Ve dule 4000 va pewa eedokumente komaulikilo oipindi kOngwediva

0
264

ONGWEDIVA – Ovanu ve dule omayuvi 4000 ova mbobolokela kotenda yOmunisteli wOkwameni lOshilongo oyo yali momaulikilo oipindi mOngwediva, tava kongo eedokumente dopashiwana. Ouyelele owa yandjwa komunambelewa omukwatelikomesho weembelewa doikwameni yoshilongo moitukulwa ine koumbangalanhu, Isak Hamwaanyena.

Hamwaanyena ta yelifa kutya, pokati kaApiilili naJuni 2016, ounona ve li koshi yodula ve li 1318, ova pelwa eendjapo domadalo moihakulilo moshitukulwa shaShana. Omwaalu aushe kumwe naavo va koya podula va pewa eendjapo domadalo moule weehani nhatu, mosshitukulwa ashishe ou fike 2114.

Ovanyasha vahapu, ova talela po okatala koshikondo shoikwameni yoshilongo momaulikilo oipindi yaNgwediva a tameka Augute 26 fiyo Septeba,02, 2016. Hamwaanyena ota ti, vahapu otava kongo eendjapo domadalo delixwa po omolwa etambulo koiputudilonongelo yopombada nokupewa omikuli. Vamwe ove na nale eedokumente da puka da pumbwa kupukululwa, da kana ilo da pya po. Efinamango laNamibia ola pitika keshe ou a wanifa eedula 16 a fanekwe ookamutwe. Ovadali vokaana ove keshe taka dalwa, ove na kuyandja omaufemba avo okaana ka pewe ondjap o yedalo yelixwa po.

Hamwaanyena ta twikile ko kutya, ondjapo yedalo inai lixwa po kai na vali ongushu, oya pingenwa po kondjapo yedalo yelixwa po mu na omaukwatya ovadali. Ashike ngee omudali umwe ke po itashi imbi okaana ka pewe ondjapo oyo tai dulu kuningululwa ngeenge omudali a li ehe po a yandje oufemba waye. Oshikondo shoikwameni yoshilongo osha didilika ounona vahapu vamwe ove na eedula da koya po16 opo tava kongo omaufemba (eendjapo domadalo) sha etifwa kovadali vamwe ihava yandje omaufemba ilo vehe wetike.

Epangelo ola kuyandjwe eendjapo domadalo kounanona fiyo odula imwe, ashike okaana ngee oka wanifa odula itaka pelwa vali ondjapo yedalo moshipangelo. Hamwaanyena okwa twa omukumo ovadali aveshe va kale noshisho ounona va kongelwe eedokumente manga vanini ngaasi ,efinamango la ufa okaana keshe taka dalwa kutya oke na oufemba wokulukwa edina.

Omukomesho meembelewa doshikondo shoikwameni loshilongo mOshana, Oshikoto, Omusati nOhangwena okwa weda po kutya ovo ve na oumutwe vaSouth West Africa, ove li ashike melongifo kate Maalisa 31, 2017. Ta tumbula eshi ombelewa ya mona omakegelelo oikando ine ovanhu ve ya kukonga oumutwe neendjapo domadalo inadi longikidwa okudilila mombelewa yoikwameni yoshilongo, osho shi li meke lopolifi paife.

LEAVE A REPLY

Please enter your comment!
Please enter your name here