Oshakati Premier ta yandje olusheno oshali

0
254

 

OSHAKATI – Oshakati Premier Electirc oya hiya aakwashigwana momalukanda gomOshakati ya ninge omaindilo gokutulilwa mo olusheno oshali.

Oshiningwanima osha tamekwa  petameko lyoshiwike shika molukanda lwa Kandjengedhi  Golf mOshakati. Meya gwondoolopa yaShakati, Katrina Shimbulu okwa patulula oshinima shika sho a lombwele oshigwana kutya, pokati 2016-2017 omagumbo 600 momalukanda gomOshakati otaga pewa olusheno lwoshali taku longithwa ooN$3,5 oomilliona.

Meya Shimbulu ta  fatulula kutya, elongekidho ndika olye ya pethimbo lyondungethaneko yOmupresidente Hage Geingob ku gandjwe eyakulo li thike pamwe kaantu ayehe, noku yambidhidha omathaneko gepangelo ga kwatela mo NDP4 nondjodhi  2030.

Oshakati Premier Electric ndjoka yi li oombinga  100% kohi yelelelo lyondoolopa yaShakati oyo tayi tula mo omalusheno ngaka.  Meni lyoomvula mbali, omagumbo 1 200  momalukanda Kandjengedhi  Urban, Kandjengedhi South naKandjengedhi, otaga ka pewa olusheno oshali.

Shimbulu ta yelithile oshigwana kutya, shito omaindilo golusheno ohaga futwa N$ 6 000. Pahapu dha Shimbulu, aanamagumbo 30 oya thikitha nale omaindilo gokutulilwa mo olusheno.

Okwa kumike ooyene yomagumbo ya ninge omaindilo opo ya kwatelwe momwaalu 1 200 shi li ompito yokweeta ehumokeho moonkalo dhawo. Aakali  yomomalukanda gomOshakati yomomagumbo giipeleki, momagumbo gomakuma ye li mpoka pwaahe na ongodhi yolusheno nenge e li oshinano shoometa 60 okuza kolyna onene oya kwatelwa moprograma ndjika.

Meya Shimbulu, okwa dhimbulukitha aaningi yomaindilo ya faalele uutse wa kwashilipalekwa kopolisi nombapila tayi kwashilipaleke uumwene wehala ERF.

Otashi ka kwathela mboka ya nyengwa okweeta olusheno pomahala gawo, ya ete eyambukepo momahala gawo, ya ete po elunduluko moonkalo dhawo, noompito dhiilonga mokutameka oongeshefa. Mboka taya pewa olusheno oya kumagidhwa ya gwanithe po oompango dhokukwata nawa olusheno. Uuna taya pumbwa ekwatho kombinga yolusheno ya konge ekwatho kombelewa yOshakati Premier Electric mOshakati pethimbo lyoowili dhiilonga.

Otaku gandjwa okaketha kolusheno, nolamba yimwe yolusheno okasocketa koopulaka mbali. Meya Shimbulu okwa kumagidha oonakupewa olusheno lwaa ha dhanenwe kuunona, lwaa kwatwe nomeya, kaaya gandje olusheno kaashiinda inaashi uvathanwa  naanambelewa yolusheno noshikwawo olusheno ihali shokwa noondhalate.

 

 

LEAVE A REPLY

Please enter your comment!
Please enter your name here