Uudhano woSuper Cup otau kala wa kukuta

0
234

 

Windhoek

Enyakwa muudhano wetanga lyokoompadhi moNamibia, Tigers Footbal Club otayi muudhano wekopi lyoSuper Cup a tegelelwa oye a ka sindane Olyomakaya ndjika uuna mbuka wa thiki pehulilo pokapale kaSam Nujoma moKatutura kaVenduka.

Omudheuli gwo Tigers Brian Isaacs oku wete ospana ye yi na ompito oku sindana unene tuu sho ndjika oyo ya li ya sindana po uudhano wa hugunina sho oospana ndhika dha li dha tsakanene pethimbo lyuudhano wekopi lyOmundohotola Hage Geingob omwedhi gwayi.

“Otu na elago oshoka otwe ya dhengele pethimbo twa tsakanene lwa hugunina pethimbo lyuudhano wekopi lyOmundohotola Hage Geingob. Onkene otwi ilongekidha pamadhiladhilo. Ndele itapa ka kala esilohenda lya sha mOlyomakaya uuna twa tsakanene oshoka ospana yo African Stars nayo oya tokola okugamena epapa lyayo  ongenyakwa lyekopi ndika hali kwashilipalekwa kOmbaanga yoStandard. Uudhano mbuka otau ka kala uunene nuumvo, unene tuu sho tse inaa tu sindana natango ekopi ndika lyoSuper Cup.”

Omumvo gwa yi Tigers okwa dhengelwe mo ko African Stars  muudhano wa hugunina wekopi ndika.

Isaacs okwa gwedha ko  a ti ospana  naadhani ye oyi ipyakidhila noku ilongedhika nuudhiginini naasho uudhano woliha yoNamibia Premier League inaa yi tameka natango, ye okwa dhiladhila oku ulika nkene yo yi ilongekidha omanga oliha inaa yi tameka.

Ekopi ndika hali kwashilipalekwa kOmbaanga ya  Standard olya li lya talelepo oombelewa oonene dhewiliko lyuudhano wetanga moNamibia dha tseyika nawa moVenduka nedhina Football House moka aaholi yuudhano moVenduka ya tsakaneke nokupopitha aadhani  yoospana ndhika mbali. Yo aaholi yuudhano wetanga lyokoompadhi mboka ye na elago oya li wo ya mono ompito oku isindanena uutekete woku ya kuudhano mbuka.

Uutekete wuudhano mbuka otawu adhika poComputicket kooN$30-00 kehe kamwe.

LEAVE A REPLY

Please enter your comment!
Please enter your name here