Aanona yaali ya pila mondunda

0
314

 

ONOOHOLONGO –  Uunona wuumati  uumwayinathana owa si eso lyombaadhila nenyanyaleki, sho wa pile mondunda yokupungula megumbo lyaakuluntu yawo. Oshiningwanima shika osha ningilwe Etitano lya ziko, sha ningilwa momukunda Onooholongo moshikandjohogololo shaNyaanya.

Oshiningwanima shika shomulilo osha ningwa manga yina yaanona a adhika a yi puushiinda. Pa ma hokololo aanona mboka oya li megumbo  yatatu, naasho hono okakuluntu koomvula hamano lwaampoka ka mono omulilo gwa tema oka li ka matuka opo kaye puushinda ka ka tseyithe kutya uumwayina ota wu pile mondunda.

Aanona mboka ya pile mondunda oyo Samuel Tangeni Tomas goomvula ne (4), na  Imanuel Tomas goomvula mbali (2). Yina yaanona mbaka Lemisia Ingashipola, nonande ali a dhengwa pomutima pethimbo twa talelepo egumbo ndika Etitano ndyoka, okwa hokolola kutya okwa adhika owala a yi puushiinda, teya thigi megumbo mono a thigi eya telekela oshuumbululwa.

“Manga nda adhika ndi li mondjila yandje yoku galuka mushiinda gumwe okwa li anuwa a mono olwithi talu gundumuka naasho a tala nawa okwa li a mono kutya nani olwithi otalu zi maayetu, otwa li tweya notwa adha aanona ya pilamo nale,” Yina yaanona tati ngaaka.

Aashiinda mboka moku lombwelwa kokanona hoka, kutya uumwayina otawu pile mondunda oya li ya matuka mbala, opo ando ye ye ya dhime omulilo ngoka ye wete gwa yaka nale, ashike sho yaka thika megumbo moka inaya vula anuwa okugu dhima oshoka oya adha ondunda ndjoka ya ongotela nale pevi. Omalutu gaanona mboka oga pya no itaaga vulu okudhimbululwa.

Hileni Petrus gumwe gomaashiinda mboka ye ya  poshiningwanima mpoka tango, ta ti molwaashoka ondunda moka mwa pile aanona mboka oyo yokupungula, mo omo mwa adhika muna omandini gomeya, oyali ya ningi onkambadhala ya ka tale omeya puushiinda manga yamwe taya dhimi omulilo, ashike oya nyengwa, inaya vula oku pondola sha, yo oya adha aanona ya hulitha nale.

Aanona mbaka oya pile megumbo lyaakuluntu yawo Imanuel Indongo Tomas na Lemisia Ingashipola. Taya popi kutya oyali yena aanona yahamano (6), ngaashingeyi oya thigilwapo aanona yane, wo mbono wa hulithile moshiponga shomulilo owo wali uushona kuukwawo.

Okanona hoka ka adhika megumbo nuukwawo taka hokolola  kutya hoka okashona oko ka dhana omulilo, sho kegu ukitha mondunda ndjoka yokupungula. Aashiinda naantu yopomudhingoloko ngoka  moku uva onkundana ndjika ta yi tilitha oya li ya gongala noku hekeleka aavali naakwanezimo mbaka.

 

 

 

 

LEAVE A REPLY

Please enter your comment!
Please enter your name here