Nambala ota longekidha okueta oombandi konooli

0
180

 

OSHAKATI-Omumatuki gwiinano sho 100m no 400m muudhano waanuulema Johannes Nambala okwa tokola oku eta oombandi dhe kuumbangalantu hoka oko a valelwa.

Nambala omudhani omunuulema omuNamibia ngoka a li a sindana oombandi mbali dhoshisiliveli kuudhano wo Paralympics koRio de Janeiro petameko lyomwedhi nguka, okwa tokola opo e ete oombandi ndhika koshitopolwa hoka a yambukile.

Omutondoki nguka okwa li a holola enyanyu lye ta ti shika osho oshikando shotango oku kutha ombinga muudhano wOlympics noku sindana ehala etiyali miinano mbika iyali shoometa 100m nosho wo shoka shoometa 400  nokwa ti shika oshi li lela etumba kuye.

Nambala oha matuka muudhano mboka ha wu ithanwa T13 mboka waanuulema yena uulema womeho ashike oha ya monoko kashona.

Okwa ti mo T13 100m okwa li a thigwa po komumatuki aza ko Iceland omanga mo T13 400m okwa li a thigwapo komutondoki gwokoMorocco.

“Oshigwana shokoNooli nashi kale sha tegelela iinima iiwanawa oshoka natango ondi li moVenduka ashike naya kale ya tegelela manga tandi manga sha pama,” Johannes Nambala ta ti.

Omunamimvo 25 okwa li a matuka oshinano sho T13 100m muule woosekonde 10:71 omanga oshinano sho T13 400m ali eshi matuka muule woosekonde 47:21 nokupitilila ethimbo ndyoka lya matukwa moshinano shika moAfrica. Onkene ye oye ena orekota yethimbo epe nefupi mokutondoka oshinano shika menenevi ndika.

Nambala okwa li omwiilongi mosikola Eluwa moka a kalamo okuza pondondo yotango sigo ontimulongo, na okwa ka tsikila ko Windhoek Technical High School hoka oko amanene ondondo 12.

Uudhano we okwe wu tameka kohi yOshakati Athletics Club na oha matukile okalaba yoOshana Heroes Club yaantu yena uulema.

Nambala okwa uvanekele oshigwana kutya muudhano wOlympics yo 2020 ota ka eta ombandi yoshingoli koNamibia.

LEAVE A REPLY

Please enter your comment!
Please enter your name here