AaChina oya hala oogwamululu yetu

0
305
Ohokwe onene yokulya onyama yokasino moChina oya fala meshonopalo lyomwaalu guusino moAfrica, naashika osha undulile ondando yokasino pombanda. Okasino oko oshinamwenyo oshilongithwa momagumbo ogendji menenevi ndika.

 

WINDHOEK – Ehangano lyomoNamibia olya thaneka okutunga okatomeno kokudhipaga uusino pOkahandja. Ehangano ndika olya hala okulanditha onyama osho wo oombanza dhuundoongi mboka koChina nomegumbo.

Pethimbo ndika ehangano ndika hali ithanwa AgriNature Investment and Trade otali pula omadhiladhilo goshigwana mOkahandja kombinga ya nkene okatomeno haka taka gumu omudhingoloko.

Omwaalu guusino moChina otagu ende gu uka pevi  omolwa ohokwe onene yiilongomwa yuusino unene tuu omuti hagu zi miikwamagadhi ya ndoongi okuza moshipa she. Omuti nguka hagu ithanwa ejiao, okwa itaalwa hagu enditha nawa ombinzi molutu. Go ishewe ohagu panga onkalo yetelele, okwaakotha, omathimbo goomeme ga lyalyakana osho wo ohagu kaleke omuntu keena omvulwe.

Onyama ya gwamululu oyo ishewe oshikulya shondilo miitopolwa yimwe ya China unene tuu muumbangalantu woshilongo shoka. Miitopolwa mbyoka onyama ndjika ohayi fulukithwa etayi temwa noku gwagwatekwa nawa momuhoka gwa dhoga gwa tulwa iitowaleki ayihe yoshiChina. Ohayi kuthwa po peziko etayi talala manga opo ihe otayi tetelwa onyanga yoludhi lwogarlic etaku shashwa ovinega dho oondya otadhi tulwa ihe poshitaafula.

Moshitopolwa shaHebei muumbangalantu wa China onyama ndjika ohay ithanwa lu rou huo shao, ndjika ya hoyakanithwa nondungu. Onyama yokasino ohaye yi teleke mosopa nenge molupe lwaandjoka ya gwagwatekwa yili kohi yomuhoka tagu tokola elaka.

Molwashoka omagumbo ogendji moChina oge shi wete nawa, epulo lyonyama yagwamululu olili pombanda osho lyomuti ejiao.

Ompumbwe yomuti ngoka ha guzi muusino, ejiao, oya londo pombanda ngaaka noku fala mpoka kutya omwaalu guusino moChina ita gu gwanene we. Omiyalu dhongashingeyi odha ulike kutya uusino auhe tau adhika moChina oguli ashike oomilliona dhili hamano okuza poomilliona 11 omimvo omilongo 20 dhapiti.

Onkene aanangeshefa mboka ya mono okalweedhe koku mona oothilinga haka oya tala kuAfrika  opo ya gwanithepo ompumbwe ndjika.

Ehangano lyomOkahandja ndyoka tali tula po okatomeno kuusino lyedhina, AgriNature Investment and Trade cc, olya ti iilonga pokatomeno hoka oya kwatelamo okudhipaga oshowo okulongela nawa onyama yuusino opo yi tuminwe koChina”

Pauyelele mboka wa monika po inaawu gwana po nawa ehangano ndika olili miikaha yaa Chiina naa Namibia. Omukwashigwana gwaChina Wilson Yang oye eli kalelapo.

Yang, ngoka petameko a li a tindi okutya sha kombinga yoshinima shika sho a pulwa kuKundana , a ti ye ke na mo oshipambuliko  mongeshefa ndjika , na okwa ti ita vulu okutya ko sha kuyo. Okwa uvaneke oku tu galukila shampa a pewa epitikilo kooyene mboka ye li moKaribib .

Okatomeno ota ka dhikwa mehala lyOofabulika muumbangalantu wOkahandja pehala lyonomola ERF 780, mepandaanda lya West, ihe manga iilonga inaa yi yamo ongeshefa ndjika oyi na manga oku mona onzapo yokupita yomudhingoloko.

Botswana oha tumine nale onyama yuusino koChina, omanga moshitopolwa shoKuumbangalantu ninginino waSouth Africa aanambelewa oya yile koChina oku ka kundathana ompito oku landitha onyama yuusino hoka.

Ehangano lyaBotswana Press Agency olya kundanekele kutya elanditho lyonyama yokasino otali ende nawa kutya ngaaka aanangeshefa yaaTswana oya thaneka okutunga ofabulika yokutula onyama yokasino moondooha.

Mo Kenya uutomeno uyali wuusino owa egululwa okulanditha onyama koChina, pahokolo lyoshikundaneki, Kenya Daily Nation mu May nuumvo.

Ihe elanditho lyonyama yokasino koAsia olye eta uupyakadhi mUumbangalantu wAfrika. Niilongo yokolundume lwenenevi ndika oya edhile oongamba dhayo uule wiiwike ihamano okukeelela eshonopalo lyomwaalu gwoondoongi  miilongo mbyoka oshoka ondando yokasino oya li ya londo pombanda noonkondo.Okasino oshinamwenyo shomegumbo oshiinekelwa no hashi longithwa okuhumbata omitsalo dholudhi kehe.

Burkina Faso na Niger – iilongo iyali iinene moku tumina onyama yokasino noombanza dhawo ko China oya tula po oondjindikila dhoku landitha onyama ndjika koAsia, na oya ti ompumbwe yonyama ndjika koshilongo shoka oya fala meshonopalo lyomwaalu guundoongi miilongo mbyoka.

Ondando yokasino moNiger oya yi pombanda okuza poo N$459 okuya pokati kooN$1,380 nooN$2000. Mo Burkina Faso, moka opo mwa tulwa oondjindikila muAuguste, ondando yombanza yokasino oya zi poo N$55 okuya pooN$690.

Ondando yokasino moNamibia oyili pokati kooN$500 nooN$900 shi ikwatelela kutya omulandithi okwa gama omusinda omutiligane kombinga yini. Pamiyalu dha gandjwa kuuministeli wUunamapya omumvo 2014 omwaalu guusino moNamibia otagu tengenekwa gwa li puusino omayovi 200 000 ooperesenda omilongo 90 dhaambuka otadhi adhika kuumbangalantu woshilongo. Iinamwenyo mbika oha yi dhana onkandangala onene moku longa iilonga ngaashi yokuhumbata nokuhila  osho wo okupulula.

Uusino moChina owa shonopala nopa hapu dhoCNN omwaalu guusino moshilongo shoka ogwa gu okuza poosino oomilliona 11 okuya puundoongi oomilliona hamano adhike uule womimvo 20 dha piti.

Sho oholomende ya Niger ya tulapo oondjindikila dhokulanditha uusino olya li lya ti elanditho ndika olya yi pombanda nooperesenda 196,3 kokutya oondoongi omayovi 80 000 odha li dha tuminwa koChina okuyeleka nuusino omayovi 27 000 ngoka ga tumininwe hoka omumvo 2015 osho BBC Afrika a kundaneke oshiwike  shayi.Oshikwawo oondjindikila odha tulwapo oshoka aanafaalama oya ethapo oongombe noku muna uuisno oshoka mbuka owali tawu eta oshimaliwa shi vule shonyama yongombe.

AgriNature Investment and Trade okwa ti okwi itulamo shili oku tameka okatomeno haka kotango moNamibia shampa ashike a pewa epitikilo lyopamudhingoloko.

Okatomeno ota ka longele metungo lilipo nale. Otapu ningwa ashike omakonakono gopamudhingoloko okutala nkene iiyekelwahi tayi zi muko tayi longwa nayo nonkene tayi ungaungwa nayo  mokati ka yilwe.

“Opo okatomeno ka tameke iilonga oka pumbwa okupewa onzapo yomudhingoloko okuza kUuministeli wOmudhingoloko’ osho omishangwa dhehangano ndika dha ulike.

donkey

LEAVE A REPLY

Please enter your comment!
Please enter your name here