Ethimbo lyaJohn Muafangejo

0
276

Windhoek

Endiki lyiiyulikwa yuunkulungu lyaJohn Muafangejo melongelo kumwe nendiki Lyiilonga yuunkulungu lyopashigwana otage ku etele shoka sha lukwa ethimbo lya John Muafangejo.

Ndika olyo omalongekidho ga nuninwa okutumbaleka ondjokonona nuuthiga wa nakusa John Muafangejo, tashi ningwa okupitila miinyangadhalwa noshigwana mbyoka tayi longitha oonkulungu dhiikwamathano dhomoNamibia osho wo ndhoka dha za palwe mUumbugantu wAfrica.

Ethimbo lyomumvo nguka olya thikama miinyangadhalwa ngaashi oonkundathana mokati koongundu dhuunkulungu, dhokupungula iilongomwa yuunkulungu osho wo uunandjungu muunkulungu.Pethimbo lyaJohn Mwafangejo nenge lyomauliko guunkulungu mboka wa nwethwamo kiilonga ye, aanongo miilonga yuunkulungu  yaza koSouth Africa oya ithanwa  oku kutha ombinga moshiithanene shika. Mbaka oyo Gabi Ngcobo na Nyakallo Maleke..

Mokudhimbulukwa  Muafangejo niilonga ye ongo ehala lyeipyakidhilo, elongekidho ndika lyuule woshiwike otali kala molukongo lwoku konga nosho wo okwiitalulula kwoonkulungu dhonena. Omaipulo ngaka otaga tala konakuyiwa ya nkene taku longwa noku kwatathana nuunkulungu womonakuziwa wumwe mboka wa li ondjila moka oonkulungu dha ende oku tsondumbo nethindilokongudhi.

Ethimbo ndika ota li lalakanene oku etapo noku humitha komeho iilonga iipe kombinga yuunandjungu pankalathano, oonkundathana, okutopolelathana omadhiladhilo, uuyelele osho wo ontseyo kombinga yuunkulungu uupe. Shika otashi etapo wo ompito ndjoka tayi longithwa koonkulungu opo dhi taambaathane iikwahedhi niikwamithigululwakalo ya yooloka.

Ethimbo lya John Muafangejo otali dhimbulukiwa kohi yoshipalanyolo ‘the Art, Archivism & Activism’ sho, shika otashi tameke okuza momasiku 30 Septemba sigo omasiku 8 gaKotoba nuumvo.

Elandulathano lyethimbo ndika otali tameke momasiku 3 Kotoba sigo 5ga Novomba no mauliko giilonga ya Muafangejo moshinyanga sho National Art Gallery of Namibia.

Mu 4 Kotoba sigo 4 Novomba otapa ka kala omaulikilo omakwawo osho wo oku dhana taku ningwa ku Nyakallo Maleke naGabi Ngcobo.

Momasiku ga-5 Kotoba  otapu ka kala  wo ethimbo  lyoku dhimbulukwa iilonga ye po National Art Gallery of Namibia.

Omauliko ngaka otaga ka ningilwa wo pendiki lyomithigululwakalo lya Franco Namibia Cultural Centre momasiku ga 6ga Kotoba nuumvo.

Omanga ethimbo ndika otali ka hulila momasiku ga 7 ga Kotoba nomauliko guunkulungu, gokudhana okushangulula nosho tuu tashi ningilwa pendiki lyuunkulungu lyaKatutura Community Art Centre.

Muafangejo Art Centre olyo ehala lyokudhiladhila muule lya odheka okutungapo omikalo dhoku longela kumwe ngele tashiya muunkulungu wopethimbo ndika osho wo okunenepeka omakwatathano nelyenge lyoonkulungu.

Muafangejo (okwa valwa momasiku 5 Kotoba 1943 mEtunda lo Nghadi, moAngola; nokwa manene oondjenda mo 27 Novemba 1987 molukanda lwaKatutura  moWindhoek) . Ye onkulungu oNamibia ndjoka iilonga yayo yuunkulungu ya tseyika muuyuni auhe, unene tuu sho mbika ya longwa momathano gathanekwa miiti mbyoka ya tetwa etai paindwa omwaala gaali oluluudhe nolutokele.

John Muafangejo oku shiwike oye onkulungu yuunkulungu wiikwamathano ya simana moshilongo muka. Nomathano ge ga hongwa otaga ulike aantu, niiningwanima osho wo ga thaneka iinamwenyo.

Omathimbo gamwe okwa tula mumwe omathano nomushangelo, go omathano gamwe otaga ulike sha shomondjokonona osho wo oohedhi dhAakwanyama. Mwafangejo ina mona ompito opo a mone oshilongo shika sha manguluka, unene tuu sho omathano ge niilonga ye ya nwethwamo konkalo yiita yekondjelomanguluko. Iilonga yaMuafangejo oya thikama po momafano geli konyala omathele 260. Iilonga ye mbika otayi adhika ya pungulwa moondunda ndatu moshinyanga shomauliko guunkulungu shaNamibia  moVenduka.

 

LEAVE A REPLY

Please enter your comment!
Please enter your name here