Iiyambo nOmuyamba gwaningi gwaShilumbu

0
299
Aayenda pelangeko lya Shilumbu momukunda Iyambo nOmuyamba moshikandjohogololo Okankolo.

 

OKANKOLO – Elelo lyopamuthigululwakalo lyaNdonga olya li lya ulike Jeremia Shilumbu a ninge mwene gomukunda Iyambo nOmuyamba, noku mu langeka pambelewa omasiku ga ziko pegumbo lye momukunda tuu ngoka.

Euliko nelangeko ohali ningwa aluhe uuna omukunda gwaana mwene sho hagu inekelelwa ngoka ta kala tegu lele, ye ta kwatele iilonga yago  komeho, yo ayihe yi kale kolutenda.

Aanamukunda oya li ya gongala esiku ndyoka, mono aanangeshefa ya za koombinga adhihe dhoshilongo naaleli yopamuthigululwakalo ya li ya holoka yo ya ninge oonzapo.  Omukunda nguka oguli moshikandjo Oniiwe ookilometa oonshona okuza mOkankolo.

Omukunda nguka ogwa kala mewiliko lya tatekulu Jeremiah Nghituwamata, naasho a mana oondjenda konima yoomvula mbali omukunda ogwa kala tagu lelwa komukulukadhi gwe.

Amushanga gwelelo lyopamuthigululwakalo lyaNdonga Joseph Asino, pethimbo ta gandja omukunda nguka miikaha yaShilumbu okwa li a kumagidha ooyene yomikunda ya longe ngaashi shi li pamilandu nopaveta  dhopamuthigululwakalo.

Tatekulu Asino okwa indile Shilumbu  opo a yakule nawa aalelwa ye, nokukalekapo ombili yomukunda.

“Oshigwana shoye osho shoka shi yelithila ooveta dhelelo lyopamuthigululwakalo, ngoye to kala aluhe ho longekidha iigongi opo mu kundathane iinima mbyoka ya pamba omukunda gweni, aalelwa naya yakulwe shi thike pamwe,” Asino ta ti.

Mwene gomukunda nguka pethimbo ta taambako oshinakugwanithwa shika nenyanyu okwa pandula elelo lyomuthigululwakalo sho lye mu tenteke omutenge nguka komapepe ge, ye a yakule oshigwana pamilandu.

“Neifupipiko enene otandi taambako oshinakugwanithwa shika ndi inekelelwa koshigwana,  kekwatho nokoonkondo dhaKalunga otandi shi taambako ndaana uumbanda nuutile onkene onda hala ndi tumbule ngaashi Omukwaniilwa Salom, Kalunga pendje  oondunge nomayele opo ndi lele aantu mboka we ya pandje,” Shilumbu a galikana.

Shilumbu okwa pula aanamukunda ye ya kale nelandulathano, yo ya pangelwe kombili ndjoka ya fala iita kiilongo. Ta ti elongelo kumwe olya pumbiwa moompito adhihe,yo ya kwathele mokuhumitha komeho omukunda gwawo. Teya pula ya kale haya holoka kiigongi, yo ya kwathele mokukondjitha omashongo ngoka gi indjipala.

Enyanyu enene olya li lya taka noondigolo yo ootate taya kaluka oshoka omatenga oga mona mwene naanamukunda mbaka itaya ilele we yoyene oya mona aaleli ngaashingeyi. Yamwe yomomukunda nguka oyali ya nyanyukwa taya holola enyanyu lyawo. Gumwe ta ti ngashingeyi ota vulu oku gandja uupyakadhi nomikundu dhe ku mwene gomukunda gwe.

 

headman1

LEAVE A REPLY

Please enter your comment!
Please enter your name here