Shack dweller ota kwathele mokutunga omagumbo

0
267
Iilyo yoShack Dwellers Federation pethimbo lyoshigongi sha yo petala lyombelewa yelelo lyOndonga mOndangwa. 

 

ONDANGWA  – Ehangano lyoShack Dwellers ndyoka lina oshinakugwanitha shokukwatha  aaniiyemo iishona moshilongo opo ya vule ya mone omalukalwa gawo yene, natango onkene tali dhana onkandangala onene.

Omasiku gapiti ehangano ndika olyali lya tsakanene niilyo yalyo  oshowo elelo lyondoolopa yaNdangwa, poombelewa dhElelo lyaNdonga.

Omukwatakanithi gwehangano Heinrich Amushila okwa ti, “Ehangano lyetu ohali gandja ompito opo mboka yaana omagumbo ya vule ya tunge omagumbo gawo gopamuthika, oyendji yomwaamboka taya ka tunga omagumbo gawo oyo mboka yena iiyemo iishona , yo ohaya zi owala miipeleki, otwa hala opo aantu ayehe ya ze miipeleki ya ye momagumbo gomakuma,”.

Shack Dweller okuna ondjodhi onene mono a tegelelwa a kale a tunga omagumbo 115 oshilongo ashihe muule womumvo nguka. Kiitopolwa yimwe omagumbo gamwe oga pwa okutungwa na gamwe ogeli metifa lyokutungwa.

Pethimbo ndika mOndangwa omwa thaanekwa opo mu tungwe omagumbo 28,  ngoka taga ka tungwa kolukanda lwOndiiyala. Omukwatakanithi gwehango  ndika mOndangwa  Penny Shikongo okwa ti mOndangwa omuna iilyo 974, mono oshiluku shotango sha tunga omagumbo 71.

“Shack Dweller ote tu kwathele opo oondjodhi dhetu dhitse, ohatu tholoma oondhopi tse yene tse tatu kongo mboka taya tungu tatu ya futu niimaliwa mbyoka hatu pungula komayalulo getu goombaanga,” Shikongo ta ti.

Ehangano ohali shi ningi oshipu opo aniiyemo mbaka ya vule okumona omahala mpoka taya tungu omagumbo gawo papitikilo lyomalelo goondoolopa. Omwaalu gwiilyo yehangano otagu ende tagu koko ethimbo nethimbo.

Iilyo mbika ohayi gongala pomahala nomahala yo tayi itulilemo, nokutala nkene taya humitha komeho ehangano lyawo.  “Otwa kondja ngaashi tatu vulu opo tu tule ayihe kolutenda tse tu yambulepo ehangano lyetu, otwa pandula notwa nyanyukwa omolwa uuwanawa mboka ehangano lye tu ningila olye tu pa ompito opo tu imonene omalukalwa,” Shikongo ta gwedhapo.

Omagumbo ngano oga thanekwa opo ga kale ga tamekwa okutungwa meni lyethimbo efupi, nohashi pula owala uule womwedhi gumwe opo ga kale gapwa okutungwa.

 

shack-dwellers2

LEAVE A REPLY

Please enter your comment!
Please enter your name here