TUYENI KOLUPALE LA TUYENI: Okuvaleka, okuputula, okwoonda nokuhombola.

0
331

Ounyuni wonale noinima yao, nounyuni wopaife ou noinima yao. Monena otwa hala tu tale nghe okakadona mounyuni wonale ka kala haka putulwa kutya okwa li naana ovanhu ha va putula shike hano, moku shiyeleka nee nomefimbo lopaife to hange ovamati tava putula ndele ote li teyelepo afa auda tai ko katomeno, ye mongula mboli oye te ya adipaye afa a pulilwe oinima ei a yandja.

Omumati ou kwa li e li mefimbo lokuputula mounyuni wonale oyo u kwa li ewetike aya kohambo oikando yafika 12 omumati a mbangula ye okwa kasha ndele nomido daye otadi ke li vakela komilongo nhatu nane, omulumenhu eli poima we kwata ngobe ekanda ngobe lili poima nande ongobe inai dala, ashike natango itashi ti omumati oo konima yokuputula okaadona konhumba okuna oufemba woku ke ka dula oinyafa noku ninga eshi a hala meumbo lovanhu.

Mbela ngeenge mounyuni wonale ka kwali kuna oimaliwa ndele nomalapi okudjala okwa li a pumba unene kovalumenhu ovo inaa va taauluka Onamutune, ovamati okwa li nee have shi pondola ngaipi opo va mone omhito yoku putula okakadona una ngeenge a mono kutya okwe ka hala?

Omushamane naku dala omumati ngeenge okwa tomo, ongobe oyo a toma okwa li hakufamo ombelela oyo haiufanwa takuti eteta longobe, ndele taufana ovamati aveshe meumbo laye ndele  takufa ombelela oyo yeteta, tape omumati waye ou akula kuvakwao ye ta ti, tambula oshiteta shi ka shikwe na pamwe omafundula ngeenge a pitiko pamwe to mono mo omufuko wemupanda uputule eteta olo.
Ngeenge nee efundula leengoma omu hamu kala oukadona ola pitiko, ovamati aveshe ohavai kefundula oko opo keshe umwe aka tale ngeenge ota monoko omufuko emu panda, ovafuko ndishi ohava kala ne momutete konima eshi va ningwa oidjala xumba, vo tava nwefwa momalodu oo takuti omahombolodu omo nakufukika kwa li he endifamo shili komesho waye, hashi ningilwa opo ngeenge va mono po ovalumenhu opo vaha ka kale vena odino novalumenhu vavo vo veke va fimaneke molwaashi otashi ti ovatunilwa nale ngaho.

Didilika ne, omumati keshe umwe kefundula oko okwa li haiko noluvale elifoola ngo koivale, opo ngeenge okwa monoko okakadona eka panda ye oteka mangele ne oluvale olo pokwooko kwako ko kolumosho, ngaho otashi ti okwe ka valeka nee ashike ine ka putula natango ye noxo ine ka onda natango.

Konima nee yokuvaleka ohai keumbo opo aka lombwele ovakulunhu ta ti, tate kefundula kwinya onda valekako okakadona kokoo tate Haiduwa nongeenge ne pamwe xe okwa panda nokuhole edimo olo tali tongwa lokoo Haiduwa ya Shiyelekeni, ye otaifana ne omukulukadi waye ina yomumati opo emu lombwele kutya omumwoye vati okwa valeka okakadona kokoo tate Haiduwa ya Shiyelekeni ava ngoo vedimo ali kala li na eengobe damanako oshana osho, dafa eehoni, ove oto shi tile ngaipi Mukwamalanga?
Ina yomumati ngeenge naye okwa panda nokuhole edimo lo koo Haiduwa ye ta ti, oshi li nawa ngaho, ko opo nee taku ka tumwa omukulukadi umwe wopoushiinda aka putule okaadona oko. Okwa li ha twaaleleko shike nee shimwe shomoiputula? Okwa li haku twalwa eteta longobe linya lapelwe omumati kuxe lashikwa opo li ka kale tali djalwa kokakadona oko komesho, ngaho okwa putula ne ashike natango ina onda oyoonda yovanhu.

Didilika ne omumati ou naku putula okaadona aka omito yaye opo kwali haikala yokushuna kohambo lwanima ngeenge a onda okaadona aka, ashike omhito opo kwali haikala yomumati ou ngeenge taka aluka kohambo a hange okaadona aka kalikapo ku vakwao manga kadjala eteta laye nokuli, ashike ngeenge okwa hange ne kapewapo edimo ku vakwao, kakwali heli dipaya ilo adipae okaadona aka, molwaashi kapewapo oufimba manga kafewa kadjala eteta laye, oyo oyali omhito yokukana yomumati molwaashi okwe ka putula ashike  ineka onda natango, navali kakwali hati eteta laye nelipewe molwaashi kakwali pena omunhu ta hale okutambula vali oshikutu ilo oshinyafa sha djalwa nale komesho noxo.

Ngeenge ne omumati ou okwa ka dja kohambo ndele okakadona kaye ina hanga kapewapo oufimba koilume ei haikala pomikunda ihaii kohambo, paife okwa shaala ne oshitopolwa shimwe ashike ti, oshashike ne mbela, napamwe omulumenhu ou okwa hala ne okuhombola?

Paife okwa shaala ashike oshitopolwa sho kwoonda ongobe yovanhu opo omulumenhu ou aka taleko omukulukadi waye.
Va Namibia, omweshi shiiva tuu nawa kutya mboli poima opena okuvaleka, shima wavaleke opo ne to dulu nawa okuputula,ove shima wa putula opo nee nawa to dulu okwoonda konima yokwoonda oto dulu nee nawa okuhombola.

Mopaife eshi hatu popi ngaha, ovalumenhu vomounyuni wonena ohamu tamekele ne peni ngeenge tashiya pokukonga omukainhu uka hombole, eshi ngo mulipo keshe fiku onye ngo mwalilwa. Nokonima ngeenge omwalilwa ne nye tamu ka kutula ovanhu ominino mwafa tamu kutula oikombo, nepulo lange olili nee apa, paife nye otamu kala itaa mu lilwa ngaipi ngeenge ponhele yokuvaleka opo ukaputule nawa nye ohamutameke ashike okwoonda.

Ovakainhu voshilongo shetu nanye omunapo ngo okapuko, omulumenhu ine ku valeka nee ponhele yokuputula ye okwa tameka nale te kwoondo.Ilo hano pamwe ohamwoondwa molwaashi  ohamu yandje tete oomeekulu Mukwanambwa veni va dedaulwe noikulumbwati komalume oshilongo sheni, kamuna shili, omukainhu uli poima una ongushu ndele oto ondwa otiivii noka cellphona mbela pamwe opo epata ndele novakwanedimo voye aveshe koonono va ka kale veli momhepo, ndele noko Facebook oku mwafa mwa lowelwa.

Oshili nghee ngo ovakwanedimo veli moshitola yoikefa yomidimba tava kongo oshikefa otava kongele omunhu andipa yelwa ocellphona, ngeno okwa li omudimba hauwana nande okuya mokandjato ko cellphona ngeno hamo ashike tau tulwa ei ye mu dipaifa, okukala inaamu hala okulonga neenyala deni osho muwete keshe fiku tamu ningi shanamutete mombila mwadipaelwa ee tiivii ngaho.

Omulumenhu eli poima ye ehena ongobe, ye a ka mona omito yokulanda oiitvii yo 9,000 opo a twale ku Ndahafa molwaashi a pewa a lyepo, ekadona liwa liwa ndele oshili naave oto efa toi mo tiivii wafa una olusheno molutu,oshili okuxuna kweni oshili okudule komaliko aa tamu pewa osho muwete tamufi oipudjamenye ngaho, oshilongo paife omwe shi shundula molwaashi omwa tameka okulandifa noo shi li komesho veni naau ngo emu lombwela kutya ohava kosho ingapi kutya olyelye emu pukifa ngaho.

Ovalumenhu ova Namibia ponhele yoku ka konga oilonga ovalambalala ashike omalukanda tava fimbula apa tapa nyika oinyafa, oto ka djako ne naini ngeenge nena itokongo oilonga, yo oinyafa ei tamu kongo moku shipenuna ashike okodola imwe nale taipulwa, oshili otamu ka xulila tuu peni? Ame inandi hala oku mu shuna monima ashike oshinanena sheni oshina unene omashongo oo amwe tae ke mu twala mekano.

Eli etumwalaka ne la uka kovalumenhu aveshe koonono naame onda kwatelwamo, ngeenge opena omulumenhu taya ndje shimwe shomomaliko aye molwaashi aya momilele nomukainhu oo, dimbwa koko nafile omututu, osheshi mutu omaliko okwa li ngo waayandja molwaashi naave una eshi wapewa uudite ounyenye, ngeenge opena omulumenhu a hala okufutilwa molwaashi a hengwa konima eshi aya nale momilele nomukainhu oo, naye oku ninga tafutu ounyenye wovanhu manga, ndele teu shunifako uli ngaashi uli unya kwali eudite nai nai, nda hala okutya hano naye na shunife oihole yovanhu ili ngaashi ili manga kwali a itavelwa, nongeenge oto futilwa ove, ongo omulumenhu ove oto futu shike?

Eshi handi popi apa kashishi omashendjo, ndele oshili ngeenge ovalumenhu itatu shikula imwe yomwaai, otuna oku ke li haluka twadipaya ilo tuli meedolongo ndele etomelo vati osheshi twa lilwa. Nye noxo tamu dimbulukwa kutya omulumenhu nghee sha kala mounyuni wonale okulilwa ndele hakulila ovakainhu.Owa hala uka lilwe kulye hano,ove wa ka londakana omapata ovanhu wa hala oinyenye, tu tambuleiko okulilwa opo tu ha ete oiponga molwaashi nashe oha tu lile ovanhu.

Ngeenge owa pewapo, eshi ngo topulwa osho ngo to yandje nande okwa ti wa omiliona imwe, ashike oshili ino hetekela nande utale konima nande nande osheshi ngeenge owatale konima molwa eliko loye, oto ke li haluka uli modolongo, oupote wa kula ouli ngo komaima oo eli komesho yetu oo, oshili omaima otae tweetele noikolo imwe nokuli itatu dulu nokuifuta ohatu kala ngoo ne twa mana mo omesho twafa omaima a lyatwa peembuda.

Ovalumenhu omolwa efimbo lopaife la kitakana, omukalo ne ulipipo muwa noku longifa opo tu henhuke oinima yoludi ngaashi ei?
Otuna oku li vangeka okwoonda noinima imwe ei inaa tu pulwa ya pitilila meehole, osheshi eshi tuna oku dimbuluka alushe ohole ngeenge otaiyapo ndele otai pitile molwaashi pena eliko, osho ohashiufanwa takuti, oshifandifa hole molwaashi shima ngo ndele eliko talipupo, nena nohole oyo ohaitameke tai tengauka yafa omhepo.

Oshiholelwa na tutaleni moshilongo shetu una ngeenge wa hange ovo vehena omaliko ve lihombola, nena eehole davo ohadidana onghadangala nafiyo omefiku laxuuninwa, okushiyeleka ne neehole dovayamba efiku tavadi keengeleka keshe umwe okwaauka keumbo lavo molwaashi vati omupya owadjapo ilo akale eli mohombo ye tava ka shikulufa omaunyenye omeembete komaumbo ovanhu, vati eshi tava li dambulavo oku wete ashike afa tali edu.

JOHN YA TUYENI
MRTUYENI76@GMAILA
CELL 0812988549

LEAVE A REPLY

Please enter your comment!
Please enter your name here