Okulonga ouxwilili moNamibia

0
209

ONGWEDIVA – Namibia ota dulu kupita mefimbo londjala mokuweda po oikulya yomaludi  pwaayo hai liwa kovakalimo inaa longifa oinima yondilo.

Efaneko nouyelele ou owa yandjwa kuIsabel Ueitele okudja koUnivesiti yaNamibia koshitukulwa shomapekaapeko oprojeka ZERI tai tu oshiwana omukumo shi lalakanene okulonga ouxwilili.

Ueitele okwa yandja ouyelele ou pefimbo lomaulikilo oidjemo yopaunongononi a li mendiki loipindi mOngwediva oshivike shadjako kombinga yeemhito tadi dulu kuyambula po oshilongo tashi pitile mounongononi.

Kakele komaludi oikulya hatu longo momapya ilo omaludi oikulya yopamufyuululwakalo, oshiwana otashi dulu kulonga ouxwilili nokuweda komaludi oikulya hatu li.

Ehangano ZERI okupitila moUnivesiti yaNamibia la eta po omukalo upu okweeta po oshikulya shiwa tashi kandula po omukaa nondjala moshiwana, tashi dulu kulandifwa nokweeta po oyuuye mo kovakwashiwana vokomikunda vehe na oilonga va dule yoo okumona oyuuye mo. Ta tu oshiwana omukumo shi hokwe okulya ouxwilili, shaashi muwo omu na oitungifi ngaashi oVitamine C, micronutriens, iron, calcium, sodium, potassium nophosphorus. Eshi oshiwana sha kondekwa komikifi dihapu,  ovali vouxwilili ova amenwa kocholesterol, noshikulya eshi oshiwa kwaava ve na ohonde ya londa, nokwaavo tava lumbu nombuto yoHIV/AIDS.

Ueitele ota ti, ekonaakona la ningwa koUniveisti yaNamibia ola ulika kutya, ouxwilili oshikulya shipu okweeta po. Ohau di moilongomwa ei tu na nale ngaashi omwiidi, oihati yoilya yomahangu ilo oilyavala, yepungu, noikuni. Oshipu okweeta po oikulya yoludi eli shaashi oya pumbwa kulongelwa meenhele detu domifyululwakalo . Omulongi wouxwilili ota pumbwa ashike eembuto, doilyayomaludi oo tu na nale pamufyuululwakalo nokupukululwa nghee ta dulu kulonga ouxwilili. Omaludi ouxwilili tu na nale moshiwana ohae yapo pefimbo lodula ngaashi oova, ouxwilili womepya, oshihamuuya, kakalambo nohaa monika ashike peenhele dimwe.

Omunambelewa waUnam okwa weda po kutya, ouxwilili oshikulya shiwa tashi dulu kulongwa kovanhu oohandjimwe ilo keengudu dovakwashiwana ngaashi da deulwa nale koUnivesiti yaNamibia moshitukulwa shaShana , shaZambezi. Elalakano okutwika ohokwe mokulonga oshikulya eshi shipu kweeta po shi na ombilixa, pamukalo woshinanena nomunhu ota dulu kulimonena oyuuye mo. Shikwao okunwefa mo oshiwana shi hokwe omadeulo shi dule kulonga ouxwilili ngaashi a yandja ouyelele ou kovalihongi va dja keefikola da yooloka mendiki loipindi.

LEAVE A REPLY

Please enter your comment!
Please enter your name here