Egandjo lyomakopi moseketa yOluno

0
301

 

ONDANGWA  – Etitano lya piti olyali lyopandjokonona moosikola ndhoka dhili moshikandjolongo Oluno, sho aalongwa naalongi yaza moosikola dha yooloka moshikandjolongo shika ya pewa omapole nomapapa,omolwiilonga yawo.

Oshituthi oshali sha ningilwa pendiki lyiigongi pOluno mOndangwa.

Omutaleli gwelongo moshikandjolongo shika Levi Vries okwa ti, mOluno otamu adhika oosikola tadhi ihilile po-30 lwaampoka.  “Omumvo kehe ohatu longekidha egandjo lyomakopi noonzapo kaalongi naalongwa mboka ya longa nawa muule womumvo gwa piti, nelalakano oku  kumika mboka taya kambadhala ya longe nuudhiginini, tse tu pandule woo mboka taya longo nuupenda ya kale ponkatu yotango,” Vries ta ti.

Konyala aalongi ,aanaskola naavali oyali ya gongala yo ya tyapule iiyimati yiilonga yawo. Omukuluntu gwelongo moshitopolwa shaShana Hileni Amukana naye okwali a holoka esiku ndyoka ye a tale nkene dhimwe dhomoosikola dhoshitopolwa she tadhi shi enditha.

Amukana okwa pandula oshikandjolongo tashi longo nuupenda, nomolwa elunduluko ndyoka sha ningipo muule woomvula ndhoka dha piti. Ta gwedhapo kutya moomvula dha piti Oluno olwa kala halu longo nuunkundi , nomvula ya ziko oshali sha adha oopelesenda 66%, nonande moomvula dha piti ya kala owala haya mono oopelesenda 38%.

“Otweya mpaka nena opo tu tyapule iiyimati yiilonga yetu, onda nyanyukwa sho mwi itulamo nomwa longo nomazigudhe sigo mwa sindana, otandi mu halele omukumo mu longe neitulemo ne mu adhe esindano melongo lyaanona yetweni,” Amukana ta ti ngaaka.

Okwa gwedhapo noku indila aavali ya kale aluhe taya tala iilonga yaanona yawo, yo ya kundathane omaupyakadhi ngoka taga adha aanona naalongi yawo, ya kale noku talelapo oosikola yo ya uve woo maalongi ngele omaihumbato gaanona yawo otaga hokitha ngaa. Amukana ta tsikileko ta pula aavali ya kale haya holoka komaudhano uuna oosikola dhontumbo dha longekidha omaudhano goludhi kehe.

Omukuluntu gwelongo ta pula aanona ya kale nokwi itulamo miilongwa yawo, yo ya tseye kutya oyo oongudhi nehukamugongo lyoshilongo, teya indile ya kale haya simaneke aavali naalongi yawo, yo ya kale haya pula omapukululo kaalongi uuna kaaya uviteko iilongwa yawo, ta ti otashi pula eitulemo opo ya sindane miilongwa yawo yesiku kehe.

Oosikola ndhoka dhali dha pewa omakopi ongaashi ndhoka dhopaumwene yo African Stars, Light of the Nation osho wo Ondangwa Secondary School. Esiku ndika lyegandjo lyomapapa olyali lya yambidhidhwa kaanangeshefa yomondoolopa yaNdangwa ngaashi Ondangwa Airport Lodge, Niimboto trading cc,Shivute Family Trust na yalwe woo oyendji, yamwe oya gandja iimaliwa yokulanda omakopi oshowo okuninga oonzapo nomakwatho galwe opo esiku li ende nawa.

 award2 award

LEAVE A REPLY

Please enter your comment!
Please enter your name here