Elongo ihali kokelwa

0
300
Jesaya ya Hangula a humbata eplakata ndyoka tali ulike kutya oshiwike shelongo lyaakuluntu osha liko uunake. Hangula oku li mondondo ontitano pethimbo ndika omanga, ngele ando okwa yile kosikola kuyele ngaashi aanona ooyakwawo andola okuli mondondo 12 nuumvo nenge ta ka sikola poUNAM nenge poNUST.

 

ELOMBE  –  Nando ethimbo lye lya manwapo, koku kala kohambo omunamimvo omulongo naheyali okwa tokola iinyolithe melongo lyaakuluntu opo a vule oku ilonga okushanga noku lesha.

Pethimbo ndika Jesaya Hangula okuli omulongwa gomondondo onti-5 posikola yopevi yOndumetana moshikandjohogololo Onayena.. Hangula okwa hokolola kutya petameko lyuunona we kali hayi kosikola oshoka okwa putukila pu yinakulu, ngoka lwanima a ka tokola oku mu fala kokuti opo a ka kale ta takamitha iimuna.

“Ngame mwene peputuko lyandje inandi kala nda patulukila osikola, no inandi kala nda tseya uuwanawa mboka tandi adha melongo naasho kuku a tumu ndje kohambo onda kala ndu uvite uuntsa oshoka otandi ka kala niimuna mbyoka ndi hole,’ Hangula ta ti.

Ta hokolola kutya kohambo okwa ningako oomvula odhindji a ninga owala omumati gomokuti, ta ti  limwe lyomomasiku okwa li a mono ompito opo eye kegumbo ye aka talelepo yina ngoka a lombwelwa kaantu yopomudhingoloko kutya nani  “iha ndi yi kosikola onda ningwa owala omumati gokohambo, okwa li a ningi oonkambadhala opo a shangithe ndje elongo lyaakuluntu ngame ndi longwe okushanga, okuyalula nokulesha oshoka ka ndali ndishi nenge ondanda yimwe,” Ta gwedhapo.

Hangula okwi itula melongo lyaakuluntu ndyoka a kala ha hiti komatango, nokwi iyadha ta vulu okushanga edhina lye oshowo okulesha. Omulongi gwe okwa li e mu shangitha mosikola yongula mono a tameke mondondo ontiyali, nongaashingeyi okuli mondondo onti-5.

Ta ti nonande ena oomvula odhindji ita sholola okuya komeho nelongo lye, molwaashoka ngashingeyi okwa patuluka nokushi kutya melongo omuna uuwanawa wa shike. Hangula okwa hala a ka ninge ondohotola ngele a mana eilongo lye, no ta ti ota pula komeho opo oondjodhi dhe dhi tse.

Hangula okwa kumike aanona ooyakwawo mbono ta ye ki iyadha mo nkalo ngaashi ye, opo ya tseye kutya melongo omuna uuwanawa owundji, ta ti naya ishangithe elongo lyaakuluntu yo ya longwe okulesha osho wo okushanga. Okwa pandula ayehe mboka haye mu kumike opo a dhiginine elongo lye oshoka limwe lyomomasiku ona ka adha shoka ta lalakanene.

Ta ti elongo lyaakuluntu olyemu kwatha nolya patulula onkalamwenyo ye opo a vule okulesha, okunyola nokuyalula, kali eshi nando okushanga edhina lye, Ta ti okuti nenge kwa manapo ethimbo lye ota kondjo nuudhiginini ye a adhe iilalakanenwa ye monkalamwenyo.

 

LEAVE A REPLY

Please enter your comment!
Please enter your name here