Ongalo ompe ya Gazza

0
323
Lazarus Shiimi AKA Gazza ngoka a tseyitha ongalo yimwe ompe yomoalbuma ye onti 11 ndjoka tayi ka pita pehulilo lyomumvo nguka.

 

WINDHOEK  – Sho othinge tayi hedha popepi aahikingalo na yo otaya longekidha oku etapo oongalo oompe tadhi opalele ethimbo ndika.

Gumwe gwo moonkulungu dhomusiki ngoka aluhe ha soshimpwiyu kutya aalanduli yomusiki ye oya nyanyudhwa omumvo aguhe oye Lazarus Shiimi nenge Gazza ngaashi eshiwike nawa. Nguka okuli mondjila yoku koleka omuthika gwe moNamibia ongo oye omuhikingalo kwaanawe sho taka tseyitha ongalo ye yimwe yomoongalo ndhoka tadhi kala moalbuma ompe ndjoka tayi ka pita pehulilo lyomumvo nguka.

Ongalo ndjika yedhina Get it on Tonight ote yi imbi pamwe nomuhiki gwenkuma Suzy Eises.

Elongelokumwe pokati kaambaka otashi vulika likale tali kumitha ndele omulyo gwongalo ndjika otagu hokitha, unene tuu sho muna ekwelengendjo lyojazz. Ewi lya Gazza pamwe neitulemo lyohokwe mokuhika enkuma kwa Suzy otaku etapo ongalo ombwaanawa ndjoka Gazza a nyanyukwa okutopola.

“Ongalo ndjika oyi na etumwalaka ku kehe gumwe . Ngame onda kala mo ethimbo ele moku imba noku hika oongalo, onda kola na ishewe ondina oondunge no kandina we uumbanda oku kambadhala omawi galwe nomikwelengendjo dhilwe opo ndi pe aalanduli yandje omulyo gulwe gwomusiki omupe, gwa yooloka notagu nyanyudha.” Gazza a ti.

Gazza okwa longa monakuziwa na Samy-lee Jones meimbilo lye ‘My Boeta’ na ‘Tufike apa’. Gazza, ngoka oye omweetipo gwehangano Gazza Music Productions (GMP) okwa ti oalbuma ye oya tungululwa moka ye ta longitha  omawi omape naashika okwa tegelelwa eshi tsikile noku shitapo  omuthika omupe mongalo nenge oalbuma ndjika ompe.

Enyakwa ndika lya tseyika nawa moku hika oongalo moshilongo nomo ku sinda omapapa omolwoongalo ndhika inali popya kutya oalbuma yalyo onti-11 otayi ka tseyithwa ethimbo peni nuumvo nonando okwa ti ndjika otayi ka tseyithwa mbala pethimbo aantu inaa ye shi tegelela.

Okwa ti oalbuma ye ndjika tayi ka uvika poopaati adhihe mu Desemba  nuumvo  oyina oongalo 18 mundhoka mwa kwatelwa oongalo dha imbwa pa longelokumwe naahikingalo yalwe moNamibia nopondje ya Namibia.

Yimwe yomoongalo ndhoka oondjoka ya longa pamwe nomwiimbi gwodancehall  N’yanda, yedhina Brick and Lace, nonkwawo oondjoka a longa pamwe nomwiimbi gwo Hip Hop omuSouth Africa gwedhina  Emtee.

Gazza, okwa ti okwa hala oku etapo ompito  ndjoka tayi lalakanene oku yalula nokupandula iitalenti noku yi tunga po opo yi tseyike wo nomuuyuni wopaigwana okupitila momahangano ngaashi ndyoka Universal Records.

Gazza, ngoka ta tsikile oshitalendi she nomukumo okwa ti okuna omathaneko omanene kombinga yomusiki moNamibia.” Shika kashi nasha nangame wee, ndele oshina sha noku  monena aahikingalo yalwe oompito.Omuna oyendji yena iitalendi kakele mbaka oya pumbwa ashike ompito ombwaanawa opo ya humithe mbika nawa komeho. Elalakano lyandje ngashingeyi  oku soshimpwiyu kutya  aahikingalo oyendji ya Namibia otaya fala omusiki yawo muuyuni” osho a ti.

Pethimbo ndika omumvo gwayi Gazza okwa  a nyanyudha omayovi noka video ngalo ke hoka kapulakenwa kaantu omayovi omilongi 70  okupitila mointaneta ngaashi koYou Tube  no sho wo palwe,.

“Iinima iiwanawa otayi ya. Oalubuma ndjika ompe oyo opoloyeka onene ya GMP naashoka tandi vulu okutya ooshika kutya tse otatu yi muuyuni. Onakuyiwa otu wete yili nawa kehangano lya GMP osho wo koshimpungu shomusiki moNamibia’ osho Gazza a ti.

Ongalo ndjika ‘Get It On Tonight” otayi adhika poosasiona adhihe dhooradio  pethimbo ndika, odhi li wo  kaanambelewa yaGMP nosho wo pepandja lyoYouTube.

 

 

LEAVE A REPLY

Please enter your comment!
Please enter your name here