Tunakie na Kamati aakalelipo yOm’kulukadi Dingi

0
362

 

Windhoek

Ngaashi naana omalongekidho goshiithanene shethigathano lyOm’kulukadi Dingi mOkalongo nuumvo taga pula komeho, aalongekidhi oya hogolola nookuli aahikingalo yoondjimbo dho pamithigululwakalo, Tunakie na Kamati, oyo yakale aakalelipo yoshiindingili shika.

Shika osha tseyithwa komutotipo gwoshituthi shika, Ndawanapo Ndume, ngoka ati aahikingalo mbaka yaali oya hogololwa molwa ekwatelepo lyawo lyomuthigululwakalo moshilongo.

Ndume okwa ti aahikingalo mbaka otaya ka enda noshilongo ashihe nelalakano lyoku tseyitha oshituthi, naashoka tashi ka ningwa po mesiku ndyoka enene.

Om’kulukadi Dingi ota ka ningwa momasiku 23-24 Deseemba nuumvo mOkalongo moshitopolwa shaMusati. Momasiku ogo tuu ngaka okwa tengenekwa ku ka kale kuna omainyayudho ga kwata miiti, noshituthi otashi ka mona aakulukadhi mboka yeli pokati kepipi lyoomvula 45 sigo 70, taya ka ya methigathano opo ya ka kondjele oshikoloni shOm’kulukadi Dingi, shoka tashi ka ningilwa moshitopolwa shaMusati, pehulilo lyomvula ndjika.

Ndume okwa ti  okwa totopo oshituthi shika nelalakano opo oomeme ya ulike uunongo wa wo tashi pititle miinyangadhalwa yomainyanyudho gatya ngeyika.

Moshituthi shika shanuninwa okuyambula po omainyanyudho mOkalongo, okutaandelitha omithigululwakalo oshilongo ashihe, noku longa aagundjuka kombinga yomithigululwakalo, ota pu ka monika iinima ayihe mbyoka yomithigululwakalo, unene ndhoka dhAawambo  tayi ka landithwa.

Esiku lyoshituthi kehe omukuthi mbinga okwa tegelelwa aka ninge iiningomwa ye noonyala dhe, oku ulika shoka ena nenge a ninga yemwene kengathithi lyaantu mboka taya ka kalako, noku landitha iinima mbyoka yomuthigululwakalo kondando yili pevi.

Aakuthi mbinga otaya ka tegelelwa ishewe opo ya ka kale yeli momizalo dhawo ndhoka dhondhelela, nokudhana iiyimbo yOshiwambo.

Ndawana okwa ti oya longekidha woo omudaaniso ngoka kwa tegelelwa gu kandaanisiwe ku kehe gumwe gwedhina ta ka kutha ombinga, uudhano mbuka ohau ithanwa Okandeshimwene, ngoka ogo tagu ka sindanitha aakuthimbinga methigathano ndika.

 

omkulukadi-dingi-2

 

 

 

 

LEAVE A REPLY

Please enter your comment!
Please enter your name here