Oonakuningilwa omiyonena kiiyamakuti otaa talika

0
158

ONGWEDIVA – Epangelo otali talulula oveta yaamboka ya ningilwa omiyonena kiiyamakuti miitopolwa ya yooloka. Uuyelele mbuka owa gandjwa komunambelewa gwondondo yopombanda moshikondo shomidhingoloko Colgar Sikopo poshigongi naakwashigwana ya za miitopolwa ine yo konooli sha li mOngwediva omwedhi nguka.

Aakuthimbinga moshigongi ya za miitopolwa Omusati, Oshikoto, Ohangwena nOshana oya tsakaneka omikundu dha faathana mekwatathano niithitukuti noya gandja ethaneko ku shoka ya hala shi ningwe.

Sikopo ngoka e li omukwateli komeho momahala gokuyakula aatalelipo miikunino yuushitwe  okwa yelitha kutya oshikondo shomatalelopo nomidhingoloko otashi thaneke okweeta po oveta ompe yokuhekeleka mboka taa ningilwa omiyonena kiithitukuti. Shika osha kwatela mo mboka taa yonenwa iikunwa momapya nenge taa likila iimuna yawo naamboka taya monithwa iiponga kiithitukuti.

Epangelo olya thaneka okulonga muukumwe nomahangano omakwashilipaleki li gandje ko   oomilyuna10 dhi longithwe mokuhekeleka mboka taa ka ninga iihakanwa komiyonena dhiithitukuti.

Sikopo ta yelithile oshigongi kutya, ngashingeyi  oshikondo shomidhingoloko ohashi futu N$ 5 000 kekanitho lyomwenyo gwomuntu nenge a monithwa oshiponga kiithitukuti, ashike ngele omunafaalama okwa likila ongombe oha futwa N$ 1 500 itaaku talwa kutya oyi thike peni.

Ethimbo ele unene sho oshigwana sha kala nokunyenyeta kepangelo li futile aanafaalama naaniimuna mboka omapya gawo ga lika po kiithitukuti nenge ya likila iimuna. Aakalimo miitopolwa ine konooli oya tsakanene mOngwediva noye na omaudhigu ga faathana. Oshikondo otashi thaneke okweeta po oveta tayi yakula ayehe shi thike pamwe miitopolwa ayihe yoshilongo ku mboka ye li momahala giinamwenyo ya gamenwa. Mboka taa ka ningilwa omuyonena kiithitukuti  ngaashi oonyati, oondjambameya noondjamba dha za mo ma hala guushitwe ga gamenwa, otaa ka kwathwa kepangelo.

Aakuthimbinga moshigongi ya kalela po omalelo gomithigululwakalo naakwashigwana yomiitopolwa ya yooloka, oya eta po omathaneko ga ka kundathanwe moshigongi oshinene sholudhi nduka pandondo yopashigwana tashi ka gongala muNovemba 2016. Sikopo okwa tsakaneka nale aaleli naakwashigwana miitopolwa Otjozondjupa noKunene nokwa tegelelwa a ka tsakaneke aakalimo yokoZambezi nokiitopolwa  yaKavango.

 

LEAVE A REPLY

Please enter your comment!
Please enter your name here