ondjokana oyo ayike ohote yetu, moka tatu holama HIV/AIDS. Ohaku tiwa: Opo waa kwatwe koHIV/AIDS, kala ashike nomuntu gumwe ngoka wi ineekela, nowu shi shi nawa kutya ke na HIV, ombuto ndjoka hayi taandelitha oAIDS. Ando onda li nda pula kutya okukala nomuntu gumwe otashi ti ngiini ando otandi yamukula noshitya shimwe kutya “Hokanathaneni’ Kuku gwonale okwa tile; “Hokaneni, ngolongo namu mitike”. Ye ta ti ishewe; “A hokanwa omushona e vule ondjamba ya za ela”.

Gwonale okwa tile; “Kuume koye oye kuume kamukweni”. Ye oye ngaa a tile: “Mombago yamukweni omo hamu nuwa”. Omuntu inaamu hokanathana naye, ne inaamu ganenathana montaneho, okwa fa owala ohi we yi kwatela momeya noonyala. Shaa wi inyenge, nenge yo yi inyenge, ye ku hunuka. Osho nomuntu mwa otekathana, keshi gwoye! Sho ngaa to zipo, po otapu ya mukweni.

Ompango yomondjoka oyo ohole, yo oyo hayi mangele aahokanathani kumwe. Ashike shaashi ohole yopantu ohayi vulu okuhuhwa, okweehama nokusa nokuli, ohayi pumbwa okuyaminwa ndjoka yopakriste. Onda hala okutya; okukala mu holathane ongaantu, ndele omu holathane wo ongaakriste, otashi kaleke po ondjokana yeni, “nande nayo ihayi koko ngaa yaa na ombudhi”

Ope na aantu yamwe haa mono uutemo wayakwawo hawu longo nawa, ye wete oondjokana dha yakwawo, tadhi thenunuka owala nawa, dhi vule dhawo. Aantu ayehe oye li owala mekondjo, mo omo ya kala, nande mona ya kulupila pamwe.

Shoka shayela osho owala shoka kutya, omikundu odhi li moondjokana adhihe. Mo 1986, onda popile etumbulo limwe, ndyoka ngaashingeyi lya holelwa koyendji, sho nda tile: Ando okwa li uudhigu hawu tsina wa fa olwithi, ando shaa wa tala kuwayakweni, oto mono kutya owu vule woye. Oshinima oshinene nosha simana osho eidhidhimiko, edhiminathanopo netaambathano.  

 Mondjokana yeni wo namu kale mu na oshipundi shedhiminathanopo, oshoka olyo oshipatululo shokuya mesindano lyomondjokana. Eidhidhimiko olyo ekumba lyokupatela uuwinayi awuhe pondje yondjokana.

Yamwandje, ne kamu shi aayengeli, opo ando mwaa ninge omapuko. Ashike okwa tya tuu, ne 1. Aantu, mboka haa idhidhimike nohaa tala onteni, ne ishewe 2. Aakriste mboka ya nwethwa mo ohole yopauKalunga , no haa dhimine po.

 Onkene otandi mu indile nokumu kunkilila, opo mu kale mwa zala omagala gaali. 1. Ne aantu, 2. Ne aakriste,[1] Napu kale wo pu na iinima ihaamu yi ningi shaashi ashike ihaayi ningwa kaantu. [2] Napu  kale wo pu na iinima ihaamu yi ningi shaashi ashike ihayi ningwa kaakriste.

Oongundu ndhika mbali odho nadhi kale omagala komitse, noongaku koompadhi dheni. Ne mu tumbule tamu ti;

Hakutya ndeshi adha

Nenge nda gwana nda pwa.

Otandi shi matukile

Ndishikwate!

Pehulilo nolwahugunina, dhimbulukweni natango etumbulo ndika: “Ihe ngame onda hala okudhimbulukwa uukume wetu nangoye, nde wu panga tse nangoye pethimbo lyuugundjuka woye, nonda hala okupanga uukumwe nangoye sigo aluhe!!!” HEZ 16:60.

 Dhi dhiginineni.

  • Ondjokana ohadhi hanganitha omazimo muukumwe ihe ohadhi vulu wo okuyambulula nokushundula limwe lyomomazimo ngele, inapu kotokiwa.
  • Kehe gumwe kala omukalelipo [Ambassada] gwezimo lyoye, mondjokana yeni.

 ELALAKANO

  • Oto hokanwa opo:

1.Wu kwathe wo aavali mokulela omagumbo.

  1. Wu kale wo noshinakugwannithwa shokugandja omagumbo kuyalwe.
  2. Ngoka a yono ombili , oye neyi ete po, ina tegelela yi etwe po kumukwawo, ye haaye e yi yono”

 

EHULITHO

Kalunga na yambeke ondjokana yeni, mu ka tunge egumbo enene, nepya lyoongandahulu!!.

Tangi sho mwa lesha oshipopiwa shandje, onde mu pandula.

Lukas Shawana

Omulongi keithano, Omuhungimwenyo, omulelili wopamuthigululwakalo, omuuvithi moNgerki yaELCIN, Omunyoli nomutoloki wiipopiwa yetsomukumo, nokuli wo Omushangi gwomambo.

LEAVE A REPLY

Please enter your comment!
Please enter your name here