Iilonga yomumati gokuushayi ya pewa oshingoli

0
171

ONGWEDIVA – MTC okwa shaina ombilive ye uvaneko nomulongwa gwomondondo 12 ngoka a li a shitipo ongodhi yopeke ihaa yi nwethwa okredita.

Pahapu dhomupopiliko gwa MTC John Ekongo, ehangano lyoMTC pamulandu ihali gandja iimaliwa yokwiilongitha kaanasikola mboka taya tameke omumvo gotango moUnivesiti, ihe mompito ndjika mu na Simon Petrus ngoka ena omagano geli pombanda, ehangano lye oli wete sha pumbiwa okumu kumika.

“Ngaashi mompito ndjika , MTC yemwene moshito iha gandja iimaliwa yoku ilongitha kaa ilongi yomomumvo gotango, ndele mwaandjika omumati nguno okwi ililemo mokati ka yakwawo.Oku shaina euvathano ogo omukalo gwoku mu kumika opo iilonge ye a pite nawa. Pethimbo ndika otwa tegelela ashike opo etu etele iizemo ye osho wo ombapila yetaambo lye  koshiputudhilo shoka ye a hogolola,” Ekongo a fatulula.

Kakele koku shaina euvathano na MTC, omugundjuka nguka ha sikola kenongelo lya Abraham Iyambo Senior Secondary School, moshikandjohogololo Oshikunde moshitopolwa Ohangwena okwa sindana wo oshingoli methigathano lyontseyo yuunongononi hali kwashilipalekwa kuNamPower. Ethigathano ndika lyaliko omasiku gapiti  moVenduka ohali ithanwa Nampower National Science Fare Competition.

Pahapu dhomulongi gwa Simon Petrus ngoka a li e ende pamwe naye okwa ti Simon okwa sindana iingoli iyali mokategoli komakwatathano nomauyelele.

Simon okwa tungu po eshina  li na ongodhi ndjoka to vulu okudhenga no itoo futu sha molwashoka ndjika ihayi pumbwa okutulwa okrediti nenge oku yi charga. Meshina muka omuna wo otivii ndjoka hayi longitha ashike omakuthikuthi goradio. Nongodhi ndjika, ye oha vulu okudhengela shaampoka muuyuni itaa piyaganekwa nando shampa ashike momudhingoloko ngoka mu na omakuthikuthi goradio. Ye oha tala otivii yoNBC 1 okuza keshina lye ndyoka.

Eshina ndika hali udhithwa olusheno olina wo olamba yoku minikila, omupepo okutalaleka mondunda osho wo iilongitho yilwe yolusheno ngaashi oku nwetha olusheno moongodhi dhopeke.Eshina ndika li na iilonga oyindji  ohali longitha oradiator oku li pa oonkondo dholusheno. Yo oradiator ndjika  Simon oye mwene ei hambula. Pahapu dhe ongodhi ndjika ohayi longo ashike mpoka pena omakuthikuthi goradio apeke osho wo okakalata kongodhi ka kusha.

Omulongwa nguka okwa ti okwa kala ta longo kopoloyeka ndjika uule womimvo mbali naakuluntu ye mboka yaana iilonga yondjambi oya longitha konyala oodola omayovi gaali ngoka ya li ya pungula oku mu landela iiparte mbyoka a li a pumbwa opo a shitepo eshina ndika li na iilonga yi vule shimwe.

LEAVE A REPLY

Please enter your comment!
Please enter your name here