Uudhano wekopi lyoSpur kauko ehuliloshiwike ndika

0
196
Osipana yoKhuse FC oya hala okusindana po ekopi ndika opo yi simaneke omudheuli gwawo naangoka ali Mwene gwayo Khuse Malakia ngoka ali a thigipo uuyuni mbuka omvula yaziko.

OSHAKATI – Edhingoloko lyahugunina lyotonamende ndjoka ya kwashilipalekwa kuSpur itali ka dhanwa we ongula omolwa oosipana dhilwe dhili mekopi muka dha mona omaimbo.

Osipana yo Africa Motto otayi ka ya mela lyondjila okuya koTsumeb hoka taya kadhana omaudhano gokuya moliha yoNorth West First Division onkene oyo ya kateka otonamende opo yi pule komeho.

Ekopi lyoSpur olya li lya tameke ehuliloshiwike lyazako moka oosipana dha li dha dhana edhingoloko lyotango.

Omupopiliko guudhano mbuka Sam Nekwaya okwa ti uudhano mbuka owa undulilwa kehuliloshiwike tali ya omasiku 15 gaKotoba 2016 pokapale koIndpendence Stadium mOshakati.

Oshakati City osho  sha li sha patulula okapale nOnathinge United moka Ekondombolo lyaNangombe lya li lya dhengemo Onathinge 1-0.

Onambula Young Generation 3 Mama Love 0, J.Aron 1 Safile United 1, UNAM FC 2 Future FC 3, Vietnam Rangers nOnelago United oya li yi ithigi othika 2-2 mokapale na Vietnam okwa li a pondola oku dhenga Onelago koopelendi 5-4.

Onamundjembo FC oya li ya dhengwamo ko Poison Arrows 2-0 omanga Pescanova a li a dhengwa mo kOhangwena Nampol 5-4 konima sho ya li yi ithigi onola yokakangwa mokapale.

Oshakati United oya li ya dhengwa mo ko Golden Bigs 1-0, KK Palace ta dhenge African United 2-0.

Khuse FC okwa li a dhenge Foxy Senior 4-2 omanga Omeege United a li a dhengwa mo ku Africa Motto ngoka oye enyakwa lyo Second Division 2015/2016.

Uudhano wa li wa kutha oyendji kiipundi oomboka wa li pokati kOngwediva City no Major Power moka oosipana ndhika dha li dhi ithigi othika mokapale 2-2 nOngwediva City oya li yeshi pondola oku sindana koopelendi 5-4.

Oosipana ndhoka dha sindana odha tegelelwa dhi ka tsikile nolweetho olutiyali lwa hugunina lwekopi ndika opo ku ka talike ngoka ta ka ninga omusindani dhingi ngoka ta ka matukapo nokapandi ko N$ 10 000 ekopi noomedalia.

 

LEAVE A REPLY

Please enter your comment!
Please enter your name here