!Naruseb a indile oshigwana shi kaleke po oondjila

0
124

 

EENHANA –Minista Yiilonga nIiyenditho Alpheus !Naruseb oya kumike aakwashigwana, naalongithi yoopate moshilongo ya kalekepo oopate, moku dhi longitha ngaashi oveta tayi ti.

!Naruseb okwa popi ndhika pethimbo ta egulula pambelwa ondjila yoteya pokati kOshigambo nEenhana omasiku ngaka.

!Naruseb okwa ti oshi li oshinakugwanithwa shepangelo okukwashilipaleka kutya oopate dhili pamuthika gopashinanena odha tungwa moshilongo.

“Okuza sho oshilongo sha manguluka epangelo olya kambadhala okulonga oopate , opo aantu ya kale taya ende ya manguluka ashike oopate ndhino nadhi kwatwe nawa dho dhi vule okulongithwa komapipi ta geya,” !Naruseb a indile ngaaka.

Ta gwedhapo kutya oopate ohadhi kwatakanitha iitopolwa nomikunda.  Monakuziwa aantu yopomidhingoloko ndhika oya kala haya longitha ongalama yomamanya ndjoka ya kala nontsi oyindji. Ndjika oya li wo hayi kala niiponga oyindji omathimbbo nomathimbo.

Opate yopokati kOshigambo–Eenhana oyina omukaakena gwookilometa 48 noya longwa koshimaliwa shi thike poomillionaN$190, shoka sha zi moshiketha shepangelo.

Minista !Naruseb ta ti elongo lyopate ndjoka olya hupithapo oshimaliwa shoomilionaN$4.1. Oya tungwa pamuthika gopashinanena ya tulwa oteya nongaashingeyi ayehe mboka haya longitha opate ndjoka otaya ngoongola ashike nenge tu  tye otaya thenunuka ashike yo oya thika nale hoka taya yi..

Ondjila ndjika oya kwatakanitha oshitopolwa shaHangwena nOshikoto, nomikunda ngaashi Omahenge, Onambutu, Onakatumbe, Ondingwanyama, Oshiweda, Oshaango na dhilwe naakalimo yomundhika otaya kala taya ende nuupu okuka konga omayakulo.

Ngoloneya goshitopolwa shaHangwena Usko Nghaamwa naye okwali a mono ompito, opo a popye peegululo lyopate ndjika a ti oya pandula unene sho yimwe yomoondjodhi dhawo dhesiku kehe ya ningi yoshili. A ti aalongithi yopate ndjoka oya kala haya ende nuudhigu, ihe ngashingeyi uule wondjila owa tetulwa nontsi ndjoka ya kala hayi piyaganeke oya hulithwapo.

Nghaamwa ta kumagidha aalongithi yondjila ya yande okuhinga uukodhi tawu ka lala, yo taya simaneke ooveta noompango dhomoondjila. Omahangano gi imanga kumwe Namibbeton noKL Contructions, Elements Engineers osho wo Engelbrecht Consulting Engineers, ogo ga kwatele iilonga mbika komeho, no yapu pethimbo.

Iilonga mbika yopate oyali ya tamekwa mo2014 noya manithwa okuya pehulilo lyomumvo gwa piti. Aakwashigwana oyali ya holoka noya nyanyukilwe pamwe omolwaasho ya mona opate yopashinanena.

 

LEAVE A REPLY

Please enter your comment!
Please enter your name here