Oomiliona N$ 4.8 odha pumbiwa mokutunga ombala

0
191

ONDONGA – Omunashipundi gokangundu hoka taka ungaunga nelongekidho lyetungo lyOmbala yaNdonga Kashona ka Malulu okwa ti okwa thanekwa oshimaliwa shi thike poomilliona N$ 4.8, sha pumbiwa metungo lyombala yoshilongo.

Omasiku ga piti okwa li kwa longekidhwa egongelo lyoshimaliwa lyotango omolwiilonga mbika moka mwa gongelwa iimaliwa nosho wo oongoombe.

Oshiindingili shika shegongelo lyoshimaliwa edhingoloko lyotango osha li sha ningilwa pompampa yOmukwaniilwa Nangolo dhAmutenya momukunda Ondonga moshikandjo shuulenga Ondangwa.

Aaleli yopamuthigululwakalo yaza kiikandjo ya yooloka mOndonga oyali ya gongala mpoka noku gandja shoka ya li ya longekidha, osho wo oya ningi omauvaneko gawo.  Oshiithanene shika osha ningwa sha landula omathaneko gondungedhiladhilo yetungo lyOmbala yoshilongo ontiyali omumvo gwayi.

“Egongelo lyoshimaliwa ndika olye enda nawa oshoka otwa gongele po oongombe 15 noshimaliwa shooN$4 800, osho wo omauvaneko ga ningwa ogendjigendji, shino pamathaneko getu otwa tengeneka opo iilonga yokutunga egumbo ndika yi yemo mbala yo iimaliwa yi kale ya gwanithwa po nziya,” Ka Malulu ta ti.

Ta gwedha po kutya shino hasho tashi kala oshikando shotango nenge sha hugunina elelo lyoshilongo ta li gongele oshimaliwa, ashike pamalongekidho oya thaneka natango ku ka ningwe egongelo etiyali mbala nuumvo.

Okangundu longekidhi megongelo lyoshimaliwa shoka otaka kala noku tulapo omathaneko, ko taka gongala poompito noompito opo ka kwashilipaleke kutya ayihe otayi ende nawa, lyo egumbo tali tungwa mbala.

Aanamikunda naaleli yopamuthigululwakalo oya ulike eitulemo lyawo megongelo lyoshimaliwa shoka, noya uvaneke taya ka gandja etsomukumo opo iimaliwa mbyoka yi gwanepo mbala. Ka Malulu ta ti ayihe otayi kala ya tulwa pomahala. Aaleli yopamuthigululwakalo otaya kala nokugongala, yo taya kundathana iipambele yombala ndjoka ya tegelelwa okutungwa. Ehala mpoka pwa thaanekwa egumbo ndyoka olya tulwa nale molugumbo lwa tega owala esiku li thike po pu tungwe.

 

LEAVE A REPLY

Please enter your comment!
Please enter your name here