Black Mamba otaka kondjela epaya lyoCommonwealth

0
177

Omudhengingonyo gwaNamibia mondjundo yoSuper Middleweight ota ka kondjela epapa lya simana lyoCommonwealth mondjundo yoLight Heavy weight Olyomakaya tayi ya moUK.

Wilberforce Shihepo ota ka palamena enyakwa lya Britania mondjundo ndjika lyedhina Callum “The One” Johnson molugodhi talu kala ko ongulohi yOlyomakaya gomasiku 24 Septemba nuumvo moshinyanga shomaudhano moshilando oshinene sha Manchester.

Olugodhi nduka otalu humithwa komeho ku Matchroom Promotions limwe lyomomahangano  omanene muuyuni ngoka haga longekidha uudhano woongonyo.

Shihepo okwa kondja omalugodhi 36, a sindana omalugodhi 28, noku dhengwa momalugodhi gahetatu. Otayi molugodhi nduka ena omasindano gaali ga landulathana. Omudhengingonyo omuNamibia nguka ota ka kondja molugodhi nduka  a tokola okuyugako oshishani shika okuza kuJohnson opo shika shi ninge she.

Johnson ngoka oye enyakwa mondjundo ndjika okuna ondjokonona ya yela ngele tashiya poku dhenga oongonyo, sho a sindana omalugodhi ge agehe gopaithano ngoka a kondja sigo oompaka. Onkene ye otaka tsakaneka Shihepo noku mu kondjitha nuukeka opo a gamene ondjokonona ye osho wo epaya lye ndika.

Nonando ondjokonona ya Shihepo hayo naanaa ya yela ngele tashiya pomalugodhi, omumbokisi nguka oku na ontseyo oyindji na ita ka dhanena nando ompito i iyethele a dhengwe kuJohnson ngoka sigo oompaka inaa sindika nando momalugodhi agehe ngoka ye a kondja.

Pahapu dhomudheuli gwaShihepo, Nestor Tobias, omudhengingonyo nguka otayi molugodhi nduka nedhiladhilo limwe alike ndyoka lyoku sindana.

“Eeno otu shishi nawa kutya okukondjela kondje yoongamba dhaNamibia kashishi oshipu, ihe omumati nguka okwa adha omasindano momalugodhi ngoka a kondjelele pondje yoshilongo,nokwa hala okutumbalekitha Namibia’ Nestor a ti.

 

LEAVE A REPLY

Please enter your comment!
Please enter your name here