Old Mutual a longitha oomilliona momaudhano goosikola

0
187

 

OSHAKATI-Omunambelewa gwOld Mutual, Ndangi Katoma okwa ti ehangano lye ngashingeyi olya longitha omamiliona N$ 2.7 muudhano woosikola miitopolwa ine yokoNooli.

Ndhika Katoma okwe dhi popile pokapale kEmanguluko mOshakati pedhingoloko lyahugunina lyuudhano waOld Mutual woosikola dhokoNooli Olyomakaya gaziko.

Katoma okwa ti oshi li oshitopolwa shiinakugwanithwa ya Old Mutual oku gandja sha moshigwana noku kwathela omidhingoloko moka ha longele.

Okwa ti oya tsikila okukwashilipaleka ethigathano ndika okuza mo 2004 sigo onena.Noosikola odhindji odha mona omakwatho ongele ogiikwamashina nenge ogoshimaliwa okupitila momaudhano ngaka.

Katoma okwa ti oya tothamo iitopolwa yokoNooli owina oshoka mbika oya kala konima moshimpungu shomaudhano, nelalakano lyawo oku eta mbika pomuthika gwiitopolwa iikwawo moshilongo.

Okwa li a kombo kombunda oongeshefa oonkwawo ndhoka ta dhi tsikile okulonga pamwe naOld Mutual moku kwashilipaleka uudhano mbuka. Ndhika odho Waltons Stationaries, Business Connexion na OTB Sports.

Eengendjo SS odho enyakwa lyetanga lyokoompadhi muudhano mbuka sho dha dhenge mo Ruacana High School noopelenti 5-4 konima sho oospana ndhika dha li dha dhana shithike pamwe ookoola 3-3 mokapale.

Esindano ndika olya zi puudhigu oshoka aamati yokOmusati oya li ya tokola unene tuu sho oyo kwa li ye wetike taya ka sindana ekopi ndika, ihe nani elago ka lya li lyawo.

Ruacana okwa li ta dhana etanga nokwa tulamo okoola mominute mbali dha hugunina ashike omuyeluli gwepandela okwa ti omutulimo okwa yaka.

Eengendjo odha pewa oshipandi shoodola N$5 000, ekopi oombandi dhoshingoli eshina lyokwiindjipaleka oombapila nosho wo iizalomwa yetanga.

Ehala etiyali olya pewa Ruacana opamwe noombandi dhoshisiliveli noodola N$ 3 000 moshiketha neshina lyokufakisa, iizalomwa yetanga noshowo iikwathithilongo.

Osekundo ya Haudano oyo enyakwa muudhano wokatanga komokambamba konima sho ya li ya dhenge mo Uukule 24-22 nokutoolapo ekopi ndyoka yi igilila nokapandi koodola N$ 5000,ekopi oombandi dhoshingoli iizalomwa yetanga nosho wo eshina lyokwiindjipaleka oombapila.

Osekundo yUukule oya li ya toolapo ehala etiyali moka ya li ya pewa N$ 3000, oombandi dhoshisiliveli niizalomwa yetanga.

LEAVE A REPLY

Please enter your comment!
Please enter your name here