Osipana yetanga lyokoompadhi tayi kongo ekwatho

0
191

OMUTHIYA – Ospana yetanga lyokoompadhi tayi ithanwa Kaniita Sports Academy otayi kongo ekwatho lyeyambidhidho kehe moshigwana. Osipana ndjika otayi adhika molukanda Kaniita mondoolopa yaMuthiya mOshikoto.

Kaniita oya thikamapo maanona yoothigwa, mboka itaaya vulu okwi ikwatha yoyene, naayehe mbaka oyena ehalo nohokwe okukutha ombinga momaudhano. Oyi na aanona mboka yeli molukanda moka , oshowo mboka taya vulu okukala taya holoka komadheulo.

Omutotipo gospana ndjika , ngoka eli woo omunambelewa gomaudhano mUuministeli womaudhano, Aagundjuka nOmayakulo gopashigwana Nikodemus Amadhila okwa holola kutya elalakano lye opo a totepo ospana ndjika okwa tala konkalo yaanona mboka yeli momudhingoloko ngoka.

“Mondoolopa yetu otwa kala tuna ompumbwe yaanona yaagundjuka, opo ya kale taya ningi omadheulo getanga lyokoompadhi, limwe lyomomasiku ondali nda tokola opo ndi ende momudhingoloko gwaKaniita nonda eta ohenda mokutala aanona yaamati taya dhana etanga lyokoompadhi ashike otaya dhanitha okatanga kanathangwa,” Amadhila tati.

Ta gwedhapo kutya shika oshemu pendulile omadhiladhilo omanene opo ya konge omayambidhidho, yo ya dheulile aanona mbaka onkalamwenyo yatya shoo, yo ya kale aadhani aanene monakuyiwa. Ta ti shino otashi tsu omukumo aanona ya kale taya kutha ombinga momaudhano uuna ya zimbuka mootundi dhawo, yo ya dheule woo omasipa nomalutu gawo.

Amadhila ta ti Kaniita Sports Academy inayi tala owala ombinga komaudhano, ashike otayi kala tayi gandja woo omadheulo kaagundjuka mboka ye etha oosikola, yo ya tsuwe omukumo ya yande okukala pomahala gokushinga, yo ya wayimine yakwawo momaudhano gi ili nogi ili.

Ta pandula aavali, aanangeshefa osho wo aantu yomondoolopa yaMuthiya sho taya ulike eitulemo lyawo, nonande yamwe ya tameka okugandja omayambidhidho natango onkene taya pula moshigwana opo shi yambidhidhe nokashona hoka shi na, yo ya vule ya yambulepo omaudhano.

Oshiwike shika oyali ya pewa omakwatho gomatanga osho wo oosamende ku Lappy Adego go Adego Investment. Amadhila ta tsikileko ta ti omaudhano oga simana monkalamwenyo yomuntu kehe, oshoka ohaga kaleke aantu kokule niinima yuuyuni niilonga mbyoka inaa yi opala.

LEAVE A REPLY

Please enter your comment!
Please enter your name here