Aahepeki yaanona naya lopotwe

0
222
Omupevi Minista Moshikondo sUukashike kOkantu, Lucia Witbooi pethimbo a li ta popitha edhimbuluko lyesiku lyokanona okaNamibia  oshiwike shayi pOluno mOndangwa.

 

ONDANGWA – Omupevi Minista mUuministeli wUukakwashike kookantu nonkalo nawa yaanona Lucia Witbooi okwa kumagidha oshigwana opo shi lopote aantu mboka taya monika kutya ohaya hepeke aanona.

Witbooi ndhika okwedhi popi oshiwike sha ziko pethimbo ali ta popi pedhimbuluko lyomunona omuNamibia pOluno mOndangwa. Okwa ti otaku lopotwa poompito dhilwe aanona taya hepekwa, no lundji aantu iha yeya puuyelele ya lopote iiningwanima mbyoka.

Okwa gwedhapo kutya uuministeli Wuukakwashike kookantu nonkalo nawa yaanona owi ilongekidha oku katukila onkatu kehe ngoka ta ningile omunona omahepeko. Okwa dhimbulutha aapulakeni ye kutya ,  omahepeko ogeli pamaludhi ogendji, ngaashi ngoka gopalutu oshowo gopamadhiladhilo.

Witbooi okwa holola eyeme lye omolwa aakiintu taya dhipaga aanona yawo, yo yamwe taya ikutha omapunda shono ta ti kasha li nawa nando. Ta hokolola kutya okuna omutima gwa gwa pevi omolwa aavali yamwe yaana oshimpwiyu nohenda nomaluvalo gawo.

“Ngele owa mono kutya okanona koye inoka pumbwa ka fala komukwanezimo ngoka wi inekela, nenge wu ka gandje kopolisi yo yi tale kutya okanona hoka otayi ka ningi ngiini, aanona oya pumbiwa moshigwana , inaya pumbwa ya ningilwe omahepeko kutya ogo palutu nenge ogo pamadhiladhilo,” Witbooi ta ti.

Okwa ti ngele omukwashigwana owa koneke omuvali gontumba ta ningile okanona omahepeko na lopotwe nziya no pwaana oku kwata kwata kwa sha. Okwa ti Uuministeli owuna oshinakugwanithwa oku kwatha aanona yaze monkalo yomahepeko ngoka ta ye ga ningilwa.

Witbooi okwa ulike kutya okwa konekiwa aanona yamwe haya thiminikilwa moondjokana, manga inaaya mana nooskola dhawo. Ta ti aavali mboka haya gandja aanona yawo ya hokanwepo naya hulithepo omikalo ndhoka, naya tegelele aanona ya mane elongo lyawo yo ya hokanwe nawa.

Omupevi Minista ta ti uuthemba waanona nawu kalekwepo ngaashi ekotampango ta li ti omunona kehe okuna uuthemba a kale a mona elongo lyopetameko, ye a silwe oshimpwiyu manga eli moomvula dhe dhopetameko, yo ya kale metonatelo ewaanawa tali etitha oonkondo.

Ta pula woo ooyene yomikunda ya kale taya pupu momagumbo moka muna aavali taya hepeke aanona yawo, opo ya katukilwe onkatu nokuhulithapo oshinima shoka.

 

 

LEAVE A REPLY

Please enter your comment!
Please enter your name here