Eenhapo tadi shingwa mopate ota di halula

0
263

Okavideo take li tambulwafana kosocial media komulumenhu wokOngwediva ta shingi onhapo yo 260km/h otaka halula noke li limwe lomomanyamukulo kutya omolwashike oiponga inyanyalifa ta i li nyenge moshilongo.

Omunhu ta shingi onhapo ya pitilila luvali ndele taku xupu, oku yekanifa nonhapo yo 120km/h ei ya tulwa po koveta. Ngee twa udu omunhu woludi eli eli hanga moshiponga oshiwana oha shi haluka noku pula kutya ‘hano otwa ninga shike’ ashike otu shishi kutya okushinga oha shingilile.

Ovanhu tuli po hatwii fufya nokwiitanga kutya ohatu shingi omatuwa ondilo, haalotoka onhapo ashike ina tu koneka kutya kokushinga kwoye konhapo yapitilila, oko ngoo koku eta efyo loye, lomutwaalelwa nolomulongifi mukweni wopate popepi.

Luhapu ngeenge oyeendifo ivali yeli denga mumwe, opena oku kala umwe womovashingi ehe na nande ondjo yasha ndele ehauto laau ta shingi ouhasha tali uya li li denge mu laau ta shingi nawa.

Ile omweendi wokolupadi teli endele ndele ehauto tali koloka ko kopate ndele tali mu lyatele kokandjila kokeemhadi.

Oiponga ei otai etifwa ashike kwaavo veli wete hava shingi omahauto.

Otu na oku dilaadila kutya ngeenge otuwa tai lotoka onhapo ya kula ngaho ohai kala ashike yafa tai tuka nopedu kai po nawa. Nokapepo kashona kadja ko taka pepe, otaka dulu oku pepa po otuwa yoye.

Oshiima shikwawo, elitulemo loye ngeenge to shingi, unene ngaashi nee ou ali te lifaneke nalo kali mo nawa mopate. Sha hala kutya ngeenge oshinima osha nhukile mopate otuwa oyo ito dulu okuipangela, shaashi oshinima ito shi monene po.

Oto hange ovanhu tava shingi va landulafana, veli eta mo neenghono, ndele ngeenge umwe womovashingi ovo, unene tuu oo eli komesho ile pokati okwa i moshiponga, nande elola la topa, eetuwa adishe odi li moshiponga.

Oshinima shikwao ngeenge okwa ka dja ohauto tai sineya ya endelela neenghono, koo nokomesho mboli otaku di, nakusineya kena ashike nande nande apa ta henukile. Luhapu oto hange nee omunhu te li fininike pokati keehauto, poo kape na onhele ya wana. Na nakulifininika ou ngeenge okwa li ta nane nande okatemba ohe li hange ta denge nokatemba kaye umwe womoonaku li landula ava.

Hano natu kototekele oshinano pokati kotuwa notuwa ngeenge twe li landula.

Ove pamwe nee nakushingilila otashi dulika u kale omushingi a pyokoka, ashike omunhu ou eku landula, ile wa landula ile ta di komesho yoye tamu li pingafana naye otashi dulika ehe shi kushinga.

Omolwaasho, ovanhu vamwe ngee ova mono ohauto tai di komesho ile konima yafa ya nyika oshiponga, ponhele yoku henuka ile va dje ko kopate, ohava ngwangwana ashike oihauto tai ke li denga mumwe omutwe nomutwe. Eshi oha shi etwa shaashi katu na ounongo wo defensive driving[oku shinga noku li amena], nande okambwa ka nukile mopate omunhu oto kandoma ashike.

Eshi otashi ulike kutya oshilongo oshi na omhumbwe ye longo leshingo lokuliamena hano odefensive driving, ya pumbwa okulongwa eendalaiva adishe.

Omunhu ngeenge owa endelela ndee oku toi oku na okapale keedila, xwepo u londe odila ndee to tuka. Shaashi o ondado ei to futu, ngee owa kanifa omwenyo woye ile ngee wa lemana ile wakanififa ovalongifi vondjila vakweni eemwenyo ile oilyo yolutu, oya kula neenghono. Omwenyo ouna ondilo, nokapena oshipuna nande oshimwe kombada yedu tashi u dulu.

 

 

 

LEAVE A REPLY

Please enter your comment!
Please enter your name here