Oonakutula moilonga eepoloyeka depangelo nava endelele

0
154

Ombilive ya nofelwa ko nokuvakelwa koikundaneki omafiku aa ta i popi oshimaliwa sheemiliona N$11 sha longekidilwa omadeulo aavo have li ufana kutya vo ounona vovakondjeli manguluko, ota i ulike kutya ovo veli neekelelwa oku wanifa po oilonga yepangelo otava ende kashona.

Omushangwa oo nonande kawa li wa yandjwa papangelo ota u ulike kutya oKabinete okali ka yandja elombwelo petameko laJuli neudo opo ehangano loSocial Security Commission li yandje oshimaliwa kouministeli wovanyasha nomaudano opo shi longifwe momadeulo aa.

Nonande ongaho ounona vovakondjeli-manguluko onghee ngoo veli hanena koFarm Duplesis kOmaheke, vamwe natango ove li keembelewa doSwapo, navamwe nee ovo veli koBerg Aukas oko veli natango ina va tameka omadeulo.

Omunofweliko woikundaneki otashi dulika shili a li ena omalalakano elili, ehe fi oku ulika nghee ovanambelewa tava ende kashona moku endelelifa opoloyeka ei, ashike osha kwafela mokuulika kutya epangelo ole li tula mo mokufila oshisho oshiwana, ashike vamwe vomwaavo va pewa oshinakuwanifwa okumona kutya eepoloyeka depangelo oda tulwa moilonga ihava endelele ngaashi sha teeleliwa.

Kakele kwaasho, epangelo ola yandya oshimaliwa eshi nehalo liwa, ashike ovo va nuninwa omayambidido aa kepangelo ova fa inava pandula omakwafo oo tava mono.

Oshiholelwa ovamwe vomongudu younona vekondjelomanguluko ovo, ina va hala oku ya komadeulo nota va kondjifa ashike opo va pewe oilonga. Omunhu paife oto pewa ngahelipi oilonga ngee kuna ounongo washa?

Vamwe ota ve li popile kutya ina va hala omadeulo shaashi ove na nale eedjapo deediploma, ova hala ashike oilonga.

Ashike eshi omhunu ena oku dimbulukwa osheshi kutya, eshi a kala efimbo lile eli omutumba meumbo nodjapo yaye, osheshi ashike pehena oilonga tai wapalele oulongelwe waye, ile ehena eshiivo tali dulu oku mu pefa oilonga.

Onghee osha pumbiwa oku tambula ko eifano lepangelo oku ka deulilwa omaifano, ngee oleli we li longela nale nouna odjapo yalo ile limwe li lili olo ta li dulu oku ku pefa oilonga.

Kakele nee koilonga, omadeulo epangelo aa otaa kwafa oku longa ovanhu va kale ovanangeshefa vanini, nongeenge nee omunhu okwa ka kala ina mona oilonga, ile ina hala oku kutwa noku na edilaadilo loku tota po ongeshefa ye mwene, nena ota dulu oku tota po ongeshefa yaye, noku i fila oshisho iha mbangolote, oku kuta ovakwashiwana vakwao –hano oku ninga omuyandji woilonga ponhele yoye mwene –opo u dule oku yambidida kekulo lomaxupilo oshilongo.

Oshiholelwa ngeenge omunhu owa deulilwa ounafaalama, ponhele yokukukutwa mofaalama yepangelo ile yomunhu wonhumba, momadeulo oto di mo ushi oku longa mofaalama, nokungeshefa yoo onga omunafaalama nande owoingulu, woimeno ile weexuxwa.

Eemwedi hamano odo omunhu ta kala momadeo kadi fi efimbo lile nande nande, oku yelekanifa noku pewa oilonga ove uhe na eshivo lasha, toka kala nande owa loloka ile oilonga ito i dulu shaashi ku na eshivo, ashike kuna apa toi, shaashi noka ngeshefa ka nini-nini oko ngaho oto dulu ku uya po nako shaashi ku na eshiivo lasha.

Vali omunhu ito dulu naana kutya oule weemwedi hamano odo to ka kala to deulwa oto ka mona oixuna shaashi, oto ka kala to pewa okamaliwa komaadi nofewa, ove vali oto ka kala to pewa okulya.

Hano vanyasha li longeni oku kala ta mu tale omakwafo tamu a ningilwa kepangelo mefano liwa, shaashi omadilaadilo mawa, ohaa eta oiimati iwa.

LEAVE A REPLY

Please enter your comment!
Please enter your name here