Okaana okaAfrica okeli tuu meameno?

0
167

Efimbo eli oshilongo tashi tyapula efiku lokaana okaNamibia, tali tyapulwa nokuli koshi yoshipalanyolo sha yukila koiningwanima ei tai linyenge moNamibia nomuunyuni aushe, mwa kwatwela enenedu laAfrica, tai ningilwa ovo vehena nande eengono dasha mounyuni, hano ounona.

Efiku lokaana kaNamibia neudo otali danwa koshi yoshipalonyolo: “Omananafano nomangwandjulathano muAfrica : Eameno noufemba wounona”.

Oonaku eta po oshipalanyolo eshi ova dilaadila moule nova tala keyeletumbulo lomwIingilisha olo tali ti eendjaba ngee tadi lu, omwiidi oo hau mono iixuna neenghono.

Sha hala kutya ovakulunhu ngee; omeedula ile mouleli tava nanafana ile tava ngwadjulafana, ongudu oyo ihena eenghono dasha moshiwana, oyo hai mono oixuna neenghono.

Omananafano aa inaa kwatela mo ashike omananafano opa politika, ashike okwa kwatela mo yoo omananfano omomaumbo, opaliko, ile nokuli opangeshefa.

Monakudiwa omananafano pokati kovakulunhu okwa kala unene nokuhepeka ounona pa madilaadilo, nomeemhito omo ounona va kala nokuehamekwa unene palutu ongeenge pena omananafano opa politika a xulila fiyo omoita.

Ashike eshi monena, hasho vali. Ounona paife otava hepekelwa momaumbo avo, tava hepekwa kovanhu ovo va talika ko nova teelelwa va kale ovaameni vavo kamana. Hano tava kufwa eemwenyo kooxe nooina, tava hepekwa unene ngeenge pwa tukuka enanafano pokati kovadali.

Natu tameke moshilongo, hatu tale nokuli koshiningwanima shi talala mboomboo sha ningilwa komungulofuta woshilongo, oko omukainhu wedina Zenobia Seas (32) vati a dipaa okaana kaye kedina Ava Owoses (2), ndele ta tunime xe yokaana oko okatumwalaka e mu shivifile kutya okaana kaye okwe ka dipaa oshuunguungu noshiwilo. Ye ta kendabala ngeno eli xwikile metuwa, opamwe nokamudimba kokaana.

Nonande oshiningwanima eshi oshitalala neenghono, noshi djuu oku li pula. Unene tuu ngeenge omudali ou oukolelele womadilaadilo aye okwali uli nawa pefimbo a ninga oikulumanene ei.

Pashito, omukainhu oye omwaameni wokaana, opo nee omulumenhu ta amene okaana na ina, naava va tatu ova amenwa kovaleli vopashiwana ile noitya imwe, kepangelo. Ashike oinima oyo tai linyenge paife oili kondje yeshito laKalunga.

Momaumbo ngee ovakulunhu tava lu, kakele kokuhepeka ounona pamadilaadilo, oto hange nokuli ovanhu vamwe tava fululukile nomounona, tave va denge. U hange omunailonga womomaumbo ena enanafano nomuyandji waye woilonga, naye ota fululukile mounona.

Ounona momaumbo ota va kangulwa noikangule, vamwe otava teywa omaoko, ile nokuli to hange omunhu ta nhuka kombada yokaana ngaashi sha holokele mokavideo kali taka tambulwafana kosocial media.

Omapangelo mounyuni mwa kwatelwa Africa otaalu. Hano ounyuni tau lu, ndele pefimbo lokulwa opo ounona novakainhu ovo hava mono unene oixuna shaashi kave na omafa neenghono dokuliamena.

Oiholelwa younona ovo va hepekwa omolwa omananafano omapangelo ile pokati keengudu dopolitika itaapu.

MuAfrica letu ngee owa tale koSouth Sudan oko ombili tai nyangwanyangwa, ounona novakainhu otava mono oixuna. Nokuli, oto hange ovakufimbinga moikolokosha tava longifa ovakainhu nounona onga oilongifomwa yavo moita, moka va kwata po ombabyona fimbo limwe tava tameke okuva dipaa kooumwe nooumwe nelalakano okuudifa nai ovatondi vavo ile opo va pewe osho tava lwile.

Ounona vamwe ova kufwa meefikola va ningwa ovanailonga, moilongo oyo ina oita ova kutwa va ningwa ovakwaita.

Onghalo yehepeko lounona, oku teya po onakwiiwa yoshilongo. Ounona ohave li longele ku keshe shimwe osho tashi ningwa moipafi yavo, ile tave shi ningilwa. Sha hala kutya, ngeenge Namibia ile Africa alishe tali hepeke ounona, nena enenedu eli ile oshilongo shetu kashi na onakwiiwa.

Shaashi ohatu xungu nokutekula oshiwana shovahepeki, ovadipai, eembudi, novalongifinai vomalodu ngeenge ita tu lundulula nokutula po oku hepeka ounona komalutu nopamadilaadilo.

LEAVE A REPLY

Please enter your comment!
Please enter your name here